މެލޭޝިއާގެ ވެރިރަށް ކުއާލަލަމްޕޫރުން ފުރައިގެން ޗައިނާގެ ވެރިރަށް ބީޖީންގްއަށް ދަތުރު ކުރަމުން ދަނިކޮށް ވީނުވީއެއް ނޭނގި، މެލޭޝިއާ އެއަރލައިންސް ފްލައިޓް އެމްއެޗް-370 ގެއްލުނުތާ ބަރާބަރު 10 އަހަރު ފާއިތުވެ ދިޔައީއެވެ. ބޯޓުން ދަތުރުކުރަމުން ދިޔަ ފަސެންޖަރުންނާއި ކުރޫއިންގެ ޢާއިލާތަކުގެ ގިނަ މެންބަރުންތަކެއް އަދިވެސް ދަނީ، އެމްއެޗް-370 ގެއްލުނު ކަން ޤަބޫލު ކުރުމުގައި ތަކުލީފުތަކެއް އުފުލަމުންނެވެ. ބައެއް މީހުން އަދިވެސް ދަނީ، އުފެދިފައިވާ ބޮޑެތި ސުވާލުތަކަށް ކޮންމެވެސް ވަރެއްގެ ޖަވާބެއް ލިބޭތޯ ހޯދާ ބަލަމުންނެވެ.

އެފަދަ އެކަކީ ޗައިނާގެ ރައްޔިތެއް ކަމަށް ވާ ޖިއާންގް ހޫއީއެވެ. މަރުވެ ގޮސްފައި ވާ މީހުންގެ ޝަރަފުގައި ކުރިއަށް ގެންދާ އެކި ހަރަކާތްތަކުގައި ބައިވެރިވާނެ ގޮތެއް އޭނާއަކަށް ނޭނގެއެވެ. ޖިއާންގް މަންމަ، ޖިއާންގް ކޫއީ ޔޫން އަކީ އެމްއެޗް-370 ގެއްލުނު ދަތުރުގެ ފަސެންޖަރެކެވެ.

އޭނާގެ މަންމަ މިހާރު މި ދުނިޔޭގައި ނެތް ކަމަކަށް ޖިއާންގްއަކަށް އަދިވެސް ޤަބޫލެއް ނުކުރެވެއެވެ. ރަސްމީ ސިފައެއްގައި އެކަން އެގޮތަށް ކަނޑައަޅާ، އިޢުލާންވެސް ކޮށްފައި ނެތުމަކީ އެއް ސަބަބެވެ. ހަމަ އެއާ އެކު، މަންމަގެ ހަނދާނުގައި އެއްވެސް ކަމެއް ނުކުރެވޭތީ އެކަމާ އިންތިހާ ދެރަވާ ކަމަށް ޖިއާންގް ކިޔައިދިނެވެ.

ގެއްލުނުއިރު އުމުރުން 71 އަހަރުގެ އެ މަންމަ ހިމެނެނީ 2014 ވަނަ އަހަރުގެ މާޗް މަހުގެ 8 ވަނަ ދުވަހު، ކުއަލަލަމްޕޫރާއި ބީޖީންގްއާ ދެމެދު، 239 މީހުންނާއެކު ދަތުރުކުރަމުން ދަނިކޮށް ގެއްލުނު އެމްއެމް-370 ގައި ތިބި ޗައިނާގެ 153 ރައްޔިތުންގެ ތެރެއިން އެކަކެވެ. އެމްއެޗް-370 ގެއްލުނު ހާދިޘާއަކީ ދުނިޔޭގެ ވައިގެ އުދުހުންތަކުގެ ތާރީޚުގައިވެސް މިހާތަނަށް ހިނގާފައި ވާ އެންމެ ހައިރާން ކުރަނިވި އެއް ހާދިޘާއެވެ.

ބޯޓު ވެއްޓުނު ކަމަށް ބެލެވުނު އިންޑިއާ ކަނޑުގެ ދެކުނުގައި 2015 އާއި 2018 ވަނަ އަހަރާއި ދެމެދު، ކަނޑުއަޑި ބަލައިފާސްކުރުމުގެ 2 އޮޕަރޭޝަނެއް ކުރިއަށް ގެންދިޔައެވެ. ނަމަވެސް އެދެވޭ ނަތީޖާއެއް ނުލިބުނެވެ.

