ހުކުރު ދުވަހުގެ އިރުއޮއްސެން ކައިރިވެގެން ދިޔައިރު ޤައުމު ސިއްސުވައިލީ ހއ އިހަވަންދޫ އައިސްޕްލާންޓް ތެރޭގައި މީހަކު މަރާލާފައި އޮއްވައި ފެނުނު ވާހަކައާ އެކުއެވެ. ލިބެމުންދިޔަ މައުލޫމާތުތަކުން އެނގުނު ގޮތުގައި މަރާލާފައި އޮއްވައި ފެނުނީ އައިސްޕްލާންޓް ބެލެހެއްޓުމާއި ހަވާލުވެ ހުންނަ އެތަނުގެ މެކޭނިކެއްގެ ވަޒީފާ އަދާކުރާ އުމުރުން 54 އަހަރުގެ އިސްމާއިލް އުމަރެވެ. ރަޙުމަތްތެރިންގެ ނަމުންނަމަ އިއްސެއެވެ.

އިއްސެ މަރާލާފައި އޮތީ އިހާނެތި، ލާއިންސާނީ އަނިޔާތަކެއް ދިނުމަށްފަހުއެވެ. އިހަވަންދޫ ކައުންސިލްގެ ރައީސް މުޙައްމަދު ރަޝީދު ވިދާޅުވި ގޮތުގައި، އިއްސެއަށް ވަނީ ތަކުރާރުކޮށް ތޫނު އެއްޗަކުން ހަމަލާދީފައެވެ. އޭނާގެ ގައިގެ އެކިތަންތާ، ފުން ޒަޚަމްތައް ހުއްޓެވެ.

އިއްސެގެ މަރުގެ ޚަބަރު ލިބުމާއި އެކު ކޮންމެ މީހަކަށްވެސް ފުރަތަމަ މަސައްކަތް ފަށައިގަނެވުނީ އެކަން ހިނގައިދިޔަ ގޮތް ހޯދުމަށެވެ. އިއްސެ އަކީ ކާކުތޯ އާއި އޭނާގެ ޤާތިލަކީ ކާކުތޯ ބެލުމަށެވެ.

ޅ. ހިންނަވަރަށް އުފަން އިއްސެ ދިރިއުޅެމުންދިޔައީ އައިސްޕްލާންޓްގައެވެ. އެ ޕްލާންޓްގައި ދެން މަސައްކަތް ކުރަނީ ގދ.ފަރެސްމާތޮޑާ މީހަކާއި، ބަންގްލަދޭޝް މީހެއްގެ އިތުރުން އިހަވަންދޫ 3 މީހެކެވެ. މީގެ ތެރެއިން އިހަވަންދޫ 3 މީހުން އެމީހުންގެ އާއިލާތަކާއި އެކު ދިރިއުޅެމުންދާއިރު، ގދ.ފަރެސްމާތޮޑާ މީހާ ދިރިއުޅެނީ އޭނާގެ ތިމާގެ ބައެއްގެ ކައިރީއެވެ. އައިސް ޕްލާންޓްގައި ހުންނަ ކޮޓަރީގައި ދިރިއުޅެނީ އިއްސެ އާއި ބަންގާޅަށް ނިސްބަތްވާ ސުމަންއެވެ.

އިއްސެ މަރާލުމުގެ ކުރިން ސުމަން ގެއްލުނު

އިއްސެގެ މަރަށްފަހު ހާމަވެފައިވާ ގޮތުގައި، އިއްސެ މަރާލާފައި އޮއްވައި ފެނުމުގެ ކުރީއްސުރެވެސް ފުލުހުން ދިޔައީ ސުމަން ހޯދަމުންނެވެ. ބުދަ ދުވަހު ސުމަން "ގެއްލިގެން" އޭނާ ހޯދަން ކުރި މަސައްކަތް ނާކާމިޔާބުވެ، އިއްސެ އާއި އައިސްޕްލާންޓްގެ މުއައްޒަފުން ވަނީ ސުމަން ގެއްލިފައިވާކަން ފުލުހުންނަށް ރިޕޯޓްކޮށްފައެވެ. އެހިސާބުން ފުލުހުން ދިޔައީ ސުމަން ހޯދުމަށް މަސައްކަތް ކުރަމުންނެވެ.

