ޒޯން ބުރުގައި ކުޑަހުވަދޫއިން ބިލެތްފަހީގެ މައްޗަށް ކުރިހޯދައިފި

މިނިވަން ޗެމްޕިއަންޝިޕް ފުޓްބޯޅަ މުބާރާތުގެ ޒޯން 5 ގައި ދ.ކުޑަހުވަދޫއިން ފ.ބިލެތްދޫގެ މައްޗަށް ފަސޭހަކަމާއެކު ކުރިހޯދައިފިއެވެ.

ހޯމަ ދުވަހު މިދެޓީމް ބައްދަލުކުރި މެޗް ކުޑަހުވަދޫއިން ކާމިބުކުރީ 3-0 ގެ ނަތީޖާއަކުންނެވެ. މެޗުގައި ކުޑަހުވަދޫ ޓީމުގެ ފަރާތުން މޮޅު ކުޅުމެއް ފެނިގެން ދިޔައިރު އެޓީމުން ވަނީ ފުރަތަމަ ހާފުގެ ތެރޭގައި މެޗުގެ ލީޑު ނަގާފައެވެ. އެގޮތުން އެޓީމުން ފުރަތަމަ ލަނޑުޖަހާ ލީޑު ނަގާފައިވަނީ، 24 ވަނަ މިނެޓުގައެވެ. މި ލަނޑު އެޓީމަށް ކާމިޔާބު ކޮށްދިނީ މެޗުގެ މޮޅު ކުޅުންތެރިޔާގެ މަގާމު ހޯދި އަހުމަދު ޝިނާޒް އެވެ. މި ލަނޑަށް ފަހުގައިވެސް އެޓީމަށް ވަނީ ލަނޑު ޖަހާނެ ގިނަ ފުރުސަތުތަކެއް ލިބި ބޭކާރު ވެފައެވެ. ފުރަތަމަ ހާފު ނިމުނީ 1-0 ގެ ނަތީޖާއަކުން ކުޑަހުވަދޫ ލީޑުގައި އޮވެގެންނެވެ.

ދެވަނަ ހާފުގައި އެޓީމުން ވަނީ ކުޅުން އިތުރަށް ވަރުގަދަކޮށް ލީޑު އިތުރަށް ފުޅާކޮށްފައެވެ. އެޓީމުން ލީޑު ފުޅާކުރި ލަނޑު 52 ވަނަ މިނެޓުގައި އެޓީމަށް ކާމިޔާބުކޮށްދިނީ އިބްރާހިމް ރިޔާޒް އެވެ. އޭގެ ކުޑަ ވަގުތުކޮޅެއްފަހުން އެޓީމުން ވަނީ 3 ވަނަ ލަނޑު ކާމިޔާބުކޮށް ލީޑު އިތުރަށް ފުޅާކޮށްފައެވެ. މި ލަނޑު މެޗުގެ 56 ވަނަ މިނެޓުގައި އެޓީމަށް ކާމިޔާބުކޮށްދިނީ މުހަންމަދު އިސްމާއީލް އެވެ.

މުބާރާތުގައި ޒޯން ބުރުގެ ކުޅުމަށްފަހު ދެން އޮންނާނީ ޒޯންތަކުގެ ޗެމްޕިއަނުންގެ ބުރެވެ. ޒޯން ތަކުގެ ޗެމްޕިއަނުންގެ މެދުގައި ކުޅޭ ބުރަށްފަހު ގަދަ ހަތަރު ޓީމު ދިވެހި ލީގަށް ކޮލިފައިވާނެއެވެ.