ގައުމުތަކުގައި ވެރިކަން ކުރައްވާ ފަރާތްތައް ބައްދަލުކުރައްވާ ފަރާތްތަކާއި، އެ ފަރާތްތަކަކީ ކޮން ހައިސިއްޔަތެއްގެ ކޮން ތަނެއްގެ ކޮން ފެންވަރެެއްގެ ކާކުތޯ ބަލާ ބަޔަކުވެސް ތިބެއެވެ. ވަކިން ހާއްސަކޮށް ބޭރުގެ ފަރާތްތަކާއި ބައްދަލުކުރައްވާއިރު، އެމީހަކީ ކޮން ގައުމެއްގެ ކާކުކަމާއި، ކޮން ހައިސިއްޔަތެއް އޮތް މީހެއްތޯއާއި، އެއީ ސަރުކާރެއް، ގައުމެއް ޖަމިއްޔާއެއް ނުވަތަ ސިޔާސީ މީހެއްތޯވެސް ބަލައެވެ. ނަމަވެސް މިފަހަރުވީ އެހެނެއް ނޫނެނެވެ.

މިފަހަރު މިހާރުގެ މިއޮތް ސަރުކާރަށްވީ އެހެންނެއް ނޫންނެވެ. މި ސަރުކާރަށް ދިމާވި ޕްރިންސް އޮފް މަޑަގަސްކަރައިގައި ދިމާވި ފަދަ ކަމެކެވެ. އަނެއްހެން ބުނާނަމަ އޭގެ އަސްލު ވާހަކަ ތަންކޮޅެއް ޒަމާނީކޮށް ފެނުނީއެވެ. މި ސަރުކާރުގައި ތިބީ ހުސް މީދާ ކެއި އުނބުތަކޭ ބުނެވެނީ ސަބަބެއް އޮވެގެންނެވެ. މިސަރުކާރުން މިހާތަނަށް ރެކޯޑް މުގުރާލީވެސް އެފަދަ ކަމެއްގައެވެ. "ފޭކް ޕްރިންސް" އެއް ގެނެސްގެން ދިވެހި ރައްޔިތުންނަށް ދަޅައްކަން އުޅުނީއެވެ. ނަމަވެސް އަތަށް ގޮވީއެވެ. މެއި މަހު ރާއްޖެ އައި އެކްޓަރެއް ސައުދީގެ ޝާހީ އާއިލާގެ ވަލީއަހުދުއަކަށް ހައްދަވާ މި ސަރުކާރުން ބޮޑު ފަލަ ސުރުހީއެއް ޖެހީއެވެ.

މިކަމުގެ މައުލޫމާތ ސާފުކުރުމަށް މަޖިލީހަށް ހާޒިރުކުރީ ފޮރިން މިނިސްޓަރ ޑރ. އަބްދުﷲ ޚަލީލެވެ. ޖުލައި މަހުގައި މަޖިލީހަށް ހާޒިރުވާންޖެހޭ ބޭފުޅަކު އޭގެ 121 ދުވަސް ފަހުންވެސް ވަޑައިގެން އުޅުއްވީ ފޭކް ޕްރިންސްގެ ވާހަކަ އެއީ ހަގީގަތެއް ކަމަށް ދެއްކުމަށެވެ. ސުވާލަކަށް ޖަވާބެއް ނުލިބުނެވެ. މުޅިންވެސް މައުޟޫއާއި ފެއަށް ޖެހިވަޑައިގެންނެ ދެއްކެވީ ކަމާއި ގުޅުން ނެތް ވާހަކަތެކެވެ. ހަލީލުގެ ޒިންމާދާރުކަމެއް ނެތް ކަން ހާމަވާ ކަމަކީ ޖުލައިމަހުގައި ޖަވާބުދެއްވަން ވަޑައިގަންނަވަން ޖެހޭ އިރު އެ ބޭފުޅާއަށް ވަގުތެއްވެވަޑައިގެންނެވީ 121 ދުވަސް ފަހުން ކަމުންނެވެ.

މެންބަރު މީކާއިލް ހުށަހެޅުއްވީ ވަރަށް ސާފު ސާދާ ދުވާލެވެ. އެ ސުވާލުގައި ވަނީ ސައުދީ ޝާހީ އާއިލާއަށް ނިސްބަތްވާ ބޭފުޅެއްކަމަށް ބުނެ، 5 މެއި 2025 ގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައްދަލުކުރައްވާފައިވާ "ޕްރިންސް" ފަހަފް ސައުދު އަލް ޝަލަންއަކީ ސައުދި އަރަބިއްޔާގެ ޝާހީ އާއިލާއަކަށް ނިސްބަތްވާ ފަރާތެއްތޯއެވެ. އަދި އެ ބައްދަލުވުމުގައި ސައުދީ އެމްބަސީގެ ފަރާތުން ބައިވެރިވެވަޑައިގެންފައި ނުވަނީ ކީއްވެގެންތޯއެވެ. މީގެ އިތުރުން އެފަރާތަކީ ސައުދީ ޝާހީ އާއިލާއަށް ނިސްބަވްތާ ފަރާތެއްގެ ގޮތުގައި ބަޔާންކޮށްފައިވަނީ ހަގީގަތާއި ހިލާފަށް ނަމަ، ދިވެހިރާއްޖެއާއި ސައުދީ އާ ދެމެދު އޮތް ހާރިޖީ ގުޅުމަށް މީގެ އެއްވެސް ނޭދެވޭ އަސަރެއްކޮށްފާނެތޯއެވެ.

ސުވާލު ވަރަށްވެސް ސާފެވެ. ނަމަވެސް މި ސުވާލަށް ހަލީލު ޖަވާބުދޭން ވަޑައިގަތީ 121 ދުވަސް ފަހުންނެވެ. ވަޑައިގެންނެވި އިރު ހުންނެވީ ހާސްވެ ބިރުންނެވެ. ވިދާޅުވާއެއްޗެއް ހުދު ހަލީލަކަށްވެސް ފަހުމް ނުވާފަދައެވެ. ވާނީވެސް އެހެންތާއެވެ. ހަލީލު ވަޑައިގެންނެވީ މި ސަރުކާރުން އެނަމުން ނަންދީފައިވާ ލަގަބަކާއި ގުޅުވާލާ ދޮގުހެދުމަށެވެ. ހަލީލުގެ ޖަވާބުތައް ދިޔައީ ފަޓާސް ބަރިއެއް ގޮވަމުންދާއިރު މިސްރާބެއް ނެތް ފަދައިންނެވެ.

ރައީސް އޮފީހުން މި ހަބަރު ޖަހާ ސޯޝަލް މީޑިއާއަށް ދޫކޮށްލި އިރު ޖަހާފައި އިނީ ޝާހީ އާއިލާގެ ބޭފުޅެއް ކަމަށެވެ. ރައީސް މުޢިއްޒު "ހިޒް ރޯޔަލް ހައިނަސް ޕްރިންސް ފަހަދް ސައުދު އަލްޝަލަން އޮފް ސައުދީ އަރަބިއްޔާ" ބައްދަލުކުރެއްވި ކަމަށް ރައީސް އޮފީހުގެ ވެބްސައިޓުގައި ޚަބަރެއް ޝާއިއުކުރީ މާޗު މަހުގެ ފަސްވަނަ ދުވަހެވެ. ރައީސް އޮފީހުން ޝާއިއު ކުރި އެ ހަބަރާއެކު ވަރަށް ބޮޑަށް އާމުންގެ ފާޑުކިޔުން އަމާޒުވިއެވެ. ނަމަވެސް ސަރުކާރުން ގޮތްދޫނުކޮށް ދިޔައީ އެއީ އަސްލެއްކަމަށް ދައްކަން މަސައްކަތް ކުރަމުންނެެވެ.

ސައުދީ އަރަބިއްޔާގެ ޝާހީ އާއިލާގެ ބޭފުޅެއްގެ ހައިސިއްޔަތުން ކަމަށް ބުނެ، ރައީސް މުއިއްޒުއާ ބައްދަލު ކުރެއްވި ފަހަދް ސައުދު އަލްޝަލަން އަކީ ސައޫދީގައި ރަސްކަން ކުރައްވާ ޝާހީ އާއިލާ އަށް ނިސްބަތްވާ ބޭފުޅެއް ނޫނެވެ. ސައުދީ އަރަބިއްޔާގައި އެ ލަގަބު ލިބެނީ އަބްދުލްއަޒީޒް އިބްނު ސައުދު ރަސްގެފާނުގެ ދަރި ދަރިކަލުންނާއި ދަރި ދަރިކަނބަލުން އަދި އެ ހިސާބުން ފެށިގެން ރަސްގެފާނުގެ ދަރި ދަރިކަލުންގެ އާއިލާތަކުން އަންނަ ފަރާތްތަކަށެވެ. ނަމަވެސް މިވަރުގެ ޑިޕްލޮމަސީއަކާއި ބައިނަލްއަގުވާމީ ދުނިޔެ ދަންނަ އާދަމުގެ ދަރިއެއް މި ސަރުކާރުގައި ނެތެވެ. ތިބީ ހުސް ރޯނު އެދުރުންނެވެ.

"ހިސް ރޯޔަލް ހައިނެސް" އަކީ ރަސްގެފާނުގެ ދަރިންނާއި ކާފަ ދަރިކަލުންނަށް ބޭނުންކުރާ ލަގަބެކެވެ. ރައީސް އޮފީހުގެ ވެބްސައިޓުގައި އެ ހަބަރު އެންމެ ފުރަތަމަ ޝާއިއުކުރިއިރު ފަހަދުއަށް އަރުވާފައި އޮތް ލަގަބަކީ "ހިޒް ރޯޔަލް ހައިނެސް" އެވެ. ދެރަވަރު ކަންކަމެވެ.

މެންބަރު މީކާއިލްގެ ސުވާލުގައި އޮތީ ފަހުދު ސައުދު އަލް ޝަލަންއަކީ ސައުދީގެ ޝާހީ އާއިލާގެ ބޭފުލެއްތޯއެވެ. ނަމަވެސް މި ސުވާލަށް ހަލީލަށް ޖަވާބުދޭން ކެރިވަޑައި ނުގަތެވެ. ސުވާލާއި ނުގުޅޭ ޖަވާބު ދެއްވަމުން ދިޔައިރު ހުދު ހަލީލަކަށް އޭނާ އަމިއްލައަށް ބަރަހަނާވަމުންދިޔަކަމެއް ނުވިސްނުނެވެ. ސުވާލުގައި އޮތީ އެއީ ޝާހީ އާއިލާގެ ބޭފުޅެއް ހެއްޔެވެ. ހަލީލުގެ ޖަވާބުގެ އާނއެކޭ ބުނަން ނުކެރި ވިދާޅުވީ ފަހަދް އަކީ ