އެމްޑީޕީގެ ސިޔާސަތާއެކު ގައުމަށް ލިބޭ އާމްދަނީ އިތުރުވި ނަމަވެސް މި ސަރުކާރުގައި ރައްޔިތުންނަށް ކުޑަ މިންވަރަކަށް ވެސް ޚިދުމަތެއް ނުދެވޭ: މެންބަރު ސަމީރު
އެމްޑީޕީގެ ދެ ވެރިކަމުގައި ވެސް ރައްޔިތުންނަށް ފައިދާވާ ގިނަ ކަންކަން ކޮށްދީފައިވޭ
ރައްޔިތުންގެ މަޖިލީހުގައި، ތޮއްޑޫ ދާއިރާގެ މެންބަރު ހުސެއިން ސަމީރު ވާހަކަދައްކަވަނީ
އެމްޑީޕީގެ ސިޔާސަތާއެކު ގައުމަށް ލިބޭ އާމްދަނީ އިތުރުވި ނަމަވެސް މިސަރުކާރުގައި ރައްޔިތުންނަށް ކުޑަ މިންވަރަކަށް ވެސް ޚިދުމަތް ނުދެވޭ ކަމަށް ރައްޔިތުން މަޖިލީހުގައި ތޮއްޑޫ ދާއިރާގެ މެންބަރު ހުސެއިން ސަމީރު ވިދާޅުވެއްޖެއެވެ.
ބުދަ ދުވަހު ރައްޔިތުން މަޖިލީހުގައި ވާހަކަދައްކަވަމުން މެންބަރު ސަމީރު ވިދާޅުވީ އެމްޑީޕީގެ ސިޔާސަތުތަކުގެ ސަބަބުން އެމްޑީޕީގެ ދެ ވެރިކަމުގައި ވެސް ރައްޔިތުންނަށް ފައިދާވާ ގިނަ ކަންކަން ކޮށްދީފައިވާ ކަމަށެވެ. އަދި އެ ސިޔާސަތުގެ ސަބަބުން ލިބޭ އާމްދަނީ އިތުރުވެގެން ދިޔަ ކަމަށް މެންބަރު ސަމީރު ވިދާޅުވިއެވެ.
މެންބަރު ސަމީރު ވިދާޅުވީ އެމްޑީޕީގެ ފުރަތަމަ ވެރިކަން އައިރު ރާއްޖޭގައި ހެދިފައި އޮތީ އެންމެ 8 ބަނދަރު ކަމަށެވެ. އޭގެފަހުން 2018 ވަނަ އަހަރު އައި އެމްޑީޕީގެ ވެރިކަމާއެކު، ރާއްޖޭގެ ހުރިހާ ރަށެއްގައި ފެނާއި ނަރުދަމާ އަދި ބަނދަރު ގާއިމްކުރުމުގެ ސިޔާސަތަކާއެކު ހުރިހާ ރަށެއްގައި މަޝްރޫއުގެ މަސައްކަތްތައް ފެށި، ގިނަ ރަށްރަށުގައި އެ މަޝްރޫއުތައް ނިންމާލެވުނު ކަމަށް މެންބަރު ސަމީރު ވިދާޅުވިއެވެ.
ނަމަވެސް އެމްޑީޕީގެ ވެރިކަން ބަދަލުވެ، ރާއްޖޭގެ ވެރިކަމާ މިހާރު ހަވާލުވެފައިވާ ސަރުކާރަށް ދެއަހަރުވާން ކައިރިވަމުންދާއިރު، ރައްޔިތުންނަށް ބޭނުންވާ ކުޑަ ޚިދުމަތެއް ވެސް ފޯރުކޮށް ނުދެވޭ ކަމަށް މެންބަރު ސަމީރު ވިދާޅުވިއެވެ.
ގަބޫލުކުރަންވާނެ އަޅުގަނޑުމެން އެމްޑީޕީން ފުރަތަމަ 2008 ގައި ވެރިކަމާ ހަވާލުވިއިރުގައި މިދައުލަތަށް މިގައުމަށް ލިބޭ އާމްދަނީއަކީ 7 ބިލިއަން ރުފިޔާ. އެހެންނަމަވެސް އަޅުގަނޑުމެންގެ ޕާޓީން ގެނައި ސިޔާސަތުގެ ސަބަބުން މިއަދު އެތައް ގުނައަކުން އެ އާމްދަނީ އިތުރުވެގެންދިޔައިރުގައި އެކަށީގެންވާ ވަރަށް އެ ޚިދުމަތްތައް މިއަދުގެ ސަރުކާރު ނުދޭކަން އަޅުގަނޑު ފާހަގަކޮށްލަން. ގަބޫލުކުރަންވާނެ އަޅުގަނޑުމެން އަންނަނީ ރައްޔިތުންނަށް ޚިދުމަތް ކުރުމަށްޓަކައި.އަޅުގަނޑުމެންގެ ފުރަތަމަ ސަރުކާރު އައިރުގައި ރާއްޖޭގައި އޮތީ އެންމެ 8 ބަނދަރު ހެދިފައި. ނަމަވެސް ނިމިދިޔަ ސަރުކާރު ނިމިގެންދިޔައިރުގައި ރާއްޖޭގެ ހުރިހާ ރަށެއްގެ ފެނާއި ނަރުދަމާ، ބަނދަރުގެ މަސައްކަތް ފެށި ގިނަ ތަންތަން ހުރީ ނިމިފައި.ރައްޔިތުން މަޖިލީހުގައި ތޮއްޑޫ ދާއިރާގެ މެންބަރު ހުސެއިން ސަމީރު
މެންބަރު ސަމީރު ވިދާޅުވީ ގިނަ ވައުދުތަކެއް ވެވަޑައިގަންނަވައި، ރައީސް ޑރ.މުހައްމަދު މުއިއްޒު ވެރިކަމަށް ވަޑައިގެންނެވި ނަމަވެސް ވީ ވައުދުތަކުގެ ތެރެއިން މަދު މިންވަރެއް ވެސް މިހާތަނަށް ފުއްދިފައިނުވާ ކަމަށެވެ. އަދި ވިދާޅުވީ ރައްޔިތުންނަށް ޚިދުމަތް ކުރުމަށް އައި ސަރުކާރުގެ ފަރާތުން ފެނިގެންދަނީ އެހެން މަންޒަރެއް ކަމަށެވެ.
