"'އެމްޑީޕީގެ ރަންރީނދޫ ރަން' ކަނޑައެޅިފައިވާ ތާރީހުގައި ސަރުކާރުން ތަނެއް ދިނަސް، ނުދިނަސް އޮންނާނެ."
5 ޖުލައި 2025 | ހޮނިހިރު 14:18އައިކު ވަނީ އެ ހަރަކާތަށް ހުރަސް ނޭޅުމަށް ގޮވާލައްވާފަ
އެމްޑީޕީގެ ޤާނޫނީ ޓީމްގައި ހިމެނިވަޑައިގަންނަވާ އައިކު އަހުމަދު އީސާ
އެމްޑީޕީގެ ރަންރީނދޫ އިވެންޓް ކަނޑައެޅިފައިވާ ތާރީހުގައި ސަރުކާރުން ތަނެއް ދިނަސް ނުދިނަސް އޮންނާނެ ކަމަށް އެ ޕާޓީން ބުނެފިއެވެ.
ބުރާސްފަތި ދުވަހުގެ ރޭ ހަރުގެ ޖަލްސާގައި ވާހަކަދައްކަވަމުން ، އެމްޑީޕީގެ ޤާނޫނީ ޓީމްގައި ހިމެނިވަޑައިގަންނަވާ އައިކު އަހުމަދު އީސަ ވަނީ އެމްޑީޕީގެ 20 ވަނަ އަހަރީ ދުވަހާއި ގުޅިގެން ކުރިއަށް ވެސް މުހިންމު ހަރަކާތްތަކެއް ހުރި ކަމަށް ފާހަގަކުރައްވާފައެވެ.
އޭނާ ވިދާޅުވީ ކުރިއަށް ހުރި ހަރަކާތްތަކުގެ ތެރޭގައި މި މަހުގެ 11 ވަނަ ދުވަހު ކުޅުދުއްފުށީގައި ޚާއްސަ ޖަލްސާ އެއް އޮންނާނެ ކަަމަށް އައިކު ވިދާޅުވެފައިވެއެވެ. މީގެ އިތުރުން މި މަހު 18 ވަނަ ދުވަހު "ރަން ރީނދޫ" ދުވުން އިވެންޓް އިފްތިތާހުކުރުން އޮންނާނެ ކަމަށް އޭނާ ވިދާޅުވިއެވެ.
ހުޅުމާލޭގައި ބާއްވާ މި އިވެންޓަށް އަދިވެސް ސަރުކާރުން ތަނެއް ދީފަ އެއް ނުވެއެވެ. ނަމަވެސް އެ ތާރީހުގައި އެ އިވެންޓް ކުރިއަށް ގެންދިއުމަށް ނިންމާފައިވާ ކަމަށް އައިކު ވިދާޅުވިއެވެ.
" ހަވީރު ގަޑީގައި އަޅުގަނޑުމެން ދުވާނަން. މިއަށް ހުރަސް އަޅުއްވަން ނޫޅުއްވާ. މީގެ ކުރިން ވެސް މިފަދަ ހަރަކާތްތައް ހިންގަނީ ސަރުކާރުން ޖާގަ ދީގެނެއް ނޫން." އައިކު ވިދާޅުވިއެވެ.
އައިކު ވަނީ އެ ހަރަކާތަށް ހުރަސް ނޭޅުމަށް ގޮވާލައްވާފައެވެ. މިދިޔަ ޖޫން މަހުގެ 26 އިން ފެށިގެން ސިލްސިލާ ޖަލްސާތަކާއި ތަފާތު އެހެން ހަރަކާތްތަކާއި އެކު އަހަރުގެ އެކި ހިސާބަށް ބަހާލައިގެން އެމްޑީޕީގެ އަހަރީ ދުވަހާއި ގުޅޭ ހަރަކާތްތައް ކުރިއަށް ގެންދަން ނިންމާފައިވާ ކަމަށް އެ ޕާޓީން ވަނީ މީގެ ކުރިން ބުނެފައެވެ.
