ބާލީގެ އަގުންގް އަލިފާންފަރުބަދަ ގޮވަން ފެށުމުން ރައްކާތެރިކަމުގެ ފިޔަވަޅުތައް އަޅަންފަށައިފި

ބޮޑު ގޮވުމެއް ގޮވާފާނެ ކަމުގެ ބިރާއެކު އިންޑޮނީޝިއާގެ ބާލީގައި ހުންނަ އަގުންގް އަލިފާން ފަރުބަދަ ކައިރީގައި ދިރިއުޅޭ މީހުންގެ ތެރެއިން 100،000 އެއްހާ މީހުން ރައްކާތެރި ސަރަހައްދުތަކަށް ބަދަލުކުރުމުގެ މަސައްކަތް އެގައުމުގެ އިދާރާތަކުން ފަށައިފިއެވެ.

އިންޑޮނީޝިއާގެ އިދާރާތަކުންވަނީ އެންމެ މަތީ ނުރައްކަލުގެ އިންޒާރު ނެރެ، ގޮވަމުންދާ ފަރުބަދައިގެ ވަށައިގެންވާ ސަރަހައްދުގެ ތެރެއިން ނުރައްކާ ސަރަހައްދު ކަމަށް ކަނޑައަޅާފައިވާ ސަރަހައްދު އިތުރުކޮށްފައެވެ.

ފަތުރުވެރިންގެ މެދުގައި މަގުބޫލު މަންޒިލެއް ކަމަށްވާ ބާލީގެ އެއަރޕޯޓް ބަންދުކޮށްފައިވާއިރު އެތައްހާސް ބަޔަކުވަނީ އެއަރޕޯޓްގައި ތާށިވެފައެވެ.

އިދާރާތަކުން ބުނީ މިހާތަނަށް 445 ފްލައިޓް ކެންސަލް ކުރަންޖެހި 59,00 ދަތުރުވެރިންނަށް އަސަރުކޮށްފައިވާ ކަމަށެވެ.

އިންޑޮނީޝިއާގެ ނޭޝަނަލް ހޮޓެލް އެސޯސިއޭޝަނުން ބުނީ އެ ޖަމާއަތުގެ މެމްބަރު ހޮޓެލް ތަކުގައި ތިބި ފަތުރުވެރިންގެ ތެރެއިން ނުފުރި އެއަރޕޯޓްގައި ތާށިވީ ދަތުރުވެރިންނަށް ހޮޓަލުގައި އެއްރޭ ހުރުން ހިލޭ ހަމަޖައްސައިދޭނެ ކަމަށެވެ.

އޮސްޓްރޭލިއާ ސަރުކާރާއި އިނގިރޭސިވިލާތުގެ ފޮރިން އޮފީހުންވަނީ އެ ގައުމުތަކުގެ ދަތުރުވެރިން ކެންސަލް ކުރެވުނު ފްލައިޓްތަކަށް ތައްޔާރުވެ ބާލީގެ މީޑިއާތައް މޮނިޓަރކޮށް އެ ގައުމުގެ އިދާރާތަކުގެ އިންޒާރުތަކަށް ސަމާލުވެ ތިބުމަށް ގޮވާލާފައެވެ.

ޗައިނާގެ ރައްޔިތުންނަށް އަމާޒުކޮށް ނެރެފައިވާ ބަޔާނެއްގައި އެ ގައުމުންވަނީ ބާލީއަށް ދަތުރުކުރާނަމަ" ސަމާލުވުމަށް" ގޮވާލާފައެވެ.

ބާލީގެ އިދާރާތަކުން ބުނާގޮތުގައި ކަޅުދުމާއި އަޅި ފަރުބަދައިގެ ކޮޅުން ފެށިގެން 3،400 މީޓަރު އުސްމިނަށް އަރަމުންދާނެއެވެ.

އޮފިޝަލުންވަނީ ފަރުބަދަމަތިން ފައިބައިގެން އަންނަ ކުނޑިބުނޑި ނަގަން ނުދިއުމަށް އާއްމުންނަށް އިންޒާރުކޮށްފައެވެ.

އަގުންގް ފަރުބަދައަށް މިފަހަރު ގުޑުންތައް އަންނަން ފަށާފައިވަނީ ސެޕްޓެމްބަރު މަހުން ފެށިގެންނެވެ.

އަގުންގް އަލިފާން ފަރުބަދަ އެންމެ ފަހުން ގޮވާފައިވަނީ 1963 ވަނަ އަހަރުއެވެ. އެ އަހަރު 1500 މީހުން މަރުވެ 75،000 މީހުން ރައްކާތެރި ހިސާބުތަކަށް ބަދަލުކުރަން ޖެހުނެވެ.