އިތުރު ގަޑީގެ ފައިސާ ނުލިބޭނެ ކަމަށް އެމްޕީއެލްގެ މުވައްޒަފުން ބުނާ ވާހަކަތަކާ ކުންފުނިން ބުނާ ވާހަކަތައް ދިމަލެއް ނުވޭ

މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ހަރަދުތައް ކުޑަކުރުމަށް ބައެއް ފިޔަވަޅުތައް އެޅުމަށް ނިންމާފައިވާ ކަމަށާއި، ނަމަވެސް ކުންފުނީގެ މުވައްޒަފުން އިތުރު ގަޑީގައި ކުރާ މަސައްކަތަށް ދޭ ފައިސާ އުނިކުރުމުގެ އެއްވެސް ވިސްނުމެއް ނެތް ކަމަށް އެކުންފުނިން ބުނެފިއެވެ.

އެމްޕީއެލުން މިހެން ބުނެފައިމިވަނީ ކުރިއަށް އޮތް 6 މަސް ދުވަހަށް އެމްޕީއެލް މުވައްޒަފުންގެ އިތުރު ގަޑީގެ ފައިސާ ކަނޑާލާފައިވާ ކަމަށް ރިޕޯޓު ކުރުމާ ގުޅިގެންނެވެ.

ރާއްޖެއެމްވީއަށް އެމްޕީއެލްގެ މީޑިއާ އޮފިޝަލް ވިދާޅުވީ ކުންފުނީގެ ޕޮލިސީތަކާ އެއްގޮތަށް، ރަސްމީ ގަޑީގައި ނުނިމޭ މަސައްކަތްތައް ފުރިހަަމަކުރުމަށް މުވައްޒަފަކު އިތުރު ގަޑީގައި މަސައްކަތްކޮށްފިނަމަ، އެ މުވައްޒަފަކަށް ހައްގުވާ އިތުރު ގަޑީގެ އަބަދުވެސް މުވައްޒަފުންނަށް ދޭނެ ކަމަށެވެ.

ނަމަވެސް، ކުންފުނީގެ ހިންގުން ހަރުދަނާ ކުރުމާއި، މުވައްޒަފުންގެ ދުޅަހެޔޮ ކަމަށް ބާރުއެޅުމުގެ ގޮތުން މި ކުންފުނިން އަބަދުވެސް އިސްކަން ދެނީ 8 ގަޑިއިރަށްވުރެ އިތުރަށް މުވައްޒަފުން ލައްވައި މަސައްކަތް ނުކުރުވުމަށް ކަމަށް އޮފިޝަލް ވިދާޅުވިއެވެ.

އޮފިޝަލް ވިދާޅުވީ ކުންފުނީގެ ހުރިހާ ޑިޕާޓްމަންޓްތަކުން ވެސް މަސައްކަތްތައް ރާވާނީ އެ ދުވަހެއްގެ މަސައްކަތްތައް ރަސްމީ ގަޑީގައި މުވައްޒަފުން ލައްވައި ނިންމުމަށް ކަމަށެވެ.

ސަރުކާރުން ހަރަދުތައް ކުޑަކުރުމަށް ކުރަމުންދާ މަސައްކަތަށް އެއްބާރުލުން ދިނުމުގެ ގޮތުން ކުންފުނީގެ ހަރަދުތައް ކުޑަކުރުމަށް ބައެއް ފިޔަވަޅުތައް އެޅުމަށް ރާވާފައިވާކަން ފާހަގަކުރައްވައި އޮފިޝަލް ވިދާޅުވީ ހަރަދުތައް ކުޑަކުރުމުގެ ގޮތުން ކުންފުނީގެ މުވައްޒަފުން އިތުރު ގަޑީގައި ކުރާ މަސައްކަތަށް ދޭ ފައިސާ އުނިކުރުމުގެ އެއްވެސް ވިސްނުމެއް ނެތް ކަމަށެވެ.

ނަމަވެސް ރާއްޖެއެމްވީއަށް އެމްޕީއެލްގެ މުވައްޒަފެއް ބުނީ އިތުރު ގަޑީގެ ފައިސާ ނުލިބޭނެ ކަމަށް އަންގައި، އެޗްއާރްއިން އަންގާރަ ދުވަހު ގުރޫޕަށް މެސެޖެއް ލާފައިވާ ކަމަށާއި، ނަމަވެސް މެމޯއަކުން ރަސްމީކޮށް އަންގާފައިނުވާ ކަމަށެވެ.

އެ މެސެޖްގެ ސްކްރީންޝޮޓެއް ރާއްޖެއެމްވީއަށް ވަނީ ލިބިފައެވެ. އެ މެސެޖްގައި ބުނެފައިވަނީ ބަޖެޓް އިންތިހާއަށް ދަތިވުމުގެ ސަބަބުން ކުރިއަށް އޮތް 6 މަސްދުވަހަށް ހުރިހާ ޑިޕާޓްމަންޓްތަކުގެ ތެރޭގައި އޯޓީގެ ހުރިހާ މަސައްކަތެއް ހުއްޓާލުމަށް ސީއީއޯ ލަފާ ދެއްވާފައިވާ ކަމަށެވެ.

އެހެންކަމުން ރަސްމީ ގަޑީގައި ހަވާލުކޮށްފައިވާ މަސައްކަތްތައް ކުރުމަށާއި، މަސައްކަތްތައް ރޭވުމުގައި ވެސް ރަސްމީ ވަގުތަށް އިސްކަންދީ ރާވާލައިގެން ކުރިއަށް ގެންދިއުމަށް އަންގާފައިވެއެވެ. އަދި ކުރިއަށް އޮތްތަނުގައި އިތުރުގަޑީގެ ފައިސާ ދެވޭނީ ކުއްލިއަކަށް ހާޒިރުވާން ޖެހޭ ހާލަތެއްގައި ޚާއްސަ ހުއްދައެއްގެ ދަށުން އޮފީހަށް ނުކުންނަ މުވައްޒަފުންނަށް ކަމަށެވެ.

މީގެ އިތުރުން ޑިޕާޓްމަންޓް/ ސެކްޝަނުން އެންމެ ފަހުން ނިކުންނަ މުވައްޒަފު ހުރިހާ ލައިޓްތަކާއި، އޭސީތައް ނިންވާލުމަށް އިލްތިމާސްކޮށްފައިވެއެވެ. އަދި އޭސީގެ ޓެންޕަރޭޗަރ ވެސް 25 ނުވަތަ އެއަށްވުރެ މަތީގައި ބެހެއްޓުމަށް އެދިފައިވެއެވެ.