ތިން މަސް ދުވަހުގެ ތެރޭގައި މާލޭގެ ރައްޔިތުންނަށް ގޯއްޗާއި ފްލެޓް ހަވާލުނުކުރެވެންވީ ސަބަބެއް ނެތް: ރައީސް ޞާލިހު

މިސަރުކާރަށް ތިން މަހަށްވުރެ ގިނަދުވަސްވީއިރު މާލޭގެ ރައްޔިތުންނަށް ގޯއްޗާއި ފްލެޓް ހަވާލުނުކުރެވެންވީ ސަބަބެއް ނެތްކަމަށް ކުރީގެ ރައީސް އަދި އެމްޑީޕީގެ އެޑްވައިޒަރު ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.

މާފަންނު ހުޅަނގު ދާއިރާއަށް ވާދަކުރައްވާ އެމްޑީޕީގެ ކެންޑިޑޭޓް މުހައްމަދު ފަލާހުގެ ކެމްޕެއިން ޖަގަހަ ހުޅުވުމަށް ހުކުރު ދުވަހުގެ ރޭ ބޭއްވި ހަރަކާތުގައި ވާހަކަދައްކަވަމުން ރައީސް ޞާލިހު ވިދާޅުވީ އެމްޑީޕީގެ ސަރުކާރުގައި މާލޭގެ ރައްޔިތުންނަށާއި މާލޭގައި ދިރިއުޅޭ ރައްޔިތުންނަށް ބޯހިޔާވަހިކަން ހޯދައިދިނުމަށް ބުރަ މަސައްކަތްތަކެއް ކޮށްފައިވާކަމަށެވެ. އެގޮތުން ގުޅީފަޅާއި ގިރާވަރުފަޅާއި ހުޅުމާލެއިން އިތުރަށް ބިން ހިއްކައިގެން އެމަސައްކަތް ކޮށްފައިވާކަމަށް ރައީސް ޞާލިހު ވިދާޅުވިއެވެ.

ނަމަވެސް ރިޔާސީ އިންތިޚާބުގެ ތެރޭގައިވެސް އެމްޑީޕީން ފާހަގަކުރަމުން އައި ގޮތަށް މިސަރުކާރު އައުމާއެކު އެމަސައްކަތްތައް މިވަނީ ހުއްޓުމަކަށް އައިސްފައިކަމަށް ވިދާޅުވިއެވެ. ޚާއްސަކޮށް މާލޭގެ ރައްޔިތުންނަށް ބޯހިޔާވަހިކަން ހޯދައިދިނުމަށް އެމްޑީޕީ ސަރުކާރުން ދޫކުރި ގޯތިތަކާއި ފްލެޓްތައް އޭގެ ހައްގުވެރިންނަށް ނުދޭން ތަފާތު ބަހަނާތައް މިސަރުކާރުން ދައްކަމުންދާކަމަށް ރައީސް ޞާލިހު ވިދާޅުވިއެވެ.

މީގެއިތުރުން ރައީސް ޑރ މުހައްމަދު މުއިއްޒު ކެމްޕެއިންގައި ވިދާޅުވި ގޮތާއި ޚިލާފަށް އަމަލުކުރަމުންދާކަމަށް ރައީސް ޞާލިހު ވިދާޅުވިއެވެ.

ރައްޔިތުންގެ މަޖިލީހުގައި މިހާރުވެސް މާފަންނު ހުޅަނގު ދާއިރާގެ ގޮނޑި ފުރުއްވަމުން ގެންދަވާ ފަލާހު އަށް އިޝާރާތްކުރައްވާ ރައީސް ޞާލިހު ވިދާޅުވީ ފަލާހަކީ ހޮވުނު ފިކުރާ އެއްގޮތަށް މަސައްކަތްކުރައްވާ މެމްބަރެއްކަމަށެވެ. އަދި ފާއިތުވި ދުވަސްތަކުގައި މާލެ ސިޓީ ކައުންސިލުގަޔާއި ރައްޔިތުންގެ މަޖިލީހުގައި އިންނަވައިގެން މާލޭގެ ރައްޔިތުންނަށް ބޭނުންވާ ކަންކަން ފުރިހަމަކޮށްދެއްވުމަށް ބުރަ މަސަައްކަތްތަކެއް ކުރައްވާފައިވާ ބޭފުޅެއްކަމަށް ވިދާޅުވިއެވެ.