ހިކި، އަނަރޫފަވަމުން ދިޔަ ޢާބާދީތައް މިއަދު ދަނީ އާދަޔާ ޚިލާފަށް ފަލަވަމުން... އިންޒާރުގެ ވަރުގަދަ ރަނގަބީލެއް!

ހަށިގަނޑުގެ އިސްކޮޅާއި ޢުމުރަށް ބަލާއިރު ހުންނަންޖެހޭ މިންވަރަށް ވުރެ އާދަޔާ ޚިލާފަށް ފަލަވުން ނުވަތަ އޮބީސިޓީ އަކީ މިއަދު ދުނިޔޭގެ އެކި ކަންކޮޅުތަކުން ގިނަ ޢަދަދެއްގެ ބަޔަކު ތަޙައްމަލު ކުރަމުންދާ ކަމެކެވެ. އޮބީސިޓީއަކީ ބަލިމަޑުކަމެކޭވެސް ބުނެވިދާނެއެވެ. އިސްކޮޅާއި ބަރުދަން އަޅާ ކިޔައިގެން ހަދާ ބޮޑީ މާސް އިންޑެކްސް (ބީއެމްއައި) ޗާޓުން 30.0 ޕޮއިންޓަށް ވުރެ މަތިން ނަތީޖާ ލިބޭ ކޮންމެ މީހަކީ އޮބީސް މީހެކެވެ. ނުވަތަ ޢުމުރާއި އިސްކޮޅަށް އެކަށޭނަ މިންވަރަށް ވުރެ ފަލަ މީހެކެވެ. މިއީ ވަކި ޢުމުރަކަށް އޮތް ކަމެއް ނޫނެވެ. ކުޑަ ކުދިންގެ ޢާބާދީގައިވެސް އޮބީސިޓީގެ މައްސަލަ އުފެދިފައި ވަނީ ކަންބޮޑުވާ ދަރަޖައަކަށެވެ.

ދުނިޔޭގެ ޞިއްޙަތު ޖަމިއްޔާ (ޑަބްލިއުއެޗްއޯ) އާއި ބައިނަލްއަޤުވާމީ ދިރާސާވެރިންގެ ގުރޫޕަކުން ދާދި ފަހުން ޢާންމުކޮށްފައިވާ އަންދާޒާތައް ދައްކާ ގޮތުން، މުޅި ދުނިޔޭގެ ޢާބާދީގައި ހިމެނޭ މީހުންގެ ތެރެއިން 1 ބިލިއަނަށް ވުރެ ގިނަ މީހުންނަކީ އޮބީސް މީހުންނެވެ. އޮބީސިޓީއަކީ ތަފާތު އެކި ކަހަލަ، ސީރިއަސް، ޞިއްޙީ މައްސަލަތަކަށް މީހާ ހުށަހަޅާ ކަމެކެވެ.

އިންސާނުންގެ ޢާބާދީ ހެދިބަޑުވަމުން އަންނަ ގޮތަށް ބަލާއިރު، އަދުގެ ޙާލަތުގައި އެންމެ ގިނައީ އޮބީސް މީހުން ކަމުގައިވެސް ދެންނެވިދާނެއެވެ. އެހެން ޢިބާރާތަކުން ދަންނަވަނީނަމަ، އާދަޔާ ޚިލާފަށް ލުއި މީހުންނަށް ވުރެ، އާދަޔާ ޚިލާފަށް ފަލަ މީހުންގެ ޢަދަދު މިހާރު ވަނީ އިތުރުވެފައެވެ. ގިނަ ޤައުމުތަކުގައި އެކަން އޮތީ އެ ގޮތަށެވެ. ހަށިގަނޑަށް ބޭނުންވާ މުހިންމު މާއްދާތައް ނުލިބި އަނަރޫފަވުމުގެ މައްސަލަ ތަހައްމަލު ކުރި، ދަށް އަދި މެދު ފަންތީގެ ގިނަ ޤައުމުތަކެއްގައިވެސްމެއެވެ.