މަރާލީ ހާރުކައިގެން ނިދަން ދިޔަ ފަހުން

އިއްސެ އާއި ސުމަން އައިސްޕްލާންޓްގައި ހުރި ކޮޓަރިއެއްގައި ދިރިއުޅުނު ނަމަވެސް، އެމީހުންގެ ކެއުމުގެ ކަންކަން ހަމަޖައްސާފައިވަނީ އެ ރަށުގެ ގެއަކުންނެވެ. އެ ގޭގެ މީހުންނާއި ހަވާލާދީ ކަމާއިބެހޭ ފަރާތްތަކުން މައުލޫމާތުދިން ގޮތުގައި ބުރާސްފަތި ދުވަހުގެރޭ އިއްސެ ވަނީ ހާރުވެސް ކައިފައެވެ. އަދި ހާރުކައިގެން އޭނާ ނިދަން އައިސްޕްލާންޓަށް ގޮސްފައިވަނީ އެރޭ 02:30 ހާއިރުއެވެ.

24 ގަޑިއިރު ނުވަނީސް 5 މީހުން ފުލުހުންގެ ހައްޔަރަށް!

ފުލުހުންނަށް އިއްސެގެ ހަށިގަނޑު ފެނިފައިވަނީ ހުކުރު ދުވަހުގެ ހަވީރުއެވެ. އިއްސެގެ ހަށިގަނޑު ފެނުނުތާ ގިނަ އިރުތަކެއްނުވެ، މި މައްސަލައިގައި މީހަކު ހައްޔަރުކުރިއެވެ. މައްސަލައިގައި ހައްޔަރުކުރީ އިއްސެއާއި އެކު އައިސްޕްލާންޓްގައި ދިރިއުޅެމުންދިޔަ ސުމަންއެވެ. ނަމަވެސް ފާހަގަކޮށްލަން ޖެހޭ ކަމަކީ ސުމަން ހައްޔަރުކުރީ އިހަވަންދޫއިން ނޫން ކަމެވެ. އޭނާ ހައްޔަރުކުރީ ހދ ކުޅުދުއްފުށިންނެވެ.

މި މައްސަލައިގައި ހޮނިހިރު ދުވަހުގެ މެންދުރާއި ހަމައަށް އިތުރު 4 ބިދޭސީއަކުވެސް ވަނީ ހައްޔަރުކޮށްފައެވެ. މައުލޫމާތު ލިބިފައިވާ ގޮތުގައި ހައްޔަރުކޮށްފައިވަނީ، ސުމަން އާއި ގާތް ގުޅުމެއް އޮންނަ އޭނާގެ 4 ރަޙުމަތްތެރިންނެވެ.

މައްސަލައާއި ގުޅޭ ގިނަ އަޑުތަކެއް – އެއްވެސް ވާހަކައެއް ކަށަވަރެއް ނުވޭ

އިއްސެގެ މަރާއި ގުޅިގެން ތުންތުންމަތިން އެތައް ވާހަކައެއް ދަނީ ދެކެވެމުންނެވެ. އޭގެ ތެރެއިން އެއް ވާހަކައަކީ ބުދަދުވަހު، އިހަވަންދޫއިން ފިލައިގެން ސުމަން ދިއްދޫއަށް ދިޔަވާހަކައެވެ. އަނެއް ވާހަކައަކީ، ރަޙުމަތްތެރިންގެ އެހީއާއިއެކު ސުމަން އިހަވަންދޫގައި ފިލައިގެން އުޅުނު ވާހަކައެވެ. އަދި ބުރާސްފަތި ދުވަހުގެރޭ އޭނާ ޑިންގީއެއްގައި ހޯރަފުއްޓަށް ދިޔަ ކަމަށްވެސް ވާހަކަ ދެކެވެއެވެ.  ބުރާސްފަތި ދުވަހުގެރޭ، ގޮތްނޭނގޭ ބަޔަކާއިއެކު ލޯންޗެއްގައި ސުމަން އިހަވަންދޫއަށް ދިޔަކަމަށް ދެކެވޭ ވާހައާއި މި ވާހަކަ ފުށުއަރައެވެ. އަދި ހަމަ މިއާއި އެކު އިއްސެ މަރާލައި، އެއްލާލާފައި އޮތް ތަނުން ވަޅިއެއް ފެނިފައިވާ ކަމަށާއި، އިއްސެގެ ވޮލެޓު ގެއްލިފައިވާ ކަމަށްވެސް ބައެއް ފަރާތްތަކުން ދަނީ ބުނަމުންނެވެ. 

