ކުރިއަށް އޮތް 6 މަސް ދުވަހަށް އެމްޕީއެލް މުވައްޒަފުންގެ އިތުރު ގަޑީގެ ފައިސާ ކަނޑާލައިފި

މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ މުވައްޒަފުންގެ އިތުރު ގަޑީގެ ފައިސާ ކަނޑާލައިފިއެވެ.

ރާއްޖެއެމްވީއަށް އެމްޕީއެލްގެ މުވައްޒަފެއް ބުނީ އިތުރު ގަޑީގެ ފައިސާ ނުލިބޭނެ ކަމަށް އަންގައި، އެޗްއާރްއިން އަންގާރަ ދުވަހު ގުރޫޕަށް މެސެޖެއް ލާފައިވާ ކަމަށާއި، ނަމަވެސް މެމޯއަކުން ރަސްމީކޮށް އަންގާފައިނުވާ ކަމަށެވެ.

އެ މެސެޖްގެ ސްކްރީންޝޮޓެއް ރާއްޖެއެމްވީއަށް ވަނީ ލިބިފައެވެ. އެ މެސެޖްގައި ބުނެފައިވަނީ ބަޖެޓް އިންތިހާއަށް ދަތިވުމުގެ ސަބަބުން ކުރިއަށް އޮތް 6 މަސްދުވަހަށް ހުރިހާ ޑިޕާޓްމަންޓްތަކުގެ ތެރޭގައި އޯޓީގެ ހުރިހާ މަސައްކަތެއް ހުއްޓާލުމަށް ސީއީއޯ ލަފާ ދެއްވާފައިވާ ކަމަށެވެ.

އެހެންކަމުން ރަސްމީ ގަޑީގައި ހަވާލުކޮށްފައިވާ މަސައްކަތްތައް ކުރުމަށާއި، މަސައްކަތްތައް ރޭވުމުގައި ވެސް ރަސްމީ ވަގުތަށް އިސްކަންދީ ރާވާލައިގެން ކުރިއަށް ގެންދިއުމަށް އަންގާފައިވެއެވެ. އަދި ކުރިއަށް އޮތްތަނުގައި އިތުރުގަޑީގެ ފައިސާ ދެވޭނީ ކުއްލިއަކަށް ހާޒިރުވާން ޖެހޭ ހާލަތެއްގައި ޚާއްސަ ހުއްދައެއްގެ ދަށުން އޮފީހަށް ނުކުންނަ މުވައްޒަފުންނަށް ކަމަށެވެ.

މީގެ އިތުރުން ޑިޕާޓްމަންޓް/ ސެކްޝަނުން އެންމެ ފަހުން ނިކުންނަ މުވައްޒަފު ހުރިހާ ލައިޓްތަކާއި، އޭސީތައް ނިންވާލުމަށް އިލްތިމާސްކޮށްފައިވެއެވެ. އަދި އޭސީގެ ޓެންޕަރޭޗަރ ވެސް 25 ނުވަތަ އެއަށްވުރެ މަތީގައި ބެހެއްޓުމަށް އެދިފައިވެއެވެ.

މި މައްސަލައާ ގުޅިގެން އެމްޕީއެލްގެ މީޑިއާ އޮފިޝަލް ވިދާޅުވީ އެފަދަ މައުލޫމާތެއް ލިބިފައިނުވާ ކަމަށާއި، މެމޯއަކުން އަންގާފައިނުވާ ކަމަށެވެ. އަދި މައުލޫމާތު ސާފުކުރުމަށްފަހު ހާމަ ކުރާނެ ކަމަށް އޭނާ ވިދާޅުވިއެވެ.