އިސްރާއީލުން ހިފާފައިވާ ހުޅަނގު އައްސޭރީގައި ގާތްގަނޑަކަށް 3،500 އާ ހައުސިން ޔުނިޓް އެޅުމަށް އިޒްރޭލުން ނިންމި ނިންމުން ފަރަންސޭސިވިލާތުން ހަރުކަށި އިބާރާތުން ކުށްވެރިކޮށްފިއެވެ.

ފަރަންސޭސި ޚާރިޖީ ވުޒާރާއިން ނެރުނު ނޫސްބަޔާނެއްގައި ބުނެފައިވަނީ ހުޅަނގު އައްސޭރީގައި މިހާރުވެސް އުފެދިފައިވާ ނުތަނަވަސްކަން އިންތިހާއަށް ބޮޑުވެފައިވާ، ނާޒުކު ދަނޑިވަޅުގައި ގާނޫނާ ހިލާފު އަދި ޒިންމާދާރުކަން ކުޑަ މި ނިންމުން ވަގުތުން އަނބުރާ ގެންދިއުމަށް އިސްރާއީލު ސަރުކާރަށް ގޮވާލާ ކަމަށެވެ.

ފްރާންސުން ނެރުނު ބަޔާނުގައި ބުނީ އިޒްރޭލުން ފަލަސްތީނުގެ ބިންތަކުގައި މީހުން ވަޒަންވެރިކޮށް، އޭރިއާ ސީ އާއި އިރުމަތީ ގުދުސްގައި ހުރި ފަލަސްތީނުގެ އިމާރާތްތައް ތަޅާލުމަކީ ބައިނަލްއަގްވާމީ ގާނޫނުތަކާ ކަނޑައެޅިގެން ހިލާފު ކަމެއް ކަމަށާއި އެކަން ހުއްޓުވަން ޖެހޭ ކަމަށެވެ. އިޒްރޭލުގެ ގާނޫނުގެ ދަށުން ވެސް ގާނޫނާ ހިލާފަށް ހަދާފައިވާ އައުޓްޕޯސްޓްތައް ލަސްނުކޮށް ނައްތާލަން ޖެހޭ ކަމަށްވެސް ބަޔާނުގައި ވެއެވެ.

ފަރަންސޭސިވިލާތުން ވަނީ އިޒްރޭލުގެ ސަލާމަތާއި ރައްކާތެރިކަމުގެ ހައްގާއި ފަލަސްތީނުގެ ގާނޫނީ އުންމީދުތައް ކަށަވަރުކުރުމަށް އޮތް ހަމައެކަނި މަގަކީ ދެ ދައުލަތުގެ ހައްލަކަށް އޮތް އުންމީދުތަކަށް ބުރޫއަރާ ފަދަ ހުރިހާ ފިޔަވަޅެއް ކުށްވެރިކޮށްފައެވެ.

ހައުސިންގ ޔުނިޓްތައް އެޅުމާ ދެކޮޅަށް ފްރާންސުން ބަޔާން ނެރެފައިވާއިރު، އިސްރާއީލުގެ ހަޔަރ ޕްލޭނިންގ ކައުންސިލުން ނިންމާފައިވަނީ ފަލަސްޠީނުގެ ބިންތަކުގެ އެކި ތަންތަނުގައި 3،488 ސެޓްލްމަންޓް ހޯމް އެޅުމަށެވެ. މިއީ ފާއިތުވި އަހަރުތަކުގައި އެންމެ ގިނަ އަދަދަކަށް ސެޓްލްމަންޓް ޔުނިޓް އެޕްރޫވްކޮށްފައިވާ ޔުނިޓެވެ.

އިސްރާއީލްގެ މި ނިންމުމަށް ފަލަސްތީނުގެ އޮފިޝަލުން ދެކޮޅު ހައްދަވާއިރު، މިއީ ހުޅަނގު އައްސޭރި އާއި ޣައްޒާ އަދި އިރުމަތީ ގުދުސްގައި މިނިވަން ދައުލަތެއް ހޯދުމަށް ކުރަމުންދާ މަސައްކަތަށް ލިބުނު އިތުރު ބޮޑު ގެއްލުމެއް ކަމަށް ބުނެ ފާޑުކިޔާފައިވެއެވެ.

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއިސްވެ ހުންނަވާ ހަރުކަށި ފިކުރުގެ އާ ސަރުކާރުގައި ހުޅަނގު އައްސޭރީގައި ސެޓްލްމަންޓް ކުރިއެރުން ވަނީ ވަރަށް ބޮޑަށް އިތުރުވެފަ އެވެ. އޭނާގެ ކޯލިޝަންގައި ހިމެނެނީ ފަލަސްތީނުގެ ދައުލަތް ބަލައިނުގަތުމާއި ހުޅަނގު އައްސޭރި ހިފުމަށް ވަކާލާތުކުރާ އަލްޓްރާނޭޝަނަލިސްޓް ފެކްޝަންތަކެވެ.

ބައިނަލްއަގްވާމީ މުޖުތަމައުގެ ގިނަ ބަޔަކު ދެކޭ ގޮތުގައި އިސްރާއީލުގެ އާބާދީތަކަކީ މަދަނީ އާބާދީތައް ހިފާފައިވާ ސަރަހައްދުތަކަށް ބަދަލުކުރުން މަނާކުރާ ބައިނަލްއަގުވާމީ ގާނޫނުތަކާ ހިލާފު ކަމެކެވެ. ފަލަސްތީނުގެ ތިން މިލިއަނަށް ވުރެ ގިނަ މީހުންގެ މެދުގައި ހުޅަނގު އައްސޭރި އާއި އިރުމަތީ ގުދުސްގައި އިޒްރޭލުގެ ހަތް ލައްކައަށް ވުރެ ގިނަ މީހުން މިހާރު ދިރިއުޅެ އެވެ.

އެމެރިކާއިން އިސްރާއީލުގެ އެންމެ ފަހުގެ ސެޓްލްމަންޓް އެޕްރޫވަލްތަކަށް ފާޅުގައި ފާޑުކިޔުމުގެ ނާދިރު ފިޔަވަޅެއް އެޅިއިރު، މިއީ ދެ ދައުލަތެއްގެ ހައްލަކަށް ތާއީދުކުރާ އެމެރިކާގެ ސިޔާސަތާ ޚިލާފު ފިޔަވަޅެކެވެ. ވައިޓް ހައުސްގެ ޕްރެސް ސެކްރެޓަރީ ކެރިން ޖީން ޕިއެރޭ ސިފަކުރެއްވި ގޮތުގައި މި ޕްލޭންތަކަކީ ހަމައެކަނި ނުތަނަވަސްކަން އިތުރުކޮށް ހަމަނުޖެހުން ބޮޑުކުރުމަށް ކުރާ ކަމެއް ކަމަށެވެ.