2022 ވަނަ އަހަރު ދުނިޔޭގެ އެކި ކަންކޮޅުތަކުގައި މަރުވި ކުޑަކުދިން އަދަދު ވަނީ 4.9 މިލިއަނަށް ތިރިވެފައި: އދ
ނިސްބަތުން މަރުވާ ކުޑަކުދިންގެ އަދަދު މަދުވުމުގައި ކުރިއެރުންތަކެއް ލިބުނު ނަމަވެސް، ކޮންމެ އަހަރަކު ވެސް އެތައް މިލިއަން އާއިލާއަކަށް ދަރިއަކު ގެއްލުމުގެ ހިތާމަ އަދިވެސް ކުރިމަތިވޭ
މަރުވާ ކުޑަކުދިންގެ އަދަދު ނިސްބަތުން ދަށްކުރެވުމަކީ ލިބުނު ކާމިޔާބީއެއް ކަމަށް އދ.އިން ބުނޭ
2022 ވަނަ އަހަރު ދުނިޔޭގެ އެކިކަންކޮޅުތަކުން މަރުވި ފަސްއަހަރުން ދަށުގެ ކުޑަކުދިންގެ އަދަދު 4.9 މިލިއަނަށް ދަށަށް ގޮސްފައިވާ ކަމަށް އދ.ގެ އިންޓަރ އެޖެންސީ ގްރޫޕް ފޮރ ޗައިލްޑް މޯޓަލިޓީ އެސްޓިމޭޝަން (ޔޫއެން އައިޖީއެމްއީ) އިން ބުދަ ދުވަހު އާންމުކުރި އެންމެ ފަހުގެ އަންދާޒާތަކުން ދައްކައިފިއެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ)ގެ ޑިރެކްޓަރ ޖެނެރަލް ޓެޑްރޯސް އަދަނޮމް ގެބްރިޔޭސުސް ވިދާޅުވީ، އަހަރެއްގެ މައްޗަށް ނިސްބަތުން މަރުވާ ކުޑަކުދިންގެ އަދަދު މަދުވުމުގައި ކުރިއެރުންތަކެއް ލިބުނު ނަމަވެސް، ކޮންމެ އަހަރަކު ވެސް އެތައް މިލިއަން އާއިލާއަކަށް ދަރިއަކު ގެއްލުމުގެ ހިތާމަ އަދިވެސް ކުރިމަތިވާ ކަމަށެވެ.
އެ ރިޕޯޓުން ދައްކާ ގޮތުގައި 2000 ވަނަ އަހަރުން ފެށިގެން ދުނިޔޭގެ ފަސް އަހަރުން ދަށުގެ ކުދިން މަރުވާ ނިސްބަތް 51 ޕަސެންޓް ދަށަށް ގޮސްފައިވާއިރު، މިއަދު ވެސް ވަރަށް ދަތި ހާލުގައި ވަރަށްގިނަ ކުދިން ދިރިއުޅެމުން އެބަދެއެވެ.
ކުޑަ އަދި މެދު ފަންތީގެ އާމްދަނީ ލިބޭ ބައެއް ގައުމުތަކުން މިކަމުގައި ބޮޑު ކުރިއެރުމެއް ހޯދާފައިވާއިރު، ކުރިއެރުން ލިބޭނީ ކުޑަކުދިންގެ ސިއްހަތާއި ދުޅަހެޔޮކަން ހިމެނޭ ގޮތަށް ޕްރައިމަރީ ހެލްތު ކެއާއަށް ވަސީލަތްތައް ކަނޑައެޅުމުން ކަން ދައްކުވައިދެއެވެ.
މިސާލަކަށް ކެމްބޯޑިއާ، މަލާވީ، މޮންގޯލިއާ އަދި ރުވާންޑާއިން 2000 ވަނަ އަހަރުން ފެށިގެން ފަސް އަހަރުން ދަށުގެ ކުދިންމަރުވާ މިންވަރު 75 އިންސައްތައަށްވުރެ ދަށްވެފައިވާކަމަށް އެ ރިޕޯޓުގައި ފާހަގަކޮށްފައިވެއެވެ.
ޔޫއެން ޗިލްޑްރަންސް ފަންޑް (ޔުނިސެފް)ގެ އެގްޒެކެޓިވް ޑިރެކްޓަރު ކެތަރިން ރަސެލް ވިދާޅުވި ގޮތުގައި މި އަދަދުތަކުގެ ފަހަތުގައި މިޑްވައިފުންނާއި ހުނަރުވެރި ސިއްހީ ހިދުމަތްތެރިން، ރައްކާތެރިކަމާއެކު އަލަށް އުފަންވާ ކުދިން ސަލާމަތް ކުރުމަށް މައިންނަށް އެހީތެރިވެދިނުމާއި ސިއްހީ ހިދުމަތްތެރިން ކުޑަކުދިންނަށް ނުރައްކާތެރި ބަލިތަކުން ކުޑަކުދިންނަށް ވެކްސިން ދީ ރައްކާތެރިކޮށްދޭ ސިއްހީ ހިދުމަތްތެރިންނާއި އާއިލާތަކަށް އެހީތެރިކަން ފޯރުކޮށްދިނުމަށް ގޭގެއަށް ޒިޔާރަތްކުރާ ކޮމިއުނިޓީ ހެލްތު ވޯކަރުންގެ ވާހަކަތައް ހިމެނެއެވެ.
އދ.ގެ ރިޕޯޓްގައި ފާހަގަކޮށްފައިވާ ގޮތުން ދުނިޔޭގައި ކުޑަކުދިން މަރުވާ ނިސްބަތް މިއަށްވުރެވެސް ދަށްކުރެވޭނީ ރަނގަޅު ވެކްސިން ޖެހުމާއި، އުފަންވާއިރު ހުނަރުވެރި ޞިއްޙީ ޚިދުމަތްތެރިން ލިބުމާއި، ކުޑައިރުގެ ބަލިތައް ދެނެގަތުމާއި، ފަރުވާ ދިނުން ފަދަ ޒަރޫރީ، އަގުހެޔޮ އިންޓަރވެންޝަންތައް އިތުރު ކުރެވިގެންނެވެ.
އަދި ޕްރައިމަރީ ހެލްތް ކެއާ ސިސްޓަމްތަކުގެ ތެރެއަށް ސިއްހީ ޚިދުމަތްތޭ މަރުކަޒުތައް އިންޓަގްރޭޓްކޮށް، އިންސާފުވެރިކަމާއެކު މުވައްޒަފުންނަށް މުސާރަ ދީ، ރަނގަޅަށް ތަމްރީނުކުރެވި، އެންމެ މަތީ ފެންވަރުގެ ފަރުވާ ދެވޭނެ ވަސީލަތްތައް ހުންނަން ޖެހޭ ކަމަށް ރިޕޯޓުގައި ފާހަގަ ކޮށްފައި ވެއެވެ.
