ފުށިދިއްގަރު ފަޅަށް އެޅި ވެލިކޮޅު ފިޔަވައި މި ސަރުކާރުން އަލަށްކުރި ކަމެއް ނެތް - ރައީސް ޞާލިހު
ސަރުކާރުން އެ ބުނާ ފައިސާ ނެތީ ރަށްރަށުގެ ތަރައްގީއަށްޓަކައި
ފޯކައިދޫގައި ބޭއްވި ކެމްޕޭން ޖަލްސާފައި ރައީސް ޞާލިހު ވާހަކަފުޅުދައްކަވަނީ
ތިންމަސްވެގެން ދިޔައިރު، ފުށިދިއްގަރު ފަޅަށް އެޅި ވެލިކޮޅު ފިޔަވައި މި ސަރުކާރުން އަލަށްކުރި ކަމެއް ނެތް ކަމަށް އެމްޑީޕީގެ އެޑްވައިޒު އަދި ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
އެމްޑީޕީގެ ޓިކެޓުގައި ކޮމަންޑޫ ދާއިރާއަށް ވާދަކުރައްވާ ކެންޑިޑޭޓް، މުހައްމަދު ސިނާނުގެ ކެމްޕޭން ޖަލްސާގައި ވާހަކަ ދައްކަވަމުން ރައީސް ޞާލިހް ވިދާޅުވީ އެމްޑީޕީގެ އަބަދުވެސް ސިޔާސަތަކީ ރަށްރަށުގައި ދިރިއުޅޭ ރައްޔިތުންނަށް ތަފާތުކުރުމެއްނެތި ހިދުމަތްތައް ފޯރުކޮށްދެއްވުން ކަމަށެވެ. ވޭތުވެދިޔަ 5 އަަހަރު ދުވަހުގެ ތެރޭގައި ދަތި އުނދަގުލުގައިވެސް އެމަނިކުފާނުގެ ސަރުކާރުން ކުރި މަސައްކަތް ރައްޔިތުންނަށް ފެންނާނެ ކަމަށާއި، ދެން އެންމެ މުހިންމު މަސައްކަތެއްގެ ގޮތުގައި ފޯކައިދޫގައި އޮންނާނި މަގު ހެދުމުގެ މަސައްކަތް ކަމަށެވެ. އަދި އެކަންވެސް ވާނީ ޕްލޭންކޮށް، ޑިޒައިންކޮށް މަސައްކަތް ފެށުމަށް ތައްޔާރުކޮށްފައި ކަމަށް ރައީސް ޞާލިހު ވިދާޅުވިއެވެ.
ރައީސް ވަނީ އެކަންކަން މި ސަރުކާރުން ކުރިއަށް ގެންދިއުމަށް އެދިވަޑައިގަންނަވާފައެވެ.
ރައީސް ޞާލިހު ވިދާޅުވީ 2024 ވަނަ އަހަރުގެ ބަޖެޓުގައި ވެސް ކޮމަންޑޫ ދާއިރާއަށް ކުރަން ނިންމާފައި ހުރި މަސައްކަތްތައް ހުންނާނެ ކަމަށެވެ. ނަމަވެސް ސަރުކާރުން ބުނަމުންދަނީ ފައިސާ ނެތް ވާހަކަ ކަމަށާއި، ސަރުކާރުން އެ ބުނާ ފައިސާ ނެތީ ރަށްރަށުގެ ތަރައްގީއަށްޓަކައި ކަމަށާއި، ހާއްސަކޮށް ކުދި އާބާދީތަކުގެ މަސައްކަތް ކުރައްވަން ކަމަށެވެ.
ރައީސް ޞާލިހު ވިދާޅުވީ ދައުލަތުގެ ބަޖެޓު ސަރުކާރުން ހުސްކުރަމުން ގެންދަނީ ޕާޓިއަށް ތާއިދުކުރާ މެންބަރުންނަށް ވަޒީފާދީ މުސާރަ ދިނުމަށް ކަމަށެވެ. ރައްޔިތުންގެ ތަރައްގީއަށްޓަކައި ކުރާ އެއްވެސްކަމެއް ނުފެންނަ ކަމަށާއި، 3 މަސް ފާއިތުވެގެންދިޔަ އިރު ފުށިދިއްގަރު ފަޅަށް އެޅި ވެލިކޮޅު ފިޔަވައި އެހެން ކަމެއް ނުކުރައްވާ ކަމަށް ވެސް ރައީސް ޞާލިހު ވިދާޅުވިއެވެ.
ރައީސް ޞާލިހު ވިދާޅުވީ ރާއްޖެ ފާލުން ނެއްޓިއްޖެ ކަމަށާއި ހަމަމަގަށް އަޅުވަންޖެހޭ ކަމަށެވެ. އަދި ހަމަމަގަށް ނާޅުވައިފިނަމަ ހީނުކުރާވަރުގެ ގެއްލުން ގައުމަށް ކުރިމަތިވާނެ ކަމަށެވެ. ކުރިއަށް އޮތް މަޖިލިސް އިންތިހާބަކީ މިކަމަށް އިސްވެ އޮވެ އަޅާ ފުރަތަމަ ފިޔަވަޅަށް ހަދަންޖެހޭ ކަމަށެވެ.