އެމްއެޗް-370 އަށާއި އެ ބޯޓުން ދަތުރުކުރި މީހުންނަށް ވީ ގޮތެއް، އެއްވެސް މީހަކަށް ބުނެދެވިފައި ނުވާ އިރު، ޖިޢާންގް ދަރިފުޅަށް އެ ވާހަކަތައް ކިޔައިދިނުމަކީ މިއަދު އޭނާ އުފުލާ އެންމެ ބޮޑު އެއް ތަކުލީފެވެ. އަދިވެސް ނަފްސާނީ ގޮތުން ފުން އަސަރުތަކެއް ކޮށް، ރޮވެއެވެ.

ލޯބިވާ އެތައް ބަޔަކު މި ދުނިޔެއާ ވަކިވެ ގޮސްފައި ވާ ކަން ޤަބޫލު ކުރަން ދަތިވެފައި ތިބި އެތައް ބަޔަކު އެބަ ތިއްބެވެ. ޖިއާންގް އެކަންޏެއް ނޫނެވެ. އެމްއެޗް-370އާ ގުޅުން ހުރި އެތައް ޢާއިލާއަކުން ދަނީ، އެމްއެޗް-370 ގެއްލުނު ހާދިޘާގެ ތަޙްޤީޤުތައް އަލުން ފެށުމަށް، އޮސްޓްރޭލިއާ، ޗައިނާ އަދި މެލޭޝިއާގެ ކަމާ ބެހޭ ފަރާތްތަކަށް ގޮވާލާ، ޕްރެޝަރު ކުރަމުންނެވެ.

ޖިއާންގްގެ އިތުރުން، ޗައިނާގެ އިތުރު 3 މީހަކު ހުކުރު ދުވަހު ވަނީ، މެލޭޝިއާގެ ބޮޑުވަޒީރު އަންވަރު އިބްރާހީމްގެ އޮފީހަށް ގޮސްފައެވެ. އެއީ ބޯޓު ހޯދުމަށް އައު އޮޕަރޭޝަނެއް ފެށުމަށް، މެލޭޝިއާ ސަރުކާރަށް ގޮވާލާ ސިޓީއެއް، ބޮޑުވަޒީރަށް އެރުވުމުގެ ބޭނުމުގައެވެ.

ސާބިތު ހިފޭ އައު ހެކިތަކެއް ފެނިއްޖެ ކަމުގައި ވާ ނަމަ، އޮޕަރޭޝަން އަލުން ފެށުމަށް މެލޭޝިއާ އޮތީ ތައްޔާރަށް ކަމަށް، ހުސްވި ހަފުތާ ތެރޭގައި އަންވަރު ވަނީ ވިދާޅުވެފައެވެ.

ދަތުރު ކުރަން ޖެހޭ ރާސްތާ ނޫން އެހެން މިޞްރާބަކަށް އެމްއެޗް-370 ދުއްވާފައި ވަނީ ގަސްތުގައި ކަމަށް ބައެއް ފަރާތްތަކުން ކުރާ ވަކާލާތު، މެލޭޝިއާގެ ތަޙްޤީޤު ޓީމުން މުޅިން ދޮގުކޮށްފައެއް ނުވައެވެ. ކަން މިހެން އޮތް އިރު، އެފްރިކާގެ އައްސޭރި ފަށުގެ ސަރަޙައްދުތަކާއި، އިންޑިއާ ކަނޑުގެ ބައެއް ޖަޒީރާ ރަށްރަށުން، މަތިންދާބޯޓުގެ ބައިތަކެއް ވަނީ ފެނިފައެވެ. އޮޔާ ލައްގާފައި ވާ ކަމަށް ބެލެވޭ އެ ބައިތަކުގެ ތެރެއިން ބައެއް ބައިތަކަކީ އެމްއެޗް-370ގެ ބައިތަކެއް ކަން މިހާރުވެސް ވަނީ ކަށަވަރު ކޮށްފައެވެ.