އިންޑިއާ އައުޓް ކެމްޕެއިންގެ ސަބަބުން، އިންޑިއާއާ އޮތް ގުޅުން ރަނގަޅު ކުރަން ގިނަ މަސައްކަތްތަކެއް ކުރަން ޖެހުނު: ރައީސް ޞާލިޙް
އިންޑިއާ އައުޓް ކެމްޕެއިންގެ ސަބަބުން، އޭރު ވެރިކަމުގައި ތިބިއިރު ކުރަން ނުޖެހޭ ވަރަށް ގިނަ މަސައްކަތްތައް އަދި ވަރަށް ގިނަ ވަގުތު އޭގެ ސަބަބުން ހޭދަ ކުރަން ޖެހުނު
އިންޑިއާ އައުޓް ކެމްޕެއިންގައި ރައީސް މުޢިއްޒު
ޕީޕީއެމް-ޕީއެންސީ އިން އިދިކޮޅުގައި ތިބެ ކުރިއަށް ގެންދިޔަ އިންޑިއާ އައުޓް ކެމްޕެއިންގެ ސަބަބުން، އިންޑިއާއާ އޮތް ގުޅުން ރަނގަޅު ކުރަން ވަރަށް ގިނަ މަސައްކަތްތަކެއް އޭރު ކުރަން ޖެހުނު ކަމަށާއި، އެކަމަށް ވަރަށް ގިނަ ވަގުތު ހޭދަ ކުރަން ޖެހުނު ކަމަށް ކުރީގެ ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެ އެވެ.
ރާއްޖެ ޓީވީގެ ފަށާއިރު ޕްރޮގްރާމަށް ހޮނިހިރު ދުވަހު ދެއްވި އިންޓަވިއުގައި ރައީސް ޞާލިޙް ވިދާޅުވެފައި ވަނީ، ރާއްޖެ އާއި އިންޑިއާގެ ސަރުކާރާ އޭރު އޮތީ ވަރަށް އިތުބާރު ހިފޭ ގުޅުމެއް ކަމަށެވެ.
މިހާރުގެ ރައީސް ޑޮކްޓަރު މުޙައްމަދު މުޢިއްޒު އާއި، ސަރުކާރުގެ އިސްވެރިން އޭރު ކުރިއަށް ގެންދިޔަ އިންޑިއާ އައުޓް ކެމްޕެއިންގެ ސަބަބުން، އޭރު ކިހާ އުނދަގޫތަކެއް ކުުރިމަތިވިތޯ ސުވާލު ކުރުމުން ރައީސް ޞާލިޙް ވިދާޅުވީ، އޭރު ވެރިކަމުގައި ތިބިއިރު ކުރަން ނުޖެހޭ ވަރަށް ގިނަ މަސައްކަތްތައް އަދި ވަރަށް ގިނަ ވަގުތު އޭގެ ސަބަބުން ހޭދަ ކުރަން ޖެހުނު ކަމަށެވެ.
އިދިކޮޅުގައި ތިބެ އެ ބޭފުޅުން އޭރު ދެއްކެވި ވާހަކަތަކުގެ ސަބަބުން އަދި ފެތުރި ދޮގު ވާހަކަ ތަކުގެ ސަބަބުން އޭރު އޮތް އެމްޑީޕީގެ ސަރުކާރާއި އިންޑިއާގެ ސަރުކާރާ ދެމެދު އޮތް ގުޅުމަށް އެއްވެސް ކަހަލަ ހީނަރު ކަމެއް ނާންނަ ކަމަށް ރައީސް ޞާލިޙް ވިދާޅުވި އެވެ. އެމްޑީޕީ ސަރުކާރާއި އިންޑިއާއާ ދެމެދު އޮތީ އެއަށްވުރެ އިތުބާރު ކުރެވޭ ގުޅުމެއް ކަމަށް ވެސް ރައީސް ޞާލިޙް ވިދާޅުވެފައިވެ އެވެ.
މީގެ އިތުރުން ރައީސް ޞާލިޙް ވިދާޅުވީ، އިންޑިއާ އާއި ރާއްޖެއާ ދެމެދު ހެދިފައި އޮތް ކޮންމެ އެއްބަސްވުމަކީ އަދި މުއާހަދާ އަކީ އެއާ ދޭތެރޭގައި ވަރަށް ތަފްސީލުކޮށް މަޝްވަރާ ކުރެވި އަދި އޭގެއިން ސީދާ ރައްޔިތުންނަށާއި ޤައުމަށް އެންމެ ފައިދާ ހުރި ގޮތަށް ހެދިފައިވާ އެއްބަސްވުންތަކެއް ކަމަށެވެ.
ފުރަތަމަ ކަމަކަށް އަޅުގަނޑުމެން ވެރިކަމުގައި ތިބިއިރު ކުރަން ނުޖެހޭ ވަރަށް ގިނަ މަސައްކަތްތައް، ވަރަށް ގިނަ ވަގުތުތައް އޭގެ ސަބަބުން އަޅުގަނޑުމެން އެކަމަށް ހޭދަ ކުރަން ޖެހުނު. އަޅުގަނޑުމެންނާ އިންޑިއާ ސަރުކާރާ އޭރު އޮތީ ވަރަށް އިތުބާރު ހިފޭ ގުޅުމެއް. އެ ބޭފުޅުން އެ ދެއްކެވި ވާހަކަތަކުގެ ސަބަބުން، އެ ފެތުރި ދޮގު ވާހަކަތަކުގެ ސަބަބުން، އޭރު އޮތް އަޅުގަނޑުމެންގެ ވެރިކަމަކާއި އިންޑިއާގެ އޭރު އޮތް ސަރުކާރަކާ، އަދި މިހާރު ވެސް އޮތީ އެ ސަރުކާރު، އެ ސަރުކާރާ ދެމެދު އޮތް ގުޅުމަކަށް އެއްވެސް ކަހަލަ ހީނަރު ކަމެއް ނާދޭ. އެއަށް ވުރެ އިތުބާރު ކުރެވޭ، ޓްރަސްޓް ކުރެވޭ ގުޅުމެއް އަޅުގަނޑުމެންގެ ދެ ފަރާތުގައި އޮތީ. އަޅުގަނޑުމެންގެ ތެރޭގައި ކުރެވިފައި ހުރި ކޮންމެ އެއްބަސްވުމަކީ، ކުރެވުނު ކޮންމެ އެގްރީމަންޓަކީ، މުއާހަދާ އަކީ އެއާ ދޭތެރޭގައި ވަރަށް ތަފްސީލުކޮށް މަޝްވަރާ ކުރެވި، އޭގެއިން ސީދާ ރައްޔިތުންނަށް، ޤައުމަށް އެންމެ ފައިދާ ހުރި ގޮތަށް ކުރެވިފައި ހުރި އެގްރީމަންޓް ތަކެއް.ކުރީގެ ރައީސް އިބްރާހީމް މުޙައްމަދު ޞާލިޙް
ރައީސް ޞާލިޙް ވިދާޅުވީ އިންޑިއާ އިން ވެސް އެކަން ޤަބޫލު ކުރާ ކަމަށާއި، އިންޑިއާ އިން ވެސް ބޭނުން ވަނީ ދިވެހި ރާއްޖެ އަކީ މިނިވަން ޤައުމެއްގެ ގޮތުގައި އަދި މިނިވަން ދައުލަތެއްގެ ގޮތުގައި އަބަދު ވެސް އޮތުން ކަމަށެވެ. އެއީ އިންޑިއާ އަށް ވެސް އަދި އިންޑިއާ ކަނޑަށް ވެސް އޮތް ސުލްޙަވެރިކަން ޤާއިމު ކުރުމަށްޓަަކައި ކޮންމެހެން ކުރަން ޖެހޭ ކަމެއްގެ ގޮތުގައި އިންޑިއާ އިން ދެކުނު ކަމަށް ރައީސް ޞާލިޙް ވިދާޅުވި އެވެ.
އެކަން ފާހަގަ ކުރައްވައި ރައީސް ޞާލިޙް ވިދާޅުވީ، މިހާރު ވެސް އިންޑިއާ އިން ދެކޭނީ ހަމަ އެގޮތަށް ކަމަށް ޤަބޫލު ކުރައްވާ ކަމަށެވެ. އެހެންކަމުން އޭރު އިދިކޮޅުން އަދި ވަކިން ޚާއްސަކޮށް ރައީސް މުޢިއްޒު އިސްވެ ހުންނަވައިގެން ވެރިޔަކަށް އައުމަށް އެ ކުރި މަސައްކަތަކީ ވަރަށް ހަޑި ހުތުރު މަސައްކަތެއްގެ ގޮތުގައި ސިފަވެގެންދާ ކަމަށް ރައީސް ޞާލިޙް ވިދާޅުވި އެވެ.
2023 ވަނަ އަހަރު އޮތް ރިޔާސީ އިންތިޚާބު ރައީސް މުޢިއްޒު ކާމިޔާބު ކުރީ، އިންޑިއާއާ ދެކޮޅަށް ކުރިއަށް ގެންދިޔަ އިންޑިއާ އައުޓް ކެމްޕެއިންގެ ނިވަލުގަ އެވެ. އަދި އޭރު އިންޑިއާއާ ގުޅުވައިގެން އެތަކެއް ދޮގު ވާހަކަތަކެއް ވަނީ ފަތުރައިފަ އެވެ.
ވެރިކަމަށް ވަޑައިގެންނެވުމަށް ފަހު ވެސް އިންޑިއާ އަށް ވަރަށް ބޮޑަށް ފާޑު ވިދާޅުވުމަށް ފަހު، މިހާރު ގެންދަވަނީ އިންޑިއާއާ އެކު ގާތް ގުޅުމެއް ބޭއްވުމަށް މަސައްކަތް ކުރަމުންނެވެ. އެކަމުގެ ސަބަބުން މިއަދު ގިނަ ބައެއްގެ ފާޑު ކިޔުުން ވަނީ ރައީސް މުޢިއްޒު އަދި ސަރުކާރަށް އަމާޒުވެފަ އެވެ.