ޑަބްލިއުއެޗްއޯގެ ޑިޕަރޓްމަންޓް އޮފް ނިއުޓްރިޝަން އެންޑް ފުޑް ސޭފްޓީގެ ޑައިރެކްޓަރ، ފްރެންޗެސްކޯ ބްރަންކާ ވިދާޅުވި ގޮތުގައި، އާދަޔާ ޚިލާފަށް ލުއި މީހުންނަށް ވުރެ، އާދަޔާ ޚިލާފަށް ބަރު މީހުންގެ ޢަދަދު އިތުރު ވުމަކީ، މެލްނިއުޓްރިޝަންގެ "ދެ ގުނަ ބުރަ" ޖައްސާ ކަމެކެވެ.

މި ހޯދުންތަކަކީ މިނިވަން އަންދާޒާތަކުގެ ތެރެއިން އެންމެ އިތުބާރު ހިފޭ ތަފާސް ހިސާބުތަކެވެ. މަޢުލޫމާތު އެއްކޮށްފައިވަނީ ދުނިޔޭގެ އެކި ކަންކޮޅުތަކުން 190 އަށް ވުރެ ގިނަ ޤައުމުންނެވެ. ދިރާސާގެ ބޭނުމަށް، 220 މިލިއަނަށް ވުރެ ގިނަ މީހުންގެ މަޢުލޫމާތު އެއްކޮށްފައިވެއެވެ.

1990 އާއި 2022 ވަނަ އަހަރާ ދެމެދު ފާއިތުވީ މުއްދަތަށް ބަލާއިރު، ދޮށީ ޢުމުރުގެ މީހުންގެ ޢާބާދީގައި އޮބީސިޓީ އިތުރުވި މިންވަރު ވަނީ 2 ގުނަ ވެފައެވެ. ޢުމުރުން 5 އަހަރާއި 19 އަހަރާ ދެމެދު ޢުމުރުފުރާގެ ކުދިންގެ މެދުގައި އެ ނިސްބަތް އިތުރު ވެފައި ވަނީ 4 ގުނަ އަށެވެ.

ހަމަ އެ މުއްދަތުގައި ބަރުދަން ދަށް ކަމަށް ބެލެވޭ އަންހެން ކުދިންގެ ނިސްބަތް، 5 ބައިކުޅަ 1 ބައި، ފިރިހެން ކުދިންގެ ނިސްބަތް 3 ބައިކުޅަ 1 ބައި އަދި ބޮޑެތި މީހުންގެ ނިސްބަތް 2 ބައިކުޅަ 1 ބައި ދަށްވެފައިވާ ކަމަށް ތަހުލީލުން ދައްކަ އެވެ.

އާދަޔާ ޚިލާފަށް ބަރުދަން ލުއިވުމަކީ ހެދި ބޮޑުވަމުން އަންނަ ކުޑަކުދިންނަށް ގެއްލުން ހުރި ކަމެކެވެ. އިންތިހާ ދަތި ހާލަތުގައި ބަނޑުހައިހޫނުކަމުގައި އުޅޭ މީހުން މަރަށްވެސް ހުށަހެޅޭ ކަމެކެވެ. އާދަޔާ ޚިލާފަށް ފަލަވުމަކީވެސް ހަގު ޢުމުރެއްގައި މަރުވުމާއި، ނުކުޅެދުންތެރިކަމާ ގުޅިފައިވާ ހަކުރު ބައްޔާއި، ހިތާއި ކިޑްނީގެ ބަލިތައް ޖެހުމުގެ ނުރައްކަލުގެ ދުވެލި އަވަސް ކުރުވަނިވި ކަމެއްވެސްމެއެވެ. މީގެ އިތުރަށްވެސް، ތަފާތު އެތައް ޞިއްޙީ މައްސަލައަކާ ކުރިމަތި ކުރުވައެވެ. ޖިސްމާނީ އަދި ނަފްސާނީ ގޮތުންވެސްމެއެވެ.