ނޭމާ ބާސާގެ މެނޭޖްމަންޓަށް ފާޑުކިޔައިފި

ދުނިޔޭގެ ރިކޯޑު ފީއަކަށް ފްރާންސްގެ ޕީއެސްޖީއަށް ބަދަލުވި ބްރެޒިލްގެ ތަރި ނޭމާ އޭނާގެ ކުރީގެ ކްލަބް ބާސެލޯނާގެ ބޯޑަށް ފާޑުކިޔައިފިއެވެ.

އާދީއްތަ ދުވަހުގެ ރޭ ޓުލޫސްއާ ދެކޮޅަށް ކުޅުނު މެޗަށް ފަހު ވާހަކަ ދައްކަމުން ނޭމާ ވަނީ ބާސެލޯނާގެ މިހާރުގެ ބޯޑާ މެދު އޭނާ ހިތްހަމަ ނުޖެހޭ ކަމަށް ބުނެފައެވެ.

އެގޮތުން އޭނާ ބުނެފައި ވަނީ ބާސެލޯނާ މިހާރު އޮތް ހާލަތަށް ވެއްޓުމުގެ ޒިންމާ ބޯޑުން ނަގަން ޖެހޭނެ ކަމަށާއި ބަސާ މިހާރު އޮތް ހާލަތު ފެނިފައި އޭނާ ވަރަށް ދެރަވާ ކަމަށެވެ. އޭގެ އިތުރުން ވެސް ބާސާގައި ހޭދަކުރި ހަތަރު އަހަރަކީ ވަރަށް އުފާވެރި ހަތަރު އަހަރު ކަމަށާއި އޭނާގެ ހަނދާނުން ދުވަހަކު ވެސް އެ ހަތަރު އަހަރު ފިލައިގެން ނުދާނެ ކަމަށް ނޭމާ ވަނީ ބުނެފައެވެ.

ހަމައެހެންމެ ބާސާގެ ބޯޑުގައި މިވަގުތު ތިބި މީހުންނަކީ އެ މަގާމުތަކުގައި ތިބެން ނުޖެހޭ ބައެއް ކަމަށާއި ބާސާގެ ބޯޑުގައި ތިބެން ޖެހެނީ އެ މަގާމަށް ގާބިލު ބައެއް ކަމަށް ނޭމާ ބުނެފައި ވެއެވެ.

ނޭމާ މިހެން ބުނެފައިވާއިރު ބާސާގެ ބޯޑާ މެދު އެ ކްލަބުގެ ސަޕޯޓަރުން ވެސް ދަނީ ނުރުހުން ފާޅުކުރަމުންނެވެ. އެގޮތުން އެ ކްލަބުގެ ރައީސްގެ އިސްތިއުފާއަށް ގޮވާލައި ސޯޝަލް މީޑިއާގައި ވެސް އެތަކަށް ބަޔަކު ދަނީ އަޑު އުފުލަމުންނެވެ.

ބާސާގެ ބޯޑާ މެދު މީހުން ނުރުހުން ފާޅުކުރަން ފެށީ އެ ކްލަބުގެ ޓްރާންސްފާ ޕޮލިސީގެ ސަބަބުންނާއި ޒުވާން ކުޅުންތެރިންނަށް ފުރުސަތު ދިނުން މަދުވުމުގެ ސަބަބުންނެވެ.

މި ޓްރާންސްފާ މާކެޓުގައި ބާސާއަށް ގެންނަން ބޭނުންވި ގިނަ ކުޅުންތެރިން އެ ޓީމަށް ގެނެވިފައި ނުވާއިރު ޓީމުގައި ތިބި ޒުވާން ކުޅުންތެރިން ވެސް އެހެނިހެން ޓީމުތަކަށް ފޮނުވާލާފުމުގެ އިޝާރާތެއް އެ ކްލަބުގެ މެނޭޖްމަންޓުން ވަނީ ކޮށްފައެވެ.

ނޭމާގެ ބަހުގެ ހަމަލާތައް ބާސާގެ ބޯޑަށް އަމާޒުވެފައިވާއިރު އޭނާ އަންނަނީ ޕީއެސްޖީއަށް ބަދަލުވުމަށް ފަހު އެ ޓީމުގައި މޮޅު ކުޅުމެއް ދައްކަމުންނެވެ.