އިސްރާއީލުން ޣައްޒާއަށް ދެމުންދާ ހަމަލާތަކާ ގުޅިގެން ކާބޯތަކެއްޗަށް ދަތިވެފައިވާ ޣައްޒާގައި ހާރުކެވޭނެ ގޮތެއް ރޯދަ ވީއްލޭނެ ގޮތެއް ނެތި، 2000އްހާ ސިއްހީ ޚިދުމަތްތެރިން ހަރަކާތްތެރިވަމުންދާ ކަމަށް އޮފިޝަލުން ބުނެފިއެވެ.
ޣައްޒާގެ ސިއްހަތާބެހޭ ވުޒާރާއިން ކުރި އިއުލާނެއްގައި ބުނެފައިވަނީ، ޣައްޒާގެ އުތުރުގައި މަސައްކަތްކުރާ 2000 ސިއްހީ ޚިދުމަތްތެރިން ރަމަޟާން މަސް ފެށީ ހާރުކެވޭނެ ގޮތެއް، އަދި ރޯދަވީއްލޭނެ ގޮތެއް ނެތިކަމަށެވެ.
އެ މިނިސްޓްރީގެ ތަރުޖަމާނު އަޝްރަފް އަލްޤުދްރާ ނެރުއްވި ބަޔާނެއްގައި ވިދާޅުވީ، ޣައްޒާގެ އުތުރުގައި މެޑިކަލް ޓީމުތަކުން 24 ގަޑިއިރު މަސައްކަތްކުރަމުން އަންނަކަމަށާއި، ކާނެ އެއްޗެއް ނެތްކަމަށެވެ.
ޣައްޒާގެ އުތުރުގެ މެޑިކަލް ޓީމުތަކުގެ މެމްބަރުންގެ ހާލަތު ވަނީ ފުދޭވަރަށް ކާނާ ނުލިބުމުގެ ސަބަބުން ވަރަށް ބޮޑަށް ގޯސްވެފަ. ޣައްޒާގެ އުތުރުގައި 2000ށްވުރެ ގިނަ ސިއްހީ ޚިދުމަތްތެރިން ރަމަޟާން މަސް ފެށީ ހާރުކެވޭނެ، އަދި ރޯދަވީއްލޭނެ ގޮތެއް ނެތި.ތަރުޖަމާނު އަޝްރަފް އަލްޤުދްރާ
މެޑިކަލް ޓީމުތަކަށް އެމީހުންގެ މަސައްކަތްތައް ކުރިއަށްގެންދެވޭނެ ގޮތަށް ރެޑީމޭޑް ކެއުން ފޯރުކޮށްދިނުމަށް ބައިނަލްއަގުވާމީ ރިލީފް ޖަމިއްޔާތަކަށް އޭނާ ގޮވާލެއްވިއެވެ.
މިއަހަރުގެ ރަމަޟާން މަސް ފެށިފައިވަނީ އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައަށް 160 ވަނަ ދުވަހަށް ވެފައި ވަނިކޮށެވެ.
އިޒްރޭލުން އަޅާފައިވާ ފިޔަވަޅުތަކުގެ ސަބަބުން ޣައްޒާގެ ރައްޔިތުންނަށް (ޚާއްސަކޮށް ޣައްޒާ ސިޓީއާއި އުތުރުގެ ގަވަރުނަރޭޓްތަކުގައި) ކާބޯތަކެތީގެ ދަތިކަމާއި، ފެނާއި ބޭހާއި ތެލުގެ ސަޕްލައި ދަށްވެ، އެ ސަރަހައްދުގެ ރައްޔިތުން ތިބީ ހައިހޫނުކަމުގެ ތެރޭގައެވެ.
ފަލަސްތީނުގެ ހަމާސް ޖަމާއަތުން އިސްވެ އޮކްޓޯބަރު މަހުގެ 7 ވަނަ ދުވަހު ޣައްޒާއަށް ދިން ނުރައްކާތެރި އަސްކަރީ ހަމަލައެއްގައި 1200އެއްހާ މީހުން މަރުވި ފަހުން އިސްރާއީލުން ވަނީ ޣައްޒާއަށް ނުރައްކާތެރި އަސްކަރީ ހަމަލަތައް ދޭންފަށައިފައެވެ.
އެ ހަމަލަތަކުގައި މިހާތަނަށް ފަލަސްތީނުގެ ގާތްގަނޑަކަށް 31،000ށްވުރެ ގިނަމީހުން ޝަހީދުވެފައިވާއިރު، އޭގެތެރޭގައި ގިނައީ އަންހެނުންނާއި ކުޑަކުދިންނެވެ.
އިސްރާއީލުގެ ހަމަލަތަކުގެ ސަބަބުން ޣައްޒާގެ އާބާދީގެ 85 އިންސައްތަ މީހުން ގެދޮރު ގެއްލިފައިވާއިރު، ކާބޯތަކެއްޗާއި ސާފު ފެނާއި ބޭސް ފަރުވާ ކުރެވޭނެ ގޮތެއް ޣައްޒާގައި މިހާރަކު ނެތެވެ. ޣައްޒާގެ އިންފްރާސްޓްރަކްޗަރގެ 60 އިންސައްތަ ވަނީ ހަލާކުވެ ނުވަތަ ބޭނުން ނުކުރެވޭވަރުވެފައި ކަމަށް އދ.ން ބުނެއެވެ.
ބައިނަލްއަގުވާމީ ކޯޓް އޮފް ޖަސްޓިސްގައި އިސްރާއީލުގެ މައްޗަށް ވަނީ ޖަރީމާ ހިންގުމުގެ ތުހުމަތުކޮށްފައެވެ. މިދިޔަ ޖެނުއަރީ މަހު އެ ކޯޓުން ނެރުނު ވަގުތީ ހުކުމެއްގައި ވަނީ، ޣައްޒާގައި ދިރިއުޅޭ އާންމުންނަށް އިންސާނީ އެހީތެރިކަން ފޯރުކޮށްދިނުމަށްޓަކައި ޖިނާއީ އަމަލުތައް ހުއްޓާލައި ފިޔަވަޅުތައް އެޅުމަށް ތެލްއަވީވަށް އަންގާފައެވެ.
