މާޓިނޭޒް ހޯދުމަށް ޔުނައިޓެޑުން ކުރި ބިޑު ރިޖެކްޓު ކޮށްފި

އެސްޓަން ވިލާ އަށް ކުޅެމުން އަންނަ އާޖެންޓީނާގެ ގޯލު ކީޕަރު އެމީލިއާނޯ މާޓިނޭޒް ހޯދުމަށް، މެންޗެސްޓަރ ޔުނައިޓެޑުން ކުރި ބިޑު އެސްޓަން ވިލާ އިން ރިޖެކްޓު ކޮށްފައިވާ ކަމަށް މީޑިއާ ރިޕޯޓުތައް ބުނެފި އެވެ.

އުމުރުން 32 އަހަރުގެ މާޓިނޭޒް އެސްޓަން ވިލާ އަށް ބަދަލުވީ 2020 ވަނަ އަހަރު އެވެ. އެންމެ ފުރަތަމަ އެ ކުލަބާ އެކު އޭނާ ސޮއި ކުރީ ހަތަރު އަހަރުގެ އެއްބަސްވުމެއްގަ އެވެ. ނަމަވެސް، 2024 ވަނަ އަހަރު މާޓިނޭޒް ވަނީ އެސްޓަން ވިލާގެ އެއްބަސްވުން އައު ކޮށްފަ އެވެ. އެ ކުލަބާ އެކު އޭނާ ސޮއި ކޮށްފައިވާ އައު އެއްބަސްވުމުގެ މުއްދަތު ހަމަވާނީ 2029 ވަނަ އަހަރު އެވެ.

މީޑިއާ ތަކުގައި ބުނެފައިވާ ގޮތުން ކުރިއަށް އޮތް ސީޒަނަށް ޓީމު ވަރުގަދަ ކުރުމުގެ ގޮތުން ގޯލު ކީޕަރެއް ހޯދުމަށް ޔުނައިޓެޑުން ބޭނުންވެ އެވެ. އެހެންވެ އެ ކުލަބުން ފާރަލަމުން އައި އެއް ކުޅުންތެރިޔަކީ މާޓިނޭޒް އެވެ.

މާޓިނޭޒް ހޯދުމަށް ޔުނައިޓެޑުން ބިޑެއް ކުރި ކަަމަށާއި، ނަމަވެސް އެސްޓަން ވިލާ އިން އެ ހުށަހެޅުން ރިޖެކްޓު ކޮށްފައިވާ ކަމަށް މީޑިއާ ތަކުގައި ވަނީ ބުނެފަ އެވެ. މީޑިއާ ތަކުގައި ބުނެފައިވާ ގޮތުން ޔުނައިޓެޑުން ހުށަހެޅީ ލޯނު އެއްބަސްވުމެއްގެ ދަށުން މާޓިނޭޒް ހޯދުމަށެވެ. ނަމަވެސް، އެސްޓަން ވިލާ އިން އޮތީ އެއްވެސް ޙާލަތެއްގައި މާޓިނޭޒް ދޫކުރާ ގޮތަކަށް ނޫނެނެވެ.

އެސްޓަން ވިލާގައި މާޓިނޭޒް އަންނަނީ މޮޅު ކުޅުމެއް ދައްކަމުންނެވެ. އެ ކުލަބާ އެކު މިހާތަނަށް ހޭދަކޮށްފައިވާ ފަަސް ސީޒަންގެ ތެރޭގައި މާޓިނޭޒް ވަނީ އެ ކުލަަބަށް ކުޅެދިން 212 މެޗުގައި ގޯލު ބަލަހައްޓައިފަ އެވެ.

މީގެ އިތުރުން މާޓިނޭޒް އަކީ އާޖެންޓީނާގެ ޤައުމީ ޓީމުގެ ވެސް އެއް ނަންބަރު ގޯލް ކީޕަރެވެ. އޭނާ ވަނީ 53 މެޗުގައި އާޖެންޓީނާ ޤައުމީ ޓީމުގެ ގޯލު ބަލަހައްޓައިފަ އެވެ. އާޖެންޓީނާ އާއެކު މާޓިނޭޒް ވަނީ ފީފާ ވޯލްޑް ކަޕްގެ އިތުރުން، ކޮޕާ އެމެރިކާ ފުޓުބޯޅަ މުބާރާތް ދެ ފަހަރު، އަދި ފައިނަލިސިމާ ކާމިޔާބު ކޮށްފަ އެވެ. އާޖެންޓީނާ އިން މި މުބާރާތްތައް ކާމިޔާބު ކުރުމުގައި މާޓިނޭޒް ވަނީ އިސް ދައުރެއް އަދާ ކޮށްފަ އެވެ.