މެޗުތަކުން ރާއްޖެ ބަލިވިޔަސް ފަސް ޓީމުގެ ތަފާތެއް ނުފެނޭ - އިއްލެ

ފައިވް ނޭޝަންސް ކަޕް ބާސްކެޓްބޯޅަ މުބާރާތުގައި މެޗުތަކުން ބަލިވެ ރާއްޖެއަށް ސެމީފައިނަލްގެ ފުރުސަތު ނުލިބުނަސް ޓީމުތަކުގެ ފަރަގެއް ނުފެންނަކަމަށް، ގައުމީ ޓީމުގެ ކުރީގެ ކޯޗު އަދި ކުޅުންތެރިޔާ އިލްޔާސް އިބްރާހީމް (އިއްލެ) ބުނެފިއެވެ.

ނޭޕާލް އަތުން ބަލިވެ ރާއްޖެއިން މުބާރާތް ނިންމާލި މެޗަށްފަހު ރާއްޖެ ޓީވީއާ ވާހަކަދައްކަމުން އިއްލެ ބުނީ، ސަރަހައްދީ ބާސްކެޓުގައި އިންޑިޔާ ނަގާފައި ދެން މި އޮތް ފަސް ޓީމްގެ ފަރަގެއް ނުފެންނަކަމަށެވެ. ފައިވް ނޭޝަންސް ކަޕްގައިވެސް ޓީމްތަކުގެ ފަރަގު ނުފެންނަ ކަމަށާއި, ރާއްޖެއަށް ދިމާވީ ނަސީބު ދެރަގޮތެއްކަމަށެވެ. އިއްލެ ބުނީ ބާސްކެޓް މެޗެއްގައި ފެށޭ ގޮތް ގޯސްވެގެން ނުވަތަ ނިންމާލުން ގޯސްވެގެން ސްކޯއަށް ފަރަގެއް އަތުވެދާނެކަމަށާއި, ނަމަވެސް އެހެން ކަންކަމަށް ބަލާއިރު މުބާރާތުގައި ވާދަކުރި ފަސް ޓީމުގެވެސް ފަރަގެއް ނެތްކަމަށެވެ.

އިއްލެ ބުނީ މުޅި މުބާރާތުގައި ރާއްޖޭގެ ޓީމުން ކުޅުނު ކުޅުން ގޯސް ނޫންކަމަށާއި, ކުޅުމާމެދު ޝަކުވާއެއް ނެތްކަމަށެވެ. އެކަމަކު މައްސަލަ ދިމާވީ ޝޫޓިންގއާ ހިސާބުންކަމަށް އިއްލެ ބުންޏެވެ. އަމިއްލަ ގައުމުގައި ކުޅުނު މުބާރާތްތަކަށް ބަލާއިރު، މިއީ ގައުމީ ޓީމުގެ ޝޫޓިންގ އެންމެ ދަށް މުބާރާތްކަން އޭނާ ފާހަގަކުރިއެވެ. އިއްލެ ބުނީ ހުރިހާ މެޗެއްގައިވެސް ވަރަށް ރަނގަޅު ވަގުތުތަކާއި ގޯސް ވަގުތުތައް އައިކަމަށެވެ. މައްސަލައަކީ އެއްވަރެއްގައި ނުހިފެހެއްޓުން ކަމަށާއި, އެއްވަރެއްގެ ޓީމްތައް ކުޅޭއިރު އެއްވަރެއްގައި ނުހިފެހެއްޓޭނަމަ މޮޅުވާން އުނދަގޫވާނެކަމަށް އިއްލެ ބުންޏެވެ.

ޓީމް ތަކުގެ ފަރަގު ނެތްކަން ފާހަގަކުރަމުން އިއްލެ ފާހަގަކުރީ މެޗުތަކުން ބަލިވިއިރު ސްކޯގެ ފަރަގެވެ. ގިނަ މެޗުތައް ހުރީ ތިން ހަތަރު ބާސްކެޓެއްގެ ފަރަގުކަން އޭނާ ފާހަގަކުރިއެވެ.