ޣައްޒާއަށް އެހީ ވެއްދުމަށްޓަކައި ޣައްޒާގެ އައްސޭރިފަށުގައި ވަގުތީ ބަނދަރެއް އެމެރިކާއިން ގާއިމުކުރަނީ

އިސްރާއީލްގެ އަނިޔާވެރި އަމަލުތަކުގެ ސަބަބުން ބަންދުވެފައިވާ ޣައްޒާއަށް އެހީ ވެއްދުމަށްޓަކައި ޣައްޒާގެ އައްސޭރިފަށުގައި ވަގުތީ ބަނދަރެއް އެމެރިކާއިން ގާއިމުކުރުމަށް ރައީސް ބައިޑަން، އެމެޖެންސީ މިލްޓްރީ މިޝަނެއް އިއުލާން ކުރައްވައިފިއެވެ.

ބުރާސްފަތި ދުވަހުގެ ރޭ ސްޓޭޓް އޮފް ދަ ޔޫނިއަންގައި ދެއްވި ތަގުރީރުގައި ރައީސް ޖޯ ބައިޑަން ވަނީ ޣައްޒާގެ އައްސޭރިފަށުގައި މެޑިޓެރޭނިއަން ކަނޑުގައި އިންސާނީ އެހީ ހޯދުމަށް ބަނދަރެއް ހެދުމަށް "އިމަޖެންސީ" އަސްކަރީ މިޝަނެއް އިއުލާނު ކުރައްވާފައެވެ.

އެމެރިކާގެ ކެޕިޓޮލޮލުން ކޮންގްރެސްއަށް ދެއްވި ތަގުރީރުގައި ބައިޑަން ވިދާޅުވީ، ކާބޯތަކެއްޗާއި ފެނާއި ބޭހާއި ވަގުތީ ހިޔާތައް ހިފައިގެން ބޮޑެތި އުޅަނދުތައް ވަދެވޭނެ ގޮތަށް ޣައްޒާގެ އައްސޭރިފަށުގައި މެޑިޓެރޭނިއަން ކަނޑުގައި ވަގުތީ ބަނދަރެއް ގާއިމުކުރުމަށް ކުއްލި މިޝަނެއްގައި އިސްކޮށް ހަރަކާތްތެރިވުމަށް އެމެރިކާގެ އަސްކަރިއްޔާއަށް އަންގަވަމުން ގެންދަވާ ކަމަށެވެ.

މި ވަގުތީ ބަނދަރުގެ ސަބަބުން ކޮންމެ ދުވަހަކު ވެސް ޣައްޒާއަށް އިންސާނީ އެހީތެރިކަން ލިބޭ މިންވަރު ބޮޑުތަނުން އިތުރުވެގެންދާނެކަމަށާއި، އެކަމަކު އިސްރާއީލުން ވެސް އެ ޒިންމާ އަދާކުރަން ޖެހޭނެ ކަމަށް ބައިޑަން ވިދާޅުވިއެވެ.

ޑިފެންސްގެ އިސް އޮފިޝަލަކު ވިދާޅުވީ ބަނދަރުގެ މައިގަނޑު މަޤްޞަދަކީ ދުވާލެއްގެ މައްޗަށް އިތުރު އެތައް ސަތޭކަ ޓްރަކްލޯޑުގެ އެހީގެ ކެޕޭސިޓީ ފޯރުކޮށްދިނުން ކަމަށެވެ.

ދިފާއީ ދާއިރާގެ އިސް އޮފިޝަލަކު ވިދާޅުވި ގޮތުގައި މި މަސައްކަތަކީ އެމެރިކާ އާއި ޕާޓްނަރު ގައުމުތަކުން ކުރިއަށް ގެންދާ މަސައްކަތެއް ކަމަށާއި "ޕްލޭންކޮށް ތަންފީޒު ކުރަން އެތައް ހަފުތާއެއް ނަގާނެ" ކަމަށެވެ. އޮފިޝަލް ވިދާޅުވީ މިޝަން ފުރިހަމަ ކުރަން ބޭނުންވާ ސިފައިން މިހާރުވެސް އެ ސަރަހައްދުގައި އެބަތިބި ކަމަށާއި ނޫނީ ވަރަށް އަވަހަށް އެތަނަށް ދާނެ ކަމަށެވެ.

ޑިފެންސްގެ އިސް އޮފިޝަލް ވިދާޅުވީ މި އޮޕަރޭޝަންގައި އެމެރިކާ ސިފައިން ބިންމަތީގައި ފޯރިމަރަން ތިބެން ނުޖެހޭނެ ކަމަށެވެ. ވައިޓް ހައުސްގެ އިސް އޮފިޝަލަކު ވިދާޅުވީ އެމެރިކާގެ އަސްކަރިއްޔާއަކީ ވަރަށް ހާއްސަ ގާބިލުކަމެއް ލިބިފައިވާ އަސްކަރިއްޔާއެއް ކަމަށާއި އެއީ އާދަޔާ ހިލާފު ކަމެއް ކަމަށެވެ.

ޑިފެންސް އޮފިޝަލް ވިދާޅުވީ އެހީގެ އިބްތިދާއީ ޝިޕްމަންޓްތައް ބަނދަރަށް އަންނާނީ ސައިޕްރަސް މަގުން ކަމަށެވެ.

އެ އޮފިޝަލް ނޫސްވެރިންނާ ވާހަކަ ދައްކަވަމުން ވިދާޅުވީ، އެއްގަމު މަގުން ޣައްޒާއަށް އިތުރު އެހީތަކެއް ދިނުމަށް އެމެރިކާއިން އިސްރާއީލަށް ބާރުއަޅަމުން އަންނަ ކަމަށާއި، އެއީ "އެންމެ ހަރުދަނާ، ޚަރަދު ކުޑަ" ގޮތް ކަމަށެވެ.

ޑިފެންސް އޮފިޝަލް ވިދާޅުވީ ވަގުތީ ގޮތުން ހަނގުރާމަ ހުއްޓާލުމުގެ އެއްބަސްވުމެއް ހޯދުމަކީ އެހީ ލިބޭނެ އެންމެ ރަނގަޅު ގޮތް ކަމަށެވެ.

ރަމަޟާން މަހުގެ ކުރިން އެއްބަސްވުމަކަށް އައުމާ ބެހޭގޮތުން ސުވާލު ކުރުމުން ވައިޓް ހައުސްގެ އިސް އޮފިޝަލަކު ވިދާޅުވީ "މި މަޝްވަރާގެ ސުންގަޑި ފަދަ ނިންމުންތަކުގެ މައުލޫމާތު އެނގިވަޑައި ނުގަންނަވާ ކަމަށެވެ.

ދިފާއީ އިސް އޮފިޝަލަކު ވިދާޅުވީ އޮކްޓޯބަރު މަހުގެ ހަތް ވަނަ ދުވަހު ހަނގުރާމަ ފެށި ފަހުން އެމެރިކާއިން ޣައްޒާއަށް 180 މިލިއަނަށް ވުރެ ގިނަ ޑޮލަރުގެ އެހީ ދީފައިވާ ކަމަށެވެ.

ދިފާއީ އޮފިޝަލް ވިދާޅުވީ އިސްރާއީލުން ފާއިތުވި ދުވަސްތަކުގައި މަސައްކަތް ކުރަމުން ދަނީ ޣައްޒާއަށް ތިންވަނަ ބިމެއް ހުރަސްކުރުމަށް ކަމަށާއި އޭގެ ސަބަބުން ޣައްޒާގެ އުތުރުގެ އާބާދީއަށް ސީދާ އެހީތެރިކަން ފޯރުކޮށްދެވޭނެ ކަމަށެވެ. އަދި މި ޕެސެޖް މެދުވެރިކޮށް ފުރަތަމަ ޑެލިވަރީ ކުރިއަށް އޮތް ހަފުތާގެ ތެރޭގައި ކުރެވޭނެ ކަމަށް އެމެރިކާއިން އުންމީދުކުރާ ކަމަށް އޮފިޝަލް ވިދާޅުވި އެވެ.

ޕެންޓަގަންގެ އޮފިޝަލް އިތުރަށް ވިދާޅުވީ އެމެރިކާއިން ޣައްޒާއަށް ތިންވަނަ ފަހަރަށް ވައިގެ މަގުން އެހީ ގެނައީ ބުރާސްފަތި ދުވަހުގެ ހެނދުނު ކަމަށެވެ. މި ތިން ޑްރޮޕްގެ ތެރޭގައި ޖުމްލަ 113،000 އެއްހާ ކެއުން ހިމެނޭ 192 ބަންޑަލް ހިމެނޭ ކަމަށް އޮފިޝަލް ވިދާޅުވި އެވެ.