‎‏ޣައްޒާގައި ފަލަސްތީނުގެ އޮތޯރިޓީ އުފައްދަން އިސްރާއީލުގެ ރައްޔިތުން ދެކޮޅު ކަމަށް ނަތަންޔާހޫ ބުނެފި‏

ޣައްޒާގައި އިސްރާއީލުން ކުރަމުންގެންދާ އިންސާނިއްޔަތާ ޚިލާފު ހަނގުރާމަ ނިމުމުން ފަލަސްތީނުގެ އޮތޯރިޓީއެއް އުފައްދައި އެއޮތޯރިޓީގެ ބެލުމުގެ ދަށަށް ގެނައުމަށް އިސްރާއީލުގެ ބޮޑު އަޣުލަބިއްޔަތެއް ދެކޮޅު ކަމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ބުނެފިއެވެ.

ޕޮލިޓިކޯ ނިއުސް ވެބްސައިޓަށް ދިން އިންޓަވިއުއެއްގަ ނަތަންޔާހޫ ބުނީ އިސްރާއީލްގެ ގިނަ ރައްޔިތުން އޭނާގެ ސިޔާސަތުތަކަށް ތާއީދުކުރާ ކަމަށާއި، ހަމާސް ނައްތާލުމަށްފަހު ވެސް ޣައްޒާގެ ހިންގުން ފަލަސްތީނުގެ އަތްމައްޗަށް ދޫކޮށްލައިފިނަމަ ‎‎އެގައުމުގެ ކުޑަކުދިން ޓެރަރިޒަމަށް އަހުލުވެރިކޮށް ޓެރަރިޒަމަށް ފައިނޭންސް ކުރާ އޮތޯރިޓީއަކަށް އެ އޮތޯރިޓީ ވާނެ ކަމަށެވެ.‎

‎ނަތަންޔާހޫ އިތުރަށް ބުނީ ފަލަސްތީނުގެ ދައުލަތެއްގެ އުފައްދަން ކުރާ މަސައްކަތަށް އިސްރާއީލުން ތާއީދު ނުކުރާ ކަމަށެވެ.‎

‎އިސްރާއީލުގެ ގިނަ މީހުންނަށް ވިސްނެނީ އެކަން ކޮށްފިނަމަ އިސްރާއީލަށް އޮންނާނީ އޮކްޓޯބަރު މަހުގެ 7 ވަނަ ދުވަހު ހިނގި ‎‎ހަމަނުޖެހުން ތަކުރާރުވުން ކަމަށާއި އެއީ އިސްރާއީލަށާއި ފަލަސްތީނަށާއި އަދި މެދުއިރުމަތީގެ ސުލްހައިގެ މުސްތަގުބަލަށް ވެސް ‎‎އޮތް ވަރަށްބޮޑު ގޯސް ކަމެއް ކަމަށް ނަތަންޔާހޫ ބުންޏެވެ.

‎މިއީ ފަލަސްތީނު އޮތޯރިޓީއަށް ޣައްޒާ ހިންގުމުގެ ހުއްދަ ދިނުމާ ދެކޮޅަށް ނަތަންޔާހޫ ދެކޮޅު ހެދި ފުރަތަމަ ފަހަރެއް ނޫނެވެ.‎

‎ނަތަންޔާހޫ އިތުރަށް ބުނީ އެއީ ހަމައެކަނި އޭނާގެ ޕްރައިވެޓް ޕޮލިސީތަކެއް ނޫން ކަމަށާއި، އެއީ އިސްރާއީލުގެ ބޮޑު ‎‎އަޣުލަބިއްޔަތަކުން ތާއީދުކުރާ ސިޔާސަތުތަކެއް ކަމަށެވެ.‎

