ބުފޮން އިޓަލީއަށް ކުޅެނީ އަސްޓޯރީގެ ހަނދާނުގައި!

އިޓަލީގެ ގައުމީ ޓީމަށް އަނެއްކާ ވެސް ކުޅެން ނިންމީ ދާދިފަހުން މަރުވި ފިއޮރެންޓީނާގެ ކެޕްޓަން ޑަވިޑޭ އަސްޓޯރީގެ ހަނދާނުގައި ކަމަށް ޖިއަންލުއީޖީ ބުފޮން ބުނެފިއެވެ.

މި މަހުގެ ހަތަރު ވަނަ ދުވަހު ކުއްލި ގޮތަކަށް މަރުވި އުމުރުން 31 އަހަރުގެ އަސްޓޯރީއަކީ އިޓަލީގެ ގައުމީ ޓީމުން ވެސް ޖާގަ ހޯދަމުންދިޔަ ކުޅުންތެރިޔެކެވެ. އޭނާގެ މަރާއި ގުޅިގެން އިޓަލީގެ ފުޓްބޯޅައިގެ މައިދާނުގައި ހަރަކާތްތެރިވާ ގިނަ ފަރާތްތަކުން ވަނީ ހަމްދަރުދީގެ މެސެޖުތަކެއް ވެސް ފޮނުވާފައެވެ. އިޓަލީގެ ގައުމީ ޓީމުގެ ކޯޗުގެ މަގާމާއި ވަގުތީ ގޮތުން ހަވާލުވެގެންހުރި ލުއީޖީ ޑި ބިއާޖިއޯގެ އިރުޝާދުގެ ދަށުން އެ ޓީމު އާޖެންޓީނާ އަދި އިނގިރޭސިވިލާތާއި ދެކޮޅަށް ކުޅޭ އެކުވެރި ކަމުގެ މެޗުތަކަށް ނެގި ސްކޮޑުން ބުފޮންއަށް ޖާގަދިން ނަމަވެސް އޭނާ އެ ދައުވަތު ގަބޫލުނުކުރާނެ ކަމަށް ގިނަ ބަޔަކު ބުނެފައިވެއެވެ.

އެހެން ނަމަވެސް ބުފޮން ބުނެފައިވަނީ ގައުމީ ޓީމަށް އަނެއްކާ ވެސް ކުޅެން ނިންމީ އަސްޓޯރީގެ ހަނދާނުގައި ކަމަށާއި އެގޮތަށް އެކަން ނުކުރުމަކީ ގޯސްކަމެއްގެ ގޮތުގައި އޭނާ ދެކޭ ކަމަށެވެ. އުމުރުން 40 އަހަރުގެ ކީޕަރު ބުނީ ދުވަހަކު ވެސް ގައުމީ ޓީމުން ރިޓަޔާކުރި ވާހަކަ ބުނެފައިނުވާނެ ކަމަށާއި އޭނާއަކީ ބަހުގެ އިތުބާރު ދަމަހައްޓާ މީހެއް ކަމަށެވެ. ހަމައެހެންމެ ވަގުތީ ކޯޗަކީ ވަރަށް ރަނގަޅު ކޯޗެއް ކަމަށް ގަބޫލުކުރެވޭ ކަމަށާއި މި ނިންމުން ނިންމީ ކޯޗާއި މަޝްވަރާ ކުރުމަށްފަހު ކަމަށެވެ. ހަމައެހެންމެ ޒުވާން ކުޅުންތެރިންނަށް ހުރަސް އަޅަން ބޭނުންނުވާ ކަމަށާއި ޒުވާން ކުޅުންތެރިންނަށް އަބަދުވެސް ފުރުސަތު އޮންނާނެ ކަމަށް ބުފޮން ބުނެފައިވެއެވެ.

ބުފޮން ވަނީ ސްވިޑެން އަތްދަށުވެ 1958 ވަނަ އަހަރުގެ ފަހުން ފުރަތަމަ ފަހަރަށް އިޓަލީ ކޮލިފައިނުވުމާއެކު ގައުމީ ޓީމަށް ދެން ނުކުޅޭނެ ކަމަށް ބުނެފައެވެ. އިޓަލީއަށް ވޯލްޑް ކަޕްގެ ފުރުސަތު ގެއްލުނީ ޕްލޭއޮފްގައި 1-0 ގެ އެގްރިގޭޓް ނަތީޖާއަކުން ސްވިޑެން އަތުން ބަލިވުމާއި ގުޅިގެންނެވެ. އެހެން ނަމަވެސް އޭގަފަހުން ދިން އިންޓަވިއުއެއްގައި ބުފޮން ބުނީ 80 އަހަރުވިޔަސް ގައުމީ ޓީމަށް ކުޅެން މީހަކު ގޮވާލައިފިނަމަ އެކަމަށް އިޖާބަދޭނެ ކަމަށެވެ.

އިޓަލީ ގައުމީ ޓީމަށް 20 އަހަރަށް ފަހު ކުޅުން ހުއްޓާލި ކަމަށް ބުނި މިހާރު އުމުރުން 39 އަހަރުގެ ބުފޮން ވަނީ އެޓީމަށް 175 މެޗު ކުޅެދީފައެވެ. އޭނާ ވަނީ އިޓަލީ ޓީމާއެކު 2006 ވަނަ އަހަރު ވޯލްޑްކަޕް ވެސް ކާމިޔާބު ކޮށްފައެވެ.