"ބިލު ފާސްކޮށްފައިވަނީ ހުކުމުގައި ބުނެފައިވާ އަދަދަށްވުރެވެސް ބޮޑު އަޣުލަބިއްޔަތަކުން، ބިލް ތަސްދީގުކުރެއްވުން ރައީސަށް ލާޒިމު"
މި ބިލް ތަސްދީގު ކުރެއްވުމަކީ ރައީސަށް ލާޒިމުކަމެއްކަންވެސް އޭނާ ފާހަގަ ކުރެއްވި
ކުރީގެ ޕްރޮސެކިއުޓަރ ޖެނެރަލް އަހުމަދު މުއިއްޒު
އިންތިޚާބު ފަސް ކުރުމާ ގުޅޭ ބިލް މިހާރު ތަސްދީގު ކުރެއްވުމަކީ ރައީސަށް ލާޒިމުކަމެއްކަމަށް ކުރީގެ ޕްރޮސިކިއުޓަ ޖެނެރަލް އަހްމަދު މުއިއްޒު ވިދާޅުވެއްޖެއެވެ.
ކުރީގެ ޕީޖީ އެހެން ވިދާޅުވީ، ދެވަނަ ފަހަރަށް ބިލު ފާސްކޮށްފައި މަޖިލީހުން ފޮނުވުމުންވެސް އެ ބިލު ތަސްދީޤު ނުކުރައްވައި، އެކަމުގައި ބަންޑާރަނައިބުގެ ލަފަޔަކަށް ރައީސް އެދިވަޑައިގަންނަވާތީ، އެކަމަށް އަލިއަޅުވާލައްވާ އެކްސްގައި ކުރެއްވި ޕޯސްޓެއްގައެވެ.
ކުރީގެ ޕީޖީ އަހްމަދު މުއިއްޒު ވިދާޅުވީ، ބިލު ފާސްކޮށްފައިވަނީ ސުޕްރީމް ކޯޓުގެ ހުކުމުގައި ބުނާ އުސޫލުން މެންބަރުންގެ އަދަދު ގުނުމުން ފާސްކުރުމަށް ބޭނުންވާ އަދަދަށްވުރެ ބޮޑު އަޣުލަބިއްޔަތަކުން ކަމަށެވެ.
ވުމާއެކު، މި ބިލް ތަސްދީގު ކުރެއްވުމަކީ ރައީސަށް ލާޒިމުކަމެއްކަންވެސް އޭނާ ފާހަގަ ކުރެއްވިއެވެ.
ސުޕްރީމް ކޯޓުގެ ނިންމުމުގައި މަޖިލީހުގެ ޖުމުލަ މެންބަރުންގެ އަދަދު ގުނާނީ 87 ކަމަށް ބަލައިގެންކަމަށް ނިންމާފައިވާއިރު، އެ އަދަަދަށް ބެލި ނަމަވެސް، ބުދަ ދުވަހު މަޖިލީހުން ފާސްކުރި ބިލަށް ޙުކުމުގައި ބުނެފައިވާ އަދަދަށް މެންބަރުން ވަނީ ވޯޓު ދެއްވާފައެވެ. އެގޮތުން ބުދަ ދުވަހު މަޖިލީހުން ފާސްކުރި ބިލު، ދެވަނަ ފަހަރަށް ފާސްކުރީ ދެބައިކުޅަ އެއްބަޔަށް ވުރެ ބޮޑު އަގުލަބިއްޔަތުގެ ތާއީދާ އެކު އެވެ. އެއީ ވޯޓުގައި ބައިވެރިވި މެންބަރުންގެ ތެރެއިން 47 މެންބަރުންގެ ވޯޓުންނެވެ.