ނަތަންޔާހޫގެ މިފަދަ ވާހަކަތަކަށް އެމެރިކާއިން ދެކޮޅު ހެދި ނަމަވެސް ތަޖުރިބާކާރުން ވަނީ އެމެރިކާގެ ރާގު ބަދަލުވެގެން ދިޔައީ ކުރިއަށް އޮތް ނޮވެމްބަރު މަހު ބާއްވާ ރިޔާސީ އިންތިހާބުގައި ‎‎ރައީސް ކަމަށް ހަނގުރާމައިގެ ޖަރީމާތަކުގެ ޣައްޒާއިން ނުކުންނަ ފޮޓޯތަކާ އެއްގޮތަށް ‎‎ބައިޑަން އިސްރާއީލަށް ކަނުލައި ތާއީދު ކުރެއްވުމުގެ ސަބަބުން އޭނާގެ މަގުބޫލުކަން، ހާއްސަކޮށް މުސްލިމުންގެ އަޣުލަބިއްޔަތު އޮންނަ ‎‎ސްޓޭޓްތަކުގައި ދަށަށް ދާނެ ކަމުގެ ބިރު އޮތުމުން ކަމަށް ބުނެފައެވެ.‎

‎އިސްރާއީލުން ދެ ދައުލަތުގެ ހައްލަކަށް ހުރަސް އެޅުމާއި އެކަމަށް މަގުފަހިވާ ފަދަ ‎‎މަޝްވަރާތަކަށް އެގައުމުގެ ހުޅަނގުގެ ބައިވެރިންގެ ފާޑުކިޔުންތައް ވެސް އަމާޒުވެފައިވާއިރު، މެދުއިރުމައްޗަށް ހަމަޖެހުން ލިބޭނީ މި ހައްލު ‎‎ތަންފީޒުކޮށް އިސްރާއީލާއެކު ފަލަސްތީނަށް މިނިވަން ދައުލަތެއް ގާއިމުކުރެވިގެން ކަމަށް އެމެރިކާއިން ދެކެއެވެ.‎

‎ފަލަސްތީނުގެ ހަމާސް ޖަމާއަތުން އިސްނަގައިގެން އޮކްޓޯބަރު މަހުގެ 7 ވަނަ ދުވަހު ޣައްޒާއަށް ދިން ނުރައްކާތެރި އަސްކަރީ ޙަމަލާއެއްގައި ‎‎1200 އެއްހާ މީހުން މަރުވި ފަހުން އިސްރާއީލުން ވަނީ ޣައްޒާއަށް ނުރައްކާތެރި އަސްކަރީ ޙަމަލާތަކެއް ދޭން ފަށައިފައެވެ.‎

‎އެ ހަމަލާތަކުގައި މިހާތަނަށް ފަލަސްތީނުގެ ގާތްގަނޑަކަށް 31،000 މީހުނަށްވުރެ ގިނަމީހުން ޝަހީދުވެފައިވާއިރު، އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ.‎

‎އިސްރާއީލު ހަނގުރާމައިގެ ސަބަބުން ޣައްޒާގެ އާބާދީގެ 85 އިންސައްތަ މީހުން ގެދޮރު ގެއްލިފައިވާއިރު، ‎‎ކާބޯތަކެއްޗާއި ސާފު ފެނާއި ބޭސް ފަރުވާ ކުރެވޭނެގޮތެއްވެއް ޣައްޒާގައި މިހާރުނެތެވެ. ޣައްޒާގެ އިންފްރާސްޓްރަކްޗަރގެ 60 ‎‎އިންސައްތަ ވަނީ ހަލާކުވެ ނުވަތަ ބޭނުން ނުކުރެވޭވަރުވެފައި ކަމަށް އދއިން ބުނެއެވެ.‎

‎ބައިނަލްއަގްވާމީ ކޯޓް އޮފް ޖަސްޓިސްގައި އިސްރާއީލުގެ މައްޗަށް ވަނީ ޖަރީމާހިންގުމުގެ ތުހުމަތުކޮށްފައެވެ. މިދިޔަ ޖެނުއަރީ މަހު އެކޯޓުން ނެރުނު ‎‎ވަގުތީ ހުކުމެއްގައި ވަނީ ޣައްޒާގައި ދިރިއުޅޭ އާންމުންނަށް އިންސާނީ އެހީތެރިކަން ފޯރުކޮށްދިނުމަށް ޖިނާއީ އަމަލުތައް ‎‎ހުއްޓާލައި ފިޔަވަޅުތައް އެޅުމަށް ތެލްއަވީވްއަށް އަންގާފައެވެ.‎