ޓައިޓޭންސްއާއި ބޯލާރސް އެކެޑަމީ ގުޅިގެން މުބާރާތެއް ބާއްވަނީ
މުބާރާތް އޮންނާނީ މާރޗް 1-8 އަށް
ޓައިޓޭންސް އެކެޑަމީ ކުޅުންތެރިން ޕްރެކްޓިސްގައި
ޓައިޓޭންސް އާއި ބޯލާރސް ބާސްކެޓްބޯޅަ އެކެޑަމީ ގުޅިގެން މުބާރާތެއް ބާއްވަން ތައްޔާރުވެއްޖެއެވެ.
މިމުބާރާތަކީ ދެ އެކެޑަމީގެ ކުޅުންތެރިންނަށް އަމާޒުކޮށް ކުރިއަށްގެންދާ މުބާރާތެކެވެ. ދެ އެކެޑަމީގައި ތަމްރީނު ހޯދަމުންދާ ކުޅުންތެރިން އެއްކޮށްލައިގެން އިންޓަރ ހައުސްއެއް ކަހަލަ ގޮތަކަށް ކުރިއަށްގެންދާ މުބާރާތުގައި 12 އުމުރުފުރާ ހިމެނެއެވެ. ގްރޭޑް 1 ން ފެށިގެން ގްރޭޑް 12 ގައި ކިޔަވާ ދަރިވަރުން ވެސް މުބާރާތުގައި ކުޅޭނެ ކަމަށް ދެ އެކެޑަމީން މައުލޫމާތުދެއެވެ. އެންމެ ބޮޑު އުމުރުފުރާގައި ގައުމީ ސްކޮޑްގެ ބައެއް ކުޅުންތެރިން ވެސް އެކުދިންގެ އުމުރުފުރާގައި ކުޅޭނެކަމަށް ދެ އެކެޑަމީން ބުންޏެވެ.
މި މުބާރާތުން ފުރުޞަތު ދެނީ ހަމައެކަނި ދެ އެކެޑަމީގައި ތިބި ކުޅުންތެރިންނަށެވެ. ނަމަވެސް ކުރިއަށް އޮތްތަނުގައި އިތުރު އެކެޑަމީތަކާ ވެސް ގުޅިގެން މުބާރާތްތައް ބާއްވަން އުއްމީދުކުރާ ކަމަށް ދެ އެކެޑަމީން ބުންޏެވެ. މިފަހަރުގެ މުބާރާތް އޮންނާނީ އަންނަ މާރޗް 1 ން 8 އަށް އެކުވެނި އައުޓްޑޯ ބާސްކެޓްބޯޅަ ކޯޓްގައެވެ. ހަފްތާ ބަންދުގައި ފުލްކޮށް އަދި ރަސްމީ ދުވަސްތަކުގެ މެންދުރުފަހު މެޗުތައް ކުރިއަށް ގެންދާނެއެވެ.
