ބަރަކާތްތެރި ރަމަޟާން މަހަށް ނިއުޔޯކްގެ އެތައް ހާސް މުސްލިމުންނެއް މަރުހަބާ ކިޔައިފިއެވެ.
ރަމަޟާން މަހަށް މަރުޙަބާ ކިޔުމުގެ ގޮތުން ސިމްބޮލިކް ޓައިމްސް ސްކެއާއަށް ގިނަޢަދެއްގެ މުސްލިމުން އެއްވެ، އެމީހުންގެ މިއަހަރުގެ ފުރަތަމަ ތަރާވީހު ނަމާދު ރޭ އެތާންގައި ވަނީ ކޮށްފައެވެ. ރަމަޟާން މަހުގެ ކުރިއަށްއޮތް ރޭތަކުގައިވެސް ތަރާވީޙް ނަމާދު ކުރުމުގެ އިންތިޒާމް ވަނީ އެމެރިކާގެ އެކި ސިޓީތަކުގައި ދިރިއުޅޭ ގިނަޢަދަދެއްގެ މުސްލިމުން ހަމަޖައްސާފައެވެ.
އެއްވި ހުރިހާ މުސްލިމުން ނަމާދަށްފަހު ވަނީ، ފަސް މަހަށްވުރެ ގިނަ ދުވަހު އިސްރާއީލުގެ ޙަމަލާތައް ދެމުން އަންނަ ޣައްޒާއަށް ހެޔޮ ދުޢާކޮށްފައެވެ.
މީގެ އިތުރުން ވެރިރަށް ވޮޝިންޓަނާ ބައިގަޑިއިރު ދުރުގައި ހުންނަ އެމެރިކަން ރިލިޖަސް ސެންޓަރުގައި ވެސް މީހުން ވަނީ ފުރަތަމަ ތަރާވީހު ކޮށްފައެވެ.
ނަމާދުގެ ވަގުތުގައި މިސްކިތުގެ ބޭރު ގޯތިތެރެއާއި މުޅި ހިސާބު ވަނީ މުސްލިމުންގެ ބޮޑުޖަމާޢަތުން ފުރިފައެވެ.
އެމެރިކާގެ ހުރިހާ މުސްލިމުންވެސްވަނީ ރޭ ތަރާވީޙް ނަމާދަށްފަހު، 2023 ވަނަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން އިސްރާއީލުގެ ނުރައްކާތެރި ބޮމުގެ ހަމަލާތަކާ ކުރިމަތިލާން ޖެހިފައިވާ ޣައްޒާގެ ރައްޔިތުންނަށް ޓަކައި ހުރިހާ މުސްލިމުންނަށް ޚާއްޞަ ދުޢާއެއް ކޮށްފައެވެ.
އިސްރާއީލްގެ ހަމަލާތަކުގައި ފަލަސްތީނުގެ ގާތްގަނޑަކަށް 31،000 އަށްވުރެ ގިނަމީހުން ޝަހީދުވެފައިވާއިރު، އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ.
އޮކްޓޯބަރު މަހުގެ 7 ވަނަ ދުވަހުން ފެށިގެން އިސްރާއީލުގެ ގަތުލުއާންމުގެ ސަބަބުން ޣައްޒާގައި 31،000 އަށްވުރެ ގިނަމީހުން ޝަހީދުވެފައިރު، އިތުރު 72،524 މީހުންނަށް އެކިވަރުގެ އަނިޔާ ލިބިފައިވާކަމަށް ފަލަސްތީނުގެ ސިއްހީ އިދާރާތަކުން ވަނީ ބުނެފައެވެ.
އިސްރާއީލުން ވަނީ ޣައްޒާއަށް ކާބޯތަކެއްޗާއި އިންސާނީ އެހީ ފޯރުކޮށްދިނުމަށް ހުރަސްއަޅައި، ޚާއްސަކޮށް ޣައްޒާގެ އުތުރުގެ ރައްޔިތުން ބަނޑުހައިހޫނުކަމުގެ ތެރެއަށް ވައްޓާލައިފައެވެ.
އިސްރާއީލު ހަނގުރާމައިގެ ސަބަބުން ޣައްޒާގެ އާބާދީގެ 85 އިންސައްތަ މީހުންނަށް ކާބޯތަކެއްޗާއި ސާފު ފެނާއި ބޭހުގެ ދަތިކަން ބޮޑުވެ ގެދޮރު ގެއްލިފައިވާއިރު، އެންކްލޭވްގެ އިންފްރާސްޓްރަކްޗަރގެ 60 އިންސައްތަ ވަނީ ހަލާކުވެ ނުވަތަ ބޭނުން ނުކުރެވޭވަރުވެފައި ކަމަށް އދ.ން ބުނެއެވެ.
ބައިނަލްއަގުވާމީ ކޯޓް އޮފް ޖަސްޓިސްގައި އިޒްރޭލުގެ މައްޗަށް ވަނީ ޖަރީމާހިންގުމުގެ ތުހުމަތުކޮށްފައެވެ. މިދިޔަ ޖެނުއަރީ މަހު އެ ކޯޓުން ނެރުނު ވަގުތީ ހުކުމެއްގައި ވަނީ ޣައްޒާގައި ދިރިއުޅޭ އާންމުންނަށް އިންސާނީ އެހީތެރިކަން ފޯރުކޮށްދިނުމަށް ޖިނާއީ އަމަލުތައް ހުއްޓާލައި ފިޔަވަޅުތައް އެޅުމަށް ތެލްއަވީވަށް އަންގާފައެވެ.
