މެންޗެސްޓާ ޔުނައިޓެޑްގެ ފޯވަޑް ރަމްސުސް ހުޖްލުންޑްގެ މަސްގަނޑު ހަލާކުވެ، ތިން ހަފުތާއަށް ކުޅުމާ ދުރުގައި ހުންނަން ޖެހިއްޖެ އެވެ.

މެންޗެސްޓާ ޔުނައިޓެޑަށް 72 މިލިއަން ޕައުންޑަށް ގެނައި ފޯވަޑް ވަނީ މިހާތަނަށް ކުޅުނު 30 މެޗުގައި 13 ގޯލު ޖަހާފަ އެވެ. ހާއްސަކޮށް މިދިޔަ އާދީއްތަ ދުވަހު ލުޓޮންއާ ދެކޮޅަށް ޖެހި ގޯލަކީ ޖެހިޖެހިގެން ހަ ވަނަ މެޗުގައި އޭނާ ޖެހި ގޯލެވެ. އެކަމަކު ޑެންމާކުގެ 21 އަހަރުގެ ފޯވަޑަށް އަނިޔާވުމުން އަމިއްލަ ދަނޑުގައި ފުލަމްއާ ދެކޮޅަށް ކުޅޭ މެޗާއި އެފްއޭކަޕުގައި ކުޅޭ މެޗު ވެސް ގެއްލޭނެ އެވެ. އަދި ވާދަވެރި މެންޗެސްޓާ ސިޓީއާ ދެކޮޅަށް ވެސް އޭނާ އަށް ނުކުޅެވޭނެ ކަމަށް ކޯޗު އެރިކް ޓެންހަގް ބުންޏެވެ.

ހުޖްލުންޑަށް އަނިޔާވުމުން ޔުނައިޓެޑްގެ ކުރި ބަލަހައްޓަން ނުކުންނަން މިހާރު ޓީމުގައި ހުރި ފޯވަޑަކީ އެންތަނީ މާޝިއަލް އެކަންޏެވެ. އޭނާ އާއި ފޯވަޑް މާކަސް ރަޝްފޯޑަށް އެކަށީގެންވާ ވަރަށް ގޯލު ނުޖެހޭތީވެ މިއީ ޕްރެމިއާ ލީގުގައި ކުރިއަށްދާން ޔުނައިޓެޑަށް ކުރިމަތިވާނެ ހުރަހެއް ކަމަށް ތަޖުރިބާކާރުން ދެކެ އެވެ.

ޔުނައިޓެޑް މިވަގުތު އޮތީ އިނގިރޭސި ޕްރެމިއާ ލީގުގެ ހަ ވަނައިގަ އެވެ. އެއީ 44 ޕޮއިންޓާއެކުގަ އެވެ. މިއީ އެއްވަނައިގައިވާ ލިވަޕޫލަށްވުރެ 16 ޕޮއިންޓް މަދު އަދަދެކެވެ.