ހުވަފަތްވީ މާބަނޑު ޙާލުގަ... ކެކްޓަސް ކޮޅެއް ނޫނީ ކާނެ އެއްޗެއްނެތް: އިންސާނީ ޙައްޤޭ ގޮވި މީހުން މިއަދު ކޮބާ؟

ފަލަސްޠީނުގެ ޣައްޒާގައި ނިރުބަވެރި އިޒްރޭލުން ހިންގަމުން ގެންދާ ވަރުގަދަ ޤަތުލުޢާންމާއި ނަސްލު ދޮވެލުމުގެ ހަނގުރާމައިގެ ޖަރީމާތަކަށް 5 މަސް ވާން ގާތް ވެފައި ވާ އިރު، މުޅި ޣައްޒާއަށް ފެތުރިފައި އޮތް ބަނޑުހައިހޫނުކަމުގެ ބަލިމަޑުކަމުގެ ވާހަކަ ދައްކާ ކޮޅުންލާކަށް ނެތެވެ.

2.3 މިލިއަން މީހުންގެ ޢާބާދީއެއް އޮތް ޣައްޒާގެ އެންމެންހެން މިއަދު ރެފިއުޖީންގެ ގޮތުގައި ދިރިއުޅެމުން ދާ އިރު، އެހާމެ ގިނަ މީހުން ތިބީ އިންތިހާ ހައިހޫނު ކަމުގެ ޙާލަތުގައި ބަނޑަށްޖެހުމުގެ ތުންފަތްމަތީގައެވެ. ހަނގުރާމައިގެ މައިދާނުގައި ދުވާލެއްގެ 24 ގަޑިއިރު ފާއިތުވެގެން ދާއިރު ކާލާނެ އެއްޗެއް ނުލިބޭތާ، ތާހިރު ފެންފޮދެއްގެ މިންވަރުވެސް ނުލިބޭ މީހުންގެ ޢަދަދު އިންތިހާއެވެ. ކުޑައެއް ބޮޑެއް ތަފާތެއް ނެތެވެ.

ޢުމުރުން އެންމެ 8 އަހަރުގެ ސިރާޖު ޝިހާދާ ކިޔައިދިން ގޮތުގައި، ޣައްޒާގެ މެދު ތެރޭ އަވަށެއް ކަމަށް ވާ ދީރް އަލް-ބަލާޙަށް ބޮޑު ދައިތައާއިއެކު ބަދަލުވުމާ ހަމައަށް، އޭނާއާއި އޭނާގެ 2 ބޭބެވެސް ކައި އުޅުނީ ކޮންމެ 2 ދުވަހަކުންނެވެ. ސިރާޖްގެ ޢާއިލާ ނިސްބަތް ވަނީ ޤަތުލުޢާންމުގެ ކުރީކޮޅު، ޙަމަލާތައް އެންމެ ވަރުގަދަ ކުރި އުތުރުގެ ޣައްޒާ ސިޓީއަށެވެ. އެ ސަރަޙައްދު ދޫކޮށް، އަލް-އަޤްޞާ މާޓިޔަރޒް ހޮސްޕިޓަލު ސަރަޙައްދަށް ބަދަލުވީ، ބޮޑުދައިތައާއެކު، ވަގުތީ ކޭމްޕަކަށެވެ. ރެފިއުޖީންގެ ގޮތުގައެވެ.

ސިރާޖުގެ 2 ބޭބެއަކީވެސް ޢުމުރުން މާ ދޮށީ ބައެއް ނޫނެވެ. އެންމެ ދޮށީ ކުއްޖަކީ 11 އަހަރުގެ ޞާދްއެވެ. މެދަށް ހުންނަނީ 9 އަހަރުގެ އިސްމާޢީލްއެވެ. 3 ބެއިންގެ މަންމައާއި އިތުރު ބޭބެއެއް މި ދުނިޔެއާ ވަކިވެ ދިޔައީ އިޒްރޭލުގެ ޤަތުލުޢާންމުގައެވެ. ވަގުތީ ކޭމްޕުގައި ދިރިއުޅޭ ބޮޑުދައިތައަކީ މާބަނޑު މީހެކެވެ. ޣައްޒާގެ އުތުރުގައި މަޑުކުރީ 3 ބެއިންގެ ބައްޕައާއި މާމައެވެ.

ކައި އުޅެނީ ކޮންމެ 2 ދުވަހަކުންނޭ ބުނި ކަމުގައި ވިޔަސް، އެ ވަރުންވެސް ކާން ލިބެނީ ކޮން އެއްޗެއްކަން ވިސްނާލެވުނުތޯއެވެ؟ ޞާދް ކިޔައި ދިން ގޮތުގައި، އެ ކުދިންނަށް ކާން ލިބުނީ ދޫނި ކާން ތައްޔަރުކޮށްފައި ހުންނަ ގޮވާމުން ހަދާފައި ހުންނަ ޕާނެވެ.

