އެމްޑީޕީ ސަރުކާރުގައި އޮތަސް އަދި އިދިކޮޅުގަ އޮތަސް މަޖިލީހުގެ މެޖޯރިޓީ ލިބެންވާނީ އެމްޑީޕީއަށް: ޝާހިދު
ޝާހިދު ވިދާޅުވީ ސަރުކާރުގައި އޮތަސް އަދި އިދިކޮޅު ގައި އޮތަސް އެމްޑީޕީއިން ޤާނޫނު އަސާސީ ޙިމާޔަތްކޮށް، ޤާނޫނުގެ ވެރިކަން ދަމަހައްޓާނެކަމަށް
އެމްޑީޕީގެ ރައީސް ޢަބްދުﷲ ޝާހިދު
އެމްޑީޕީ ސަރުކާރުގަ އޮތަސް، އެމްޑީޕީ އިދިކޮޅުގަ އޮތަސް ރައްޔިތުންގެ މަޖިލީހުގެ މެޖޯރިޓީ ލިބެންވާނީ އެމްޑީޕީއަށްކަމަށް އެމްޑީޕީގެ ރައީސް ޢަބްދުﷲ ޝާހިދު ވިދާޅުވެއްޖެ.
ރައްޔިތުންގެ މަޖިލީހުގެ އިންތިޚާބުގައި ވާދަކުރައްވާ ތޮއްޑޫ ދާއިރާގެ އެމްޑީޕީ ކެންޑިޑޭޓް ހުސެން ސަމީރުގެ ކެމްޕޭން ލޯންޗްކުރުމަށް ކެމްޕޭން ޓީމާއެކު އއ އުކުޅަހުގައި ހޮނިހިރު ދުވަހު ބޭއްވި ބައްދަލުވުމުގައި ވާހަކަފުޅު ދައްކަވަމުން ޝާހިދު ވިދާޅުވީ އެމްޑީޕީއަށް މަޖިލީހުގެ މެޖޯރިޓީ ދޭން ޖެހޭކަން މި ޕާޓީއިން ދައްކައިދީފިކަމަށެވެ.
އަދި މިދިޔަ ދައުރުގައި އެމްޑީޕީ ސަރުކާރުގައި އޮވެ، މަޖިލީހުގެ ސުޕަމެޖޯރިޓީ ލިބުމުން ވެސް ޒިންމާދާރުކަމާއެކު މަޖިލީހުގެ މަސައްކަތްތައް ކުރިއަށް ގެންދިޔަކަން ފާހަގަކުރައްވަމުން ޝާހިދު ވިދާޅުވީ، އެގޮތުން ސަރުކާރު ޖަވާބުދާރީކޮށް، އެންމެ ގިނަ އަދަދަކަށް ވަޒީރުން ޖަވާބުދާރީކުރުވީވެސް 19 ވަނަ މަޖިލިސް ގައި ކަމަށެވެ.
ޝާހިދު ވިދާޅުވީ ސަރުކާރުގައި އޮތަސް އަދި އިދިކޮޅު ގައި އޮތަސް އެމްޑީޕީއިން ޤާނޫނު އަސާސީ ޙިމާޔަތްކޮށް، ޤާނޫނުގެ ވެރިކަން ދަމަހައްޓާނެކަމަށާއި، ރައްޔިތުންގެ ހައްޤުތައް ރައްކާތެރިކޮށްދޭނެކަމަށެވެ. އަދި މިހާރު ވެރިކަމުގައި ތިއްބެވި ބޭފުޅުން އަމަލުކުރައްވާނީ އެޔާ ޚިލާފަށްކަމަށް ޝާހިދު ވިދާޅުވިއެވެ.
