އެއް ބަޔަކު ބޮޑު އަގުގައި ޓިއުޝަން ދޭއިރު، ދޮށީ އުމުރުގެ ފަރުދަކު ވަމުންދާ ހިތްގައިމު ގުރުބާނީ

ފިލިޕީންސްގެ ވެރިރަށް މެނީލާގެ ކާރޫބާރޫ ބޮޑު ވިޔަފާރި މަރުކަޒުގެ ކުޑަ ތަންކޮޅެއް ބޭރުން ފެންނަން އެ ހުރި ގެއަކީ، ފޮތް ކިޔުމާއި އެއްވަރަށް، ފޮތް އެއްކޮށް، އިންތިހާ ލޯތްބާއެކު އެ ފޮތްތައް ބަލަހައްޓާ ހެނާންޑޯ ގުއަންލާއޯގެ ގެއެވެ. އޭނާ ފަދައިން ފޮތް ކިޔުމަށް ލޯބިކުރާ ހަމަ ކޮންމެ މީހަކަށްވެސް އެ ގޭގެ ދޮރުތައް ވަނީ ހުޅުވާލާފައެވެ. ފޮތް ކިޔުމަކީ ހެނާންޑޯގެ މުޅި ހަޔާތުގައިވެސް އޭނާ އެ ކަމެއް ކުރަން އެންމެ ލޯބިކުރާ ކަންތައްތަކުގެ ތެރެއިން ކަމެކެވެ.

2 ފަންގިފިލާއަށް ހަދާފައިވާ އެ ގޭގައި އެތައް ހާސް ފޮތެއް އެބަހުއްޓެވެ. އުމުރުން 72 އަހަރުގެ ހެނާންޑޯ ބުނިގޮތުގައި، އޭނާގެ މަގުސަދަކީ އަދަބިއްޔާތުގެ ތެރެއިން، އެއްވެސް އިތުރު އަގަކާނުލައި އިތުރު ބަޔަކަށް އިލްމާއި މައުލޫމާތު ފޯރުކޮށްދިނުމެވެ. ހެނާންޑޯގެ ގެއިން ލިބެން ހުރި ހުރިހާ ފޮތަކީވެސް އެހެން މީހަކު ބޭނުންކުރުމަށްފަހު ދޫކޮށްލާފައި ނުވަތަ ހަދިޔާކޮށްފައިވާ ފޮތްތަކެވެ.

މި މަސައްކަތަކީ މީގެ ވިއްސަކަށް އަހަރު ކުރިން ހެނާންޑޯ ފެށި މަސައްކަތެކެވެ. މަސައްކަތް ފަށައިގަތީ އެންމެ ފަންސާހަކަށް ފޮތާ އެކީގައެވެ. މަގުގެ އެއްފަރާތެއްގައި ކުރަން ފެށި މަސައްކަތް ފުޅާވަމުން ގޮސް، މިއަދާ ހިސާބަށް އާދެވުމުގައި އެތައް ބައެއްގެ ދީލަތި އެހީތައް ހެނާންޑޯއަށް ލިބިފައިވެއެވެ. ފޮތުގެ ސަޕްލައި ދަށްވެގެން، ނުވަތަ ފޮތް ލިބޭ މިންވަރު މަދުވެގެން އުޅޭކަށް ނުޖެހެއެވެ.

"ރީޑިންގ ކްލަބް 2000"ގެ ނަމުގައި ހެނާންޑޯ ހިންގާ އާންމު ކުތުބުޚާނާއިން އެތައް ރޯންރޯއެއްގެ ފޮތް ލިބެން ހުރެއެވެ. އުންމީދަކީ ފިލިޕީންސްގެ ޒުވާން ކުދިންގެ މެދުގައި އިންތިހާއަށް ދަށްވެފައިވާ ކިޔުމުގެ ދޭހައިގެ ފަންނުވެރިކަމަށް ހިތްޖެއްސުމެވެ. ހެނާންޑޯ ގަބޫލުކުރާގޮތުގައި، އޭނާ ދިރިއުޅޭ ސަރަހައްދުގެ ގިނަ ކުދިންނަކީ ފޮތް ލިބުން ދަތި ކުދިންނެވެ. ޚަރަދު ބޮޑުކަމުންނެވެ. ގިނަ ކުދިންނަކީ އިންތިހާ ފަގީރު ހާލުގައި އުޅޭ ކުދިންނަށް ވާއިރު، އިލްމު ހާސިލު ކުރުމަކީ 'ލަގްޒަރީ'އަކަށް އޮންނަނީ ވެފައެވެ.

ހެނާންޑޯގެ ކުތުބުޚާނާއަށް އަންނަ މީހުންގެ ފަރާތުންވެސް އޭނާއަށް ލިބެނީ ތައުރީފެވެ. ލެނާންޑޯގެ ޚިދުމަތް، އެމީހުން ބަލައިގަންނަނީ އިޚްލާސްތެރިކަމާއެކުއެވެ. ނާޖާއިޒު ގޮތެއްގައި ފައިދާ ނަގާ މީހަކު ނުފެނެއެވެ.

ޕްރޮގްރާމް ފޮރ އިންޓަރނޭޝަނަލް ސްޓޫޑަންޓް އެސެސްމަންޓްގެ ރެކޯޑްތަކަށް ބަލާއިރު، ފިލިޕީންސްގެ ދަރިވަރުންނަކީ ހިސާބު އިލްމާއި ސައެންސް، އަދި ކިޔުންތެރިކަމުގެ ހުނަރުގެ ރޮނގުން މުޅި ދުނިޔޭގެ ނިސްބަތުންވެސް އެންމެ ފެންވަރު ދަށް ދަރިވަރުންނެވެ. އޯގަނައިޒޭޝަން ފޮރ އިކޮނޮމިކް ކޯޕަރޭޝަން އެންޑް ޑިވަލޮޕްމަންޓް (އޯއީސީޑީ)ން ކުރިޔަށްގެންދާ މި ދިރާސާގައި ދުނިޔޭގެ އެކި ކަންކޮޅުތަކުން 81 ގައުމަކުން ބައިވެރިވާއިރު، ފިލިޕީންސް ރޭންކިންގއަކީ 77ވެ.