ފަލަސްތީނަށް އދ ގެ ފުރިހަމަ މެމްބަރުކަން ދޭން ފެންކަމަށް އދ ގެ އާންމު މަޖިލީހުން ފާސްކޮށްފިއެވެ.
ރާއްޖެއިން ވަނީ މި ގަރާރު ކޯ ސްޕޮންސަރކޮށްފައެވެ. އދ ގެ އާންމު މަޖިލީހުން ފަލަސްތީނަކީ އދ ގެ ފުރިހަމަ މެމްބަރު ގައުމެއްކަމަށް ކަނޑައެޅުމަށް ފެންނަކަމަށް ފާސްކުރުމުން އދ ގެ މެމްބަރު ގައުމެއްކަމަށްވުމަށް ޝަރުތުހަމަވާ ގައުމެއްގެ ގޮތުގައި ފަލަސްތީން ކަނޑައެޅިގެންދިޔައީއެވެ. އަދި މިއާއެކު އދ ގެ ސަލާމަތީ މަޖިލީހަށް ފަލަސްތީނަކީ އދ ގެ މެމްބަރު ގައުމެއްގެ ގޮތުގައި ކަނޑައެޅުމުގެ މައްސަލަ އދ ގެ އާންމު މަޖިލީހުގެ ނިންމުމާ އެއްގޮތަށް ކަނޑައެޅުމަށް ހުށަހެޅޭނެއެވެ.
އދ ގެ އާންމު މަޖިލީހުގައި މިކަމަށް ނެގުނު ވޯޓުގައި 193 ގައުމުގެ ތެރެއިން 143 ގައުމުން ވަނީ އދ ގެ ފުރިހަމަ މެމްބަރުކަން ފަލަސްތީނަށް ދިނުމަށް ތާއީދުކޮށްފައެވެ. އެމެރިކާ އާއި އިސްރާއީލު ހިމެނޭ ގޮތަށް 9 ގައުމަކުން އެކަމަށް ދެކޮޅު ހެދިއިރު 25 ގައުމަކުން ވަކި ކޮޅަކަށް ވޯޓެއް ނުދެއެވެ.
އދ ގެ ފުރިހަމަ މެމްބަރު ގައުމެއްގެ ގޮތުގައި ފަލަސްތީނު ބަލައިގަތުމަށް ފެންނަކަމަށް އދ ގެ އާންމު މަޖިލީހުން ފާސްކޮށްފައިމިވަނީ މިދިޔަ މަހު ފަލަސްތީނަކީ ވަކި ދައުލަތެއްގެ ގޮތުގައި ބަލައިގަތުމަށް އދ ގެ ސެކިޔުރިޓީ މަޖިލީހުގައި ނެގި ވޯޓު އެމެރިކާއިން ވީޓޯ ކޮށްފައިވަނިކޮށެވެ.
އދ ގެ އާންމު މަޖިލީހުގެ މިގަރާރާއެކު އދ ގެ ފުރިހަމަ މެމްބަރު ގައުމަކަށްވުމަށް ހުށަހެޅޭނެއެވެ. އަދި އެއާއެއްގޮތަށް އދ ގެ ސަލާމަތީ މަޖިލީހުން ނިންމުމަށްވެސް އެދެވޭނެއެވެ.
އދ ގެ އާންމު މަޖިލީހުން މިގޮތަށް ފާސްކުރިނަމަވެސް އަދި ފަލަސްތީނަކަށް އދ ގެ ފުރިހަމަ މެމްބަރު ގައުމަކަށް ނުވެއެވެ. ނަމަވެސް މިއަހަރުގެ ސެޕްޓެމްބަރ މަހުން ފެށިގެން މިހާރު ލިބެމުންދާ ހައްގުތަކަށްވުރެ އިތުރު ހައްގުތަކެއް ފަލަސްތީނަށް ލިބިގެންދާނެއެވެ. އެގޮތަށް އދ ގެ އާންމު މަޖިލީހުގެ ހޯލުން ފަލަސްތީނަށް ސީޓެއް ލިބިގެންދާނެއެވެ. ނަމަވެސް އެއްވެސް ކަމެއްގައި އަދި ވޯޓެއް ނުދެވޭނެއެވެ.
ފަލަސްތީނު މިހާތަނަށް އޮތީ އދ ގެ އޮބްޒަރވަރ ގައުމެއްގެ ގޮތުގައެވެ. ފަލަސްތީނުން އދ ގެ ފުރިހަމަ މެމްބަރު ގައުމަކަށްވުމަށް ބާރު އަޅަން ފަށާފައިވަނީ ޣައްޒާގައި އިސްރާއީލުން ހިންގަމުންދާ ގަތުލު އާންމާއި ހުޅަނގު އައްސޭރީގައި ޔަހޫދީ އާބާދުކުރުންތައް އިތުރުކުރަން ފަށާފައިވާތީއެވެ.
