އަހަރަމެން ކުޅެނީ ފާޑު ކިޔާ މީހުންގެ އަނގަ ބަންދުކުރާކަށް ނޫން: ޒަވީ
21 ފެބުރުއަރީ 2024 | ބުދަ 06:39ޒަވީ ބުނީ، މިފަހަކަށް އައިސް އޭނާ އަށް އެތަައް އުނދަގޫތަކެއް ކުރިމަތިވާ ކަމަށާއި، ބައެއް ޙާލަތްތަކުގައި ރުޅި އަންނަ ކަހަލަ ކަންކަން ވެސް ދިމާވާ ކަމަށް
ބާސެލޯނާގެ ކޯޗު ޒަވީ ހެނާންޑޭޒް
ސްޕެއިންގެ ބާސެލޯނާ އިން ކުޅެނީ ފާޑު ކިޔާ މީހުންގެ އަނގަ ބަންދުކުރުމުގެ ބޭނުމުގައި ނޫން ކަމަށް، އެ ޓީމުގެ ކޯޗު ޒަވީ ހެނާންޑޭޒް ބުނެފި އެވެ.
އޭނާ މިހެން ބުނީ ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ފުރަތަމަ ލެގުގައި އިންޓަލީގެ ނަޕޯލީއާ ދެކޮޅަށް ނުކުންނަ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. ޒަވީ ބުނީ، މިފަހަކަށް އައިސް އޭނާ އަށް އެތަައް އުނދަގޫތަކެއް ކުރިމަތިވާ ކަމަށާއި، ބައެއް ޙާލަތްތަކުގައި ރުޅި އަންނަ ކަހަލަ ކަންކަން ވެސް ދިމާވާ ކަމަށެވެ. ޚާއްސަކޮށް ގިނަ މީޑިއާތަކުގައި ދައްކަމުން އަންނަ ވާހަކަތަކުގެ ސަބަބުންް ރުޅި އާދެވޭ ކަމަށް ވެސް ޒަވީ ބުންޏެވެ. އޭގެ ސަބަބެއްގެ ގޮތުގައި ޒަވީ ފާހަގަ ކުރީ، ގިނަ ފަހަރު ފަތުރާ ވާހަކަތަކުގައި ހަގީގަތެއް ނެތުމެވެ. އެހެން ނަމަވެސް، ބާސެލޯނާ އިން ކުޅޭނީ އެ ކުލަބުގެ ސަޕޯޓަރުންނަށްޓަކައި ކަމަށާއި އެއްވެސް ޙާލަތެއްގައި ފާޑު ކިޔާ މީހުންގެ އަނގަ ބަންދު ކުރަން ނޫން ކަމަށް ވެސް ޒަވީ ބުންޏެވެ.
މީގެ އިތުރުން ޒަވީ ބުނީ، އޭނާ ދެކޭ ގޮތުގައި މިއީ ނަޕޯލީ ކަހަލަ ޓީމަކާ ދެކޮޅަށް އެންމެ އެކަށީގެންވާ ވަގުތު ކަމަށެވެ. އެއީ ކުއްލި ގޮތަކަށް އެ ޓީމުގެ ކޯޗު ވަކިކޮށް، އެހެން ކޯޗެއް ގެނެސްފައިވާތީ ކަމަށް ވެސް ޒަވީ ބުންޏެވެ. އެހެން ނަމަވެސް، ނަޕޯލީގެ އައު ކޯޗަށް ވެސް އެ ޓީމުގެ ކުޅުންތެރިން އެނގޭނެ ކަމަށާއި، އޭނާ އަކީ މީގެ ކުރިން އެސިސްޓެންޓެއްގެ ގޮތުގައި މަސައްކަތް ކޮށްފައި ހުރި މީހެއް ކަމަށް ޒަވީ ވަނީ ބުނެފަ އެވެ.
އިތުރަށް ޒަވީ ބުނީ، މެޗަށް ނުކުންނައިރު ބާސެލޯނާ އަށް އެންމެ މުހިންމީ އަމިއްލަ ޓީމަށް ފޯކަސް ކުރުން ކަމަށެވެ. ޚާއްސަކޮށް ބާސެލޯނާގެ ސަމާލުކަން އޮންނަން ޖެހެނީ ރަނގަަޅު ކުޅުމެއް ދައްކައި، ޑިފެންސްގައި ރަނގަޅަށް ކުޅެ، ލިބޭ ފުރުސަތުތަކުގެ ބޭނުން އެންމެ ރަނގަޅަށް ހިފުމަށް ކަމަށް ވެސް ޒަވީ ވަނީ ބުނެފަ އެވެ. އެކަން ފާހަގަކޮށް އޭނާ ބުނީ ނަޕޯލީ އަކީ އިދިކޮޅަށް ކުޅެން އުނދަގޫ ޓީމެއް ކަމަށެވެ. ޚާއްސަކޮށް އެ ޓީމުގެ ވަކިވަކި ކުޅުންތެރިން ހުނަރު މޮޅުކަން އޭނާ ފާހަގަ ކުރި އެވެ.
ޒަވީ ވަނީ މި ސީޒަނަށްފަހު ބާސެލޯނާގެ ކޯޗުކަން ދޫކޮށްލަން ނިންމައިފަ އެވެ. އެކަން އޭނާ ވަނީ ކުލަބަށް ވެސް އަންގައިފަ އެވެ. އެ ނިންމުމާ ގުޅޭ ގޮތުން މީގެ ކުރިން ޒަވީ ބުނެފައި ވަނީ، ބާސެލޯނާ އަށް މި ސީޒަންގެ ޗެމްޕިއަންސް ލީގު ކާމިޔާބު ކުރެވުނު ނަމަވެސް، އޭނާގެ ނިންމުން ބަދަލު ނުކުރާނެ ކަމަށެވެ.
