ޕޯޓްސް ކޮންޕްލެކްސްއަށް 25 ފްލޯގެ އިމާރާތެއް އަޅާނަން: އެމްޕީއެލްގެ ސީއީއޯ
25 ބުރީގެ އިމާރާތެއް އެޅުމުން އެމްޕީއެލްގެ ރެވެނިއުއަށް އިތުރުވާނެ
އެމްޕީއެލްގެ ސްޓޯރޭޖް ފެސިލިޓީއެއްގައި މުވައްޒަފުން ހަރަކާތްތެރިވަނީ- ފައިލް ފޮޓޯ
ޕޯޓްސް ކޮންޕްލެކްސްއަށް 25 ބުރީގެ އިމާރާތެއް އަޅުއްވާނެ ކަމަށް އެމްޕީއެލްގެ ސީއީއޯ މުހައްމަދު ވަޖީހު އިބްރާހީމް ވިދާޅުވެއްޖެއެވެ.
އެމްޕީއެލްގެ މަސައްކަތްތަކާ ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ސީއީއޯ ވަޖީހު ވިދާޅުވީ އެ ކުންފުނީގެ ޕޯޓްސް ކޮންޕްލެކްސްގައި 25 ބުރިއަށް އިމާރާތް ކުރެވޭނެ ކަމަށާއި، އެވަރުގެ ބިމެއް އެބަ އޮތް ކަމަށެވެ. އަދި ފެނަކައާއި އިލެކްޝަންސް ކޮމިޝަން ހިންގާ އިމާރާތަކީ އެކުންފުނީގެ އިމާރާތެއް ކަމަށް އޭނާ ވިދާޅުވިއެވެ.
ވަޖީހު ވިދާޅުވީ މި މަސައްކަތް ކުރުމަށް ތައްޔާރުވަމުންދާ ކަމަށާއި، މިއީ ކުރެވޭނެ ކަމެއް ކަމަށެވެ. ޕޯޓްސް ކޮންޕްލެކްސްއަށް 25 ބުރީގެ އިމާރާތެއް އެޅުމުން އެމްޕީއެލްގެ ރެވެނިއުއަށް އިތުރުވެ، އިތުރު ކުރިއެރުންތައް ލިބޭނެ ކަމަށެވެ.
ކުންފުންޏަށް އާމްދަނީ ހޯދުމަށް އިތުރު ގޮތްތައް ހޯދުމަށް މަސައްކަތްކުރައްވާނެކަން ފާހަގަކުރައްވައި ވަޖީހު ވިދާޅުވީ އެމްޕީއެލްގެ ބޮޑު ބިމެއް ހުޅުމާލޭގައި ވެސް އެބައޮތް ކަމަށެވެ. އެތަނުގައި ކޯޕަރޭޓް އޮފީސް އިމާރާތެއް މިހާރު ޑިޒައިންކޮށް ނިންމާފައިވާ ކަމަށާއި، ކޮންޓްރެކްޓަރު ވެސް ހަމަޖެހިފައިވާ ކަމަށް އޭނާ ވިދާޅުވިއެވެ. މީގެ އިތުރުން ވަޖީހު ވިދާޅުވީ އެ އޮފީސް އިމާރާތް އެޅުމަށްޓަކައި ކުރަންޖެހޭ ކުދި މަސައްކަތްތައް ކުރަމުންދާ ކަމަށާއި، އެ މަސައްކަތް ވެސް މިދައުރުގެ ތެރޭގައި ނިންމައި ޚިދުމަތް ދޭން ފެށޭނެ ކަމަށެވެ.