މި މައްސަލައާއި ގުޅިގެން މިފަދަ އެތައް ވާހަކައެއް ދެކެވުނު ނަމަވެސް، މިއިން އެއްވެސް ކަމެއް ހިނގިކަން ރަސްމީ އެއްވެސް ފަރާތަކުން އަދި ކަށަވަރުކޮށްދީފައެއް ނުވެއެވެ. 

ނަމަވެސް މި މައްސަލައިގައި އުފެދޭ އެއް ސުވާލެއް އެބަ އޮތެވެ. ސުމަން ހައްޔަރުކުރީ ކުޅުދުއްފުށިން ކަމުގައިވާއިރު، އޭނާ ކުޅުދުއްފުއްޓަށް ދިޔައީ ކޮން އިރަކު ކިހިނެއް ބާވައެވެ.

އިއްސެގެ މަރާލާފައި އޮތް މަންޒަރު

އިއްސެގެ މަރުގެ ޚަބަރާއި އެކު ސޯޝަލް މީޑިއާގައި އެ އަނިޔާވެރި އަމަލު ހިންގާފައި އޮތް މަންޒަރުވެސް ފެތުރިގެން ދިޔައެވެ. އިއްސެ މަރާލުމަށްފަހު ފެން ހިންދާ ކާނެއް ކަހަލަ ތަނެއްގެ ތެރެއަށް އޭނާގެ ހަށިގަނޑު އެއްލާލާފައި އޮންނަތަން ފެންނަ މި މަންޒަރު ސޯޝަލް މީޑިއާގައި ދައުރުވާން ފަށާފައިވާއިރު، އިއްސެގެ އާއިލާއިން ވަނީ އެ ފޮޓޯ ދައުރު ނުކުރުމަށް އެދިފައެވެ. އަދި ހަމަ މިއާއި އެކު މަރުހޫމަށް އިހުތިރާމް ކުރުމަށްޓަކައި، އެ ފޮޓޯ ދައުރު ނުކުރުމަށް އިހަވަންދޫ ކައުންސިލުންވެސް ވަނީ އެދިފައެވެ.

ތަހުގީގު ހަލުވިކޮށް، އިންސާފު އަވަސްކުރުން

އިއްސެގެ މަރުގެ މައްސަލައިގައި 24 ގަޑިއިރުތެރޭގައި ކުރިއެރުންތަކެއް ހޯދައި 5 މީހަކު ވަނީ ހައްޔަރު ކޮށްފައެވެ. ބާރު ދުވެލީގައި ފުލުހުން މި މައްސަލަ ތަހުގީގު ކުރަމުންދާއިރު، މިހާރު ކުރެވޭ އުއްމީދަކީ މަރުހޫމުގެ އާއިލާއަށް އިންސާފު ލިބުމެވެ. ތަހުގީގަށް ލިބިފައިވާކަމަށް ފެންނަ ކުރިއެރުމަށް ބަލާއިރު، މި މައްސަލަ އަވަހަށް ޝަރީއަތަށް ފޮނުވޭނެ ކަމަށް އުއްމީދު ކުރެވެއެވެ.

މަރުހޫމްގެ ފުރާނައަށް ހެޔޮ ރަޙުމަތް ލައްވާށިއެވެ.