ވައުދުވީ ޑޮލަރުން މަސްވެރިންނަށް ފައިސާދޭން، ކުޑަމިނުން ރުފިޔާއިން ވެސް ފައިސާނުދޭތާ 3 މަސް ވަނީ
ބާނާ މަހަށް ފައިސާ ލިބޭނެ ކަމުގެ ޔަޤީންކަން މިއަދު މަސްވެރިންނަށް ވަނީ ގެއްލިފައި
ރައީސް ޑރ މުޙައްމަދު މުއިއްޒު
ރައީސް ޑރ މުޙައްމަދު މުއިއްޒު ވައުދުވެވަޑައިގެންނެވީ ޑޮލަރުން މަސްވެރިންނަށް ފައިސާދެއްވަން ކަމަށާއި ނަމަވެސް ކުޑަމިނުން ރުފިޔާއިން ވެސް ފައިސާނުދޭތާ 3 މަސް ވަަނީކަމަށް އެމްޑީޕީން ބުނެފިއެވެ.
ހޯމަ ދުވަހު އޮތް ޖަލްސާއަށް ރިޔާސީ ބަޔާނުގެ ޖަވާބު ހުށަހަޅުއްވައިދެއްވަމުން އަލިފުށީ ދާއިރާގެ މެމްބަރު މުޙައްމަދު ރަޝީދު ހުސައިން (ބިގޭ) ވިދާޅުވީ، ރާއްޖޭގެ ތަރައްޤީގެ އެންމެ މުހިއްމު އެއްދާއިރާ އަކީ މަސްވެރިކަން ކަމަށާއި، މަސްވެރިކަމާ ގުޅޭ ހަރުދަނާ އެއްވެސް ސިޔާސަތެއް ރިޔާސީ ބަޔާނަކު ނެތް ކަމަށެވެ.
އޭގެ އިތުރުން، 2022 ވަނަ އަހަރަކީ ފާއިތުވީ 17 އަހަރު ތެރޭ އެންމެ ގިނައިން މިފްކޯއިން މަސް ގަތް، އަދި ތާރީޚުގައިވެސް އެންމެ ގިނަ ފައިސާ މަސްވެރިންނަށް ދޫކުރި އަހަރުކަން ފާހަގަ ކުރައްވައި މެމްބަރު ވިދާޅުވީ، 2022 ވަނަ އަހަރު އެކަނިވެސް 1 ބިލިއަނަށްވުރެ ގިނަ ރުފިޔާ ދޫކޮށްފައިވާ ކަމަށެވެ،
މެމްބަރު ވިދާޅުވީ، 48 ގަޑިއިރު ތެރޭގައި ޑޮލަރުން މަސްވެރިންނަށް ފައިސާދެއްވާނެކަމަށް ވައުދުވެވަޑައިގެން ވެރިކަމަށް ވަޑައިގަތުމަށްފަހު، އެންމެ ކުޑަމިނުން ރުފިޔާއިންވެސް މަސްވެރިންގެ ފައިސާކޮޅު ނުދެވޭ ކަމަށާއި، ބާނާ މަހަށް ފައިސާ ލިބޭނެ ކަމުގެ ޔަޤީންކަން މިއަދު މަސްވެރިންނަށް ގެއްލިފައިވާ ކަމަށެވެ.
މަޖިލީހުގައި 2022 ވަނަ އަހަރުގެ ރިޔާސީ ބަޔާނުގައި ރައީސް ސާލިޙު ވަނީ މަސްވެރިން ބާނާ މަހުގައި ހޫނު ކަމެއް ހުންނާނީ ކިރާ މަހުގައި ފިނި ކަމެއް ހުރެގެން ކަމަށް ވިދާޅުވެފައެވެ.
އެކަމަށް އަލިއަޅުވާލައްވާ މެމްބަރު ވިދާޅުވީ، މަސްވެރިން ބާނާ މަސް ގަނެ ޕްރޮސެސްކޮށް، މަސްވެރިންނަށް މަހުގެ އަގު ހޯދައިދިނުމަށް އެމްޑީޕީ ސަރުކާރުން މިފްކޯގެ ކެޕޭސިޓީ އިތުރުކުރުމަށް ފަށާފައިވާ މަޝްރޫޢުތައް މިހާރު ހުއްޓާލާފައިވާކަމަށެވެ.
އޭގެ އިތުރުން، މަހުގެ އަގު ސަސްޓެއިން ކުރަން އެންމެ މުހިއްމު ކަމަކީ ކުޅަދާނަ ފޮރިން ޕޮލިސީއެއް އޮތުންކަން ފާހަގަ ކުރައްވައި މެމްބަރު ވިދާޅުވީ، ނިމިދިޔަ ސަރުކާރުން އިނގިރޭސި ވިލާތާއި ޔޫރަޕިއަން ޔޫނިއަންއަށް އެކްސްޕޯޓްކުރާ ދިވެހި މަހުން ނަގާ ޓެކްސް ކުޑަކުރުމަށް ކުރިއަށް ދިޔަ މަޝްވަރާ ބާރަށް ކުރިއަށް ގެންދެވެން ޖެހޭނެ ކަމަށެވެ.
އެހެން ނަމަވެސް ކޮންމެ ދުވަހަކަމެ ފެންނަނީ ފޮރިން ޕޮލިސީ ފެއިލް ވަމުން އަންނަ މަންޒަރުކަމަށްވެސް މެމްބަރު ވިދާޅުވިއެވެ.
މަސްވެރިންނަށް ލިބެންޖެހޭ ގިނަ އަދަދެއްގެ ފައިސާ ނުލިބޭ މައްސަލަ ވަނީ ވަރަށް ބޮޑުވެފައެވެ. އެގޮތުން ފައިސާ ނުދޭ މައްސަލައާ ގުޅިގެން ގއ. ކޫއްޑޫގައި ގިނަ އަދަދެއްގެ މަސްވެރިން ވަނީ މުޒާހަރާވެސް ކޮށްފައެވެ.
