އެންމެ ކުޑަ އަމާޒު ހާސިލުވެއްޖެ: ޓުޗެލް

ބަޔާން މިއުނިކަށް، އެ ޓީމުން ކަނޑައެޅި އެންމެ ކުޑަ އަމާޒު ހާސިލުވެއްޖެ ކަމަށް، އެ ޓީމަށް އިރުޝާދު ދެމުން އަންނަ ތޯމަސް ޓުޗެލް ބުނެފި އެވެ.

ޓުޗެލް މިހެން ބުނީ، ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ދެ ވަނަ ލެގުގައި، އަމިއްލަ ދަނޑުގައި ލާޒިއޯ ބަލިކޮށް ކުއާޓާ ފައިނަލުން ޖާގަ ހޯދި މެޗަށްފަހު ވާހަކަ ދައްކަމުންނެވެ. ފުރަތަމަ ލެގުގައި 1-0 އިން ބަޔާން ބަލިވެފައި އޮތަސް، ދެ ވަނަ ލެގު 3-0 އިން އެ ޓީމު ވަނީ ކާމިޔާބު ކޮށްފަ އެވެ.

އެ މެޗަށްފަހު ވާހަކަ ދައްކަމުން ޓުޗެލް ބުނީ، ޗެމްޕިއަންސް ލީގަށް ބަޔާނުން ކަނޑަ އެޅި އެންމެ ކުޑަ އަމާޒަށް ވާސިލްވެވިއްޖެ ކަމަށެވެ. އޭނާ އެ އިޝާރާތް ކުރީ މުބާރާތުގެ ކުއާޓާ ފައިނަލްގެ ޖާގައެއް ބަޔާނަށް ލިބުނު ލިބުމަށެވެ. އެއީ ވަރަށް މުހިންމު ކަމެއް ކަމަށާއި، އެކަން ހާސިލުވުމުން އުފާވާާ ކަމަށް ވެސް ޓުޗެލް ވަނީ ބުނެފަ އެވެ.

އިތުރަށް އޭނާ ބުނީ، ދެން ކުރަން އޮތް މަސައްކަތަކީ ހިތްވަރާއެކު ކުރިއަށް އޮތް ތަނަށް މަސައްކަތް ކުރުން ކަމަށެވެ. ކުރިއަށް އިތުރު ފިޔަވަޅެއް އެޅުމަށްޓަކައި، ގިނަ މަސައްކަތްތަކެއްކޮށް، ގިނަ ކަންތައްތަކެއް ރަނގަޅު ކުރަން ޖެހޭކަން އޭނާ ފާހަގަ ކުރި އެވެ. އެހެންކަމުން އެކަންކަމާއެކު، ޓީމެއްގެ ގޮތުގައި ކުރިއަށް ދާން ޖެހޭ ކަމަށް ވެސް ޓުޗެލް ބުންޏެވެ. ހަމައެހެންމެ މެޗުގެ ކުރިން ޓީމަށް އިރުޝާދު ދިން ވަގުތު، އެއްޗެއްގައި ޖެހި ކަމަށާއި، އެކަމުގެ ސަބަބުން އޭނާގެ އިނގިއްޔަށް ކޮންމެ ވެސް ވަރެއްގެ އަނިޔާއެއް ލިބުނު ކަމަށް ވެސް ޓުޗެލް ވަނީ ބުނެފަ އެވެ.

މި ސީޒަންގައި ބަޔާންގެ ނަތީޖާތައް ދަށްވެފައިވާއިރު، އެ ޓީމުގެ އިސްވެރިން ތިބީ އެކަމާ ނުތަނަވަސްވެފަ އެވެ. ބަޔާންގެ އިސްވެރިންނާ ޓުޗެލްއާ ދެމެދު ކުރިއަށް ގެންދިޔަ މަޝްވަރާތަކަށްފަހު، ޓުޗެލް ވަނީ މި ސީޒަނަށްފަހު އެ ކުލަބު ދޫކޮށްލަން ނިންމައިފަ އެވެ. ނަމަވެސް އޭނާ ބުނީ، ސީޒަން ނިމެންދެން ބަޔާނަށް ކާމިޔާބު ހޯދުމަށް މަސައްކަތް ކުރާނެ ކަމަށެވެ.