ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ފްރާންސްގެ ކެޕްޓަން ކީލިއަން އެމްބާޕޭއާ ގުޅޭ ގޮތުން ކުރި ސުވާލުތަކަށް، އެ ޓީމުގެ ކޯޗު ލުއިސް އެންރީކޭ ފިނި ޖަވާބުތަކެއް ދީފި އެވެ.

ޕީއެސްޖީގައި މިހާތަނަށް އެންމެ މުހިންމު ކުޅުންތެރިޔާގެ ގޮތުގައި ހުރި އެމްބާޕޭ، އެ ކުލަބާއެކު ހަދާފައިވާ އެއްބަސްވުމުގެ މުއްދަތު މި ސީޒަންގެ ނިޔަލަށް ހަމަވާނެ އެވެ. ޕީއެސްޖީން އޭނާގެ އެއްބަސްވުން އައު ކުރުމަށް މަސައްކަތް ކުރި ނަމަވެސް، އެމްބާޕޭ ވަނީ އެއްބަސްވުން އައު ނުކުރަން ނިންމައިފަ އެވެ. އެކަން އޭނާ އެ ކުލަބުގެ ވެރިންނަށް ވެސް އެންގި އެވެ. އަދި މިހާރު އެމްބާާޕޭ މަސައްކަތް ކުރަމުން އަންނަނީ ސްޕެއިންގެ ރެއާލް މެޑްރިޑަށް ބަދަލުވާށެވެ.

ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ދެ ވަނަ ލެގުގައި ޕީއެސްޖީން ސްޕެއިންގެ ރެއާލް ސޮސިއެޑާޑާ ދެކޮޅަށް ނިކުންނަ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ނޫސްވެރިން ވަނީ އެމްބާޕޭއާ ގުޅޭ ގޮތުން ސުވާލު ކޮށްފަ އެވެ. އެގޮތުން ި ފަހަކަށް އައިސް ބައެއް މެޗުތަކުގެ ވަކި ހިސާބަކުން، އެންރީކޭ އެމްބާޕޭ ބަދަލު ކުރާތީ އެ ސުވާލު އަމާޒު ކުރި އެވެ. އަދި އެމްބާޕޭއާ ގުޅޭ އެހާ ގިނަ ސުވާލުތަކެއް ކުރިމަތިވާއިރު، އެންރީކޭ އެކަން ހިފަހައްޓަނީ ކިހިނެއްތޯ ވެސް ސުވާލު ކުރި އެވެ.

އެކަމާ ގުޅިގެން ވާހަކަ ދައްކަމުން އެންރީކޭ ބުނީ، އެކަން އޭނާ ހިފަހައްޓަނީ އޭނާ އަށް ވެސް ފަސޭހަ ވާނެ ގޮތަށް ކަމަށެވެ. ޚާއްސަކޮށް ނޫސްވެެރިންނަށް އެމީހުން ބޭނުން ސުވާލެއް ކުރުމުގެ ފުރުސަތު އޮންނާނެލަމަށް އެންރީކޭ ބުންޏެވެ. އެހެންކަމުން، ޖަވާބު ދޭން ހުންނަ މީހާ އަށް ވެސް، އެމީހަކު ބޭނުން ޖަވާބެއް ދެވޭނެ ކަމުގައި ވެސް އެންރީކޭ ބުންޏެވެ. އެކަން ފާހަގަކޮށް އެންރީކޭ ބުނީ، އޭނާ ޤަބޫލު ކުރާ ހަމައަކީ އެއީ ކަމަށެވެ.

އެމްބާޕޭ ޕީއެސްޖީ ދޫކޮށްލަން ނިންމާ ވާހަކަ އެންގުމުން، ޕީއެސްޖީގެ ވެރިން ވެސް ވަނީ އޭނާގެ ނިންމުމަށް އިޙުތިރާމް ކުރާނެ ކަމަށް ބުނެފަ އެވެ. މި ފަހުން ޕީއެސްޖީން ކުޅުނު މެޗުތަކުގެ ވަކި ހިސާބަކުން އެމްބާޕޭ ބަދަލު ކޮށްފައިވާއިރު، އެންރީކޭ ބުނީ އެއީ އެމްބާޕޭ އަށް އިޙުތިރާމް ކުޑަ ކުރަން ކުރާ ކަމެއް ނޫން ކަމަށެވެ. އޭނާ ބުނީ، ޕީއެސްޖީން ވެސް އެމްބާޕޭ ނެތް ޙާލަތަކަށް ތައްޔާރުވާން ޖެހޭ ކަމަށާއި، އަބަދު އެމްބާޕޭ ކުލަބުގައި ނުހުންނާނެ ކަމަށެވެ.