ފައިސަލްއަކީ އިތުބާރުކުރެވޭ އަދި މި ސަރުކާރު ހަމަމަގަށް އެޅުވުމަށް ކުރާ މަސައްކަތުގައި މުހިންމު ބޭފުޅަކަށް ވެގެންދާނެ - ރައީސް ޞާލިޙު

ނިމިދިޔަ އެމްޑީޕީ ސަރުކާރުގެ ނައިބްރައީސް ފައިސަލް ނަސީމަކީ މިހާރު އޮތް ސަރުކާރު ހަމަމަގަށް އެޅުވުމަށް ކުރާ މަސައްކަތުގައި މުހިންމު ބޭފުޅަކަށް ވެގެންދާނެ ކަމަށް ކުރީގެ ރައީސް އިބްރާހީމް މުހައްމަދު ސާލިހު ވިދާޅުވެއްޖެއެވެ.

ފައިސަލް އެމްޑީޕީއަށް ސޮއިކުރެއްވީ ބުރާސްފަތި ދުވަހު އެކަމަށްޓަކައި ބޭއްވި ޚާއްސަ ރަސްމިއްޔާތެއްގައެވެ. މި ރަސްމިއްޔާތުގައި އެމްޑީޕީގެ ކުރީގެ ރައީސް އިބްރާހީމް މުޙައްމަދު ސާލިހާއި އެމްޑީޕީގެ ޗެއަރޕަރސަން ފައްޔާޒް އިސްމާއީލް ބައިވެރިވެވަޑައިގެންނެވިއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ރައީސް ސާލިހު ވިދާޅުވީ، ފައިސަލް އަކީ ނިމިގެންދިޔަ 5 އަހަރު ދުވަހު، އެމަނިކުފާނާއެކު ސަރުކާރުގައި ވަރަށް ބުރަ އަދި ތެދުވެރި މަސައްކަތްތަކެއް ރައްޔިތުންނަށްޓަކައި ކޮށްދެއްވި ބޭފުޅެއް ކަމަށެވެ. އަދި ފައިސަލް އަކީ އިތުބާރުކުރެވޭ ބޭފުޅެއް ކަމަށާއި، ފައިސަލް އެމްޑީޕީއާއި ގުޅިވަޑައިގަތުމާއެކު ޕާޓީއަށް އިތުރު ހިތްވަރަކާއި ޖޯޝެއް ލިބިފައިވާ ކަމަށެވެ.

އެހެންކަމުން ކުރިއަށް އޮތް މަޖިލިސް އިންތިހާބުގައި ފައިސަލް އަމަލީގޮތުން ހަރަކާތްތެރިވެވަޑައިގަންނަވާނެ ކަމަށް ރައީސް ސާލިހު ވިދާޅުވިއެވެ. ހާއްސަކޮށް މިހާރު އޮތް ސަރުކާރު ހަމަ މަގަށް އެޅުވުމަށް ކުރާ މަސައްކަތުގައި ފައިސަލް ބައިވެރިވެވަޑައިގަތުން ވަރަށް މުހިންމު ކަމަށް ވިދާޅުވިއެވެ.