ތަރާވީޙް ނަމާދަށް، އަޤްޞާ މިސްކިތަށް ދިޔަ މުސްލިމުންނަށް ހުރަސްއެޅުމުން އދ.އިން ކަންބޮޑުވުން ފާޅުކޮށްފި
12 މާރިޗު 2024 | އަންގާރަ 07:04އަލްއަޤްޞާ މިސްކިތަކީ މުސްލިމުންގެ ތިންވަނައަށް އެންމެ މާތް ތަނެވެ.
ޤުދުސްގައި ހުންނަ އަލް އަޤްޞާ މިސްކިތް
ތަރާވީޙް ނަމާދުކުރުމަށް، އަޤްޞާ މިސްކިތަށް ދިޔަ ފަލަސްތީނުގެ މުސްލިމުންނަށް އިސްރާއީލް ސިފައިން ހުރަސްއެޅުމުން އދ.އިން ކަންބޮޑުވުން ފާޅުކޮށްފިއެވެ.
ބަރަކާތްތެރި ރަމަޟާން މަސް ފެށުމާއެކު ފަލަސްތީނުގެ އެތައްހާސް ރައްޔިތުންވަނީ ތަރަވީޙް ނަމާދަށް އަޤްޞާ މިސްކިތަށް ޖަމާވާން މަސައްކަތްކޮށްފައެވެ. އެހެންނަމަވެސް އިސްރާއީލު ސިފައިން ވަނީ އެކަމަށް ހުރަސްއަޅާފައެވެ. އަދި މަދުމީހަކަށް ނޫނީ މިސްކިތަށް ވަނުމަށް ފުރުޞަތު ދީފައެއް ނުވެއެވެ.
އިސްރާއީލްގެ މި ހަރުކަށި އަމަލުތަކާ ގުޅިގެން އދ.ގެ ތަރުޖަމާނު ސްޓެފަން ޑުޖާރިކް ވިދާޅުވީ ގުދުސްގެ ދީނީ މުޤައްދަސް މިފަދަ މާތް ތަންތަނުގައި އެއްވެސް ކަހަލަ ފިތުނައެއް އުފައްދައިފާނެތީ އަބަދުވެސް އޭނާ ކަންބޮޑުވެވަޑައިގަންނަވާ ކަމަށެވެ. އަދި އެންމެވެސް ތަބަޢަވާންޖެހޭ ހަރުދަނާ އުޞޫލުތަކެއް ހުރިކަން އޭނާ ހަނދާން ކޮށްދެއްވިއެވެ.
އަލްއަޤްޞާ މިސްކިތަކީ މުސްލިމުންގެ ތިންވަނައަށް އެންމެ މާތް ތަނެވެ. ޔަހޫދީން އެ ސަރަހައްދަށް ޓެމްޕަލް މައުންޓްގެ ނަމުން ކިޔަނީ އެއީ ޒަމާނުއްސުރެ ޔަހޫދީންގެ ދެ މިސްކިތެއް ހުރި ތަނެއް ކަމަށް ބުނެއެވެ.
އަލްއަޤްޞާ އޮންނަ އިރުމަތީ ގުދުސް އިސްރާއީލުން ހިފާފައިވަނީ 1967 ވަނަ އަހަރުގެ ޢަރަބި-އިސްރާއީލު ހަނގުރާމައިގައެވެ. އަދި 1980 ވަނަ އަހަރު އިސްރާއީލުން މުޅި ސިޓީ ހިފާފައިވާއިރު، އެއީ ބައިނަލްއަގްވާމީ މުޖުތަމައުން އެއްގޮތަކަށްވެސް ބަލައިގެންފައި ނުވާ އަދި ހުރިހާ ޤާނޫނުތަކާވެސް ޚިލާފު އަމަލެކެވެ.
މިދިޔަ އޮކްޓޫބަރު މަހު ހަމާސް ޖަމާއަތުން ބޯޑަރު ހުރަސްކޮށް ދިން ހަމަލާއަށް ފަހު އިސްރާއީލުން ޣައްޒާއާ ދެކޮޅަށް ނުރައްކާތެރި އަސްކަރީ ހަމަލާތަކެއް ދޭން ފެށުމާ އެކު ހުޅަނގު އައްސޭރީގެ އެކި ސަރަހައްދުތަކުގައި ވަނީ ނުތަނަވަސްކަން އުފެދިފައެވެ.
އިސްރާއީލުން ޣައްޒާއަށް ދެމުންދާ ހަމަލާތަކުގައި މިހާތަނަށް ފަލަސްތީނުގެ ގާތްގަނޑަކަށް 31،000 މީހުނަށްވުރެ ގިނަމީހުން ޝަހީދުވެފައިވާއިރު، އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ.
އިސްރާއީލު ހަނގުރާމައިގެ ސަބަބުން ޣައްޒާގެ އާބާދީގެ 85 އިންސައްތަ މީހުން ގެދޮރު ގެއްލިފައިވާއިރު، ކާބޯތަކެއްޗާއި ސާފު ފެނާއި ބޭސް ފަރުވާ ކުރެވޭނެގޮތެއްވެއް ޣައްޒާގައި މިހާރުނެތެވެ. ޣައްޒާގެ އިންފްރާސްޓްރަކްޗަރގެ 60 އިންސައްތަ ވަނީ ހަލާކުވެ ނުވަތަ ބޭނުން ނުކުރެވޭވަރުވެފައި ކަމަށް އދއިން ބުނެއެވެ.
ބައިނަލްއަގްވާމީ ކޯޓް އޮފް ޖަސްޓިސްގައި އިސްރާއީލުގެ މައްޗަށް ވަނީ ޖަރީމާހިންގުމުގެ ތުހުމަތުކޮށްފައެވެ. މިދިޔަ ޖެނުއަރީ މަހު އެކޯޓުން ނެރުނު ވަގުތީ ހުކުމެއްގައި ވަނީ ޣައްޒާގައި ދިރިއުޅޭ އާންމުންނަށް އިންސާނީ އެހީތެރިކަން ފޯރުކޮށްދިނުމަށް ޖިނާއީ އަމަލުތައް ހުއްޓާލައި ފިޔަވަޅުތައް އެޅުމަށް ތެލްއަވީވްއަށް އަންގާފައެވެ.