އެމެރިކާއާއި އެމެރިކާގެ އެކުވެރި ޤައުމުތަކުގެ އައްޑަނައިގެ ނިވަލުގައި އޮވެގެން އިޒްރޭލުން ހިންގަމުންދާ ޤަތުލުޢާންމާ ދިމާކޮށް، އިޒްރޭލުން ދަނީ ޣައްޒާއަށް ބޭނުންވާ ޛަރޫރީ ތަކެތީގެ ސަޕްލައިއަށްވެސް ހުރަސް އަޅަމުންނެވެ. އެންމެ ކުޑަ މިނުން، ގޮދަން ފުށް ކޮޅެއްވެސް މިހާރު ނުލިބެޔޭ ދެންނެވިދާނެއެވެ. އިންތިހާ ބަނޑުހައި ހޫނު ކަން ފެތުރިފައި ވާ އިރު، ބާޒާރުން ލިބެން ހުރި މަދު ކާބޯތަކެތީގެ އަގުތައް އުޅެނީ އެހާ މަތީގައެވެ. ޣައްޒާގެ ރަށްވެހިންނަށް މަޖުބޫރުވީ ބާރްލީއާއި ރޯ ޒުވާރި އޮށް މުގުރާ، ފުށަށް ހަދައިގެން އެ ބޭނުން ކުރާށެވެ. އަނެއް ބަޔަކަށް މަޖުބޫރުވީ، ޙައިވާނުތަކަށް ޚާއްޞަކޮށްފައި ވާ އެއްޗެހި ކެއުމަށެވެ.

ޤަތުލުޢާންމުގެ ތެރޭގައި ހުވަފަތްވެފައި އިން މާބަނޑު ބޮޑުދައިތަ، އީމާން ޝިހާދާގެ ވާހަކަތަކުންވެސް އިވެނީ ހާސް ކަމާއި ނުތަނަވަސްކަމުގެ އަޑެވެ.

ޤަތުލުޢާންމުގެ ކުރިން ޣައްޒާގައި ކާބޯތަކެތި ލިބެން ހުރި މިންވަރާ އަޅާ ބަލާއިރު، މިހާރު އެ ރަށުގައި އެންމެ އެތިފުކެއްގެ މިންވަރުވެސް ނެތެވެ. އެހީ ދިނުމުގެ މަސައްކަތުގައި އުޅޭ މީހުންގެ ވާހަކަތަކުން އެނގޭ ގޮތުގައި، ޣައްޒާގެ ރަށްވެހިންނަށް ބަލައިލުމުން އެކަނިވެސް، އެ މީހުން ބަނޑަށްޖެހިފައި ވާ މިންވަރު ހާމަވެއެވެ. ވަކިން ޚާއްޞަކޮށް، އުތުރުގެ ސަރަޙައްދުތަކުގައެވެ.

ބަނޑުހައިހޫނުކަމަށް ކެތް ނުކުރެވިގެން ބައެއް މީހުން މިހާރު ވަނީ އޭތިމީތި ކާން ފަށާފައެވެ. އޭގެ ތެރޭގައި ކެކްޓަސް ގަހުގެ ފަތްވެސް ހިމެނެއެވެ. ކާބޯތަކެތީގެ ދަތިކަން އިންތިހާއަށް ކުރިމަތިވެފައި އޮތުމުގެ ސަބަބުން، މައިގަނޑު ކެއުމަކަށްވެސް ވެފައި އޮތީ ކެކްޓަސް ގަހުގެ ފަތް ކަމަށް އެމީހުން ބުނެއެވެ.

ޤަތުލުޢާންމުގައި ގެދޮރު ގެއްލިފައި ވާ މަރްވާން އަލް-އަވާދިޔާ ބުނި ގޮތުގައި އެނާގެ ޢާއިލާ ކެކްޓަސް ކާން ފެށީ އިތުރު އެހެން އެއްވެސް ގޮތެއް ނެތިގެންނެވެ.

ފެބުރުއަރީ 27 ވަނަ ދުވަހު، އދގެ ސަލާމަތީ މަޖިލީހުގެ ބައްދަލުވުމެއްގައި ވާހަކަދައްކަވަމުން އދގެ އިސް އޮފިޝަލަކު ވިދާޅުވި ގޮތުގައި، ޣައްޒާގެ ޢާބާދީގެ 4 ބައިކުޅަ 1 ބައި މީހުންނާއި އިންތިހާ ބަނޑަށްޖެހުމާ ދެމެދު އޮތީ ހަމަ އެންމެ ފިޔަވަޅެކެވެ. މަސައްކަތްތަކެއް ނުކޮށްފިނަމަ، އެއަށްވުރެވެސް އިތުރު ބަޔަކު ބަނޑަށް ޖެހުމުގެ ފުރުޞަތު އެބަ އޮތް ކަމުގެ އިންޒާރުވެސް އޮފިޝަލު ވަނީ ދެއްވާފައެވެ.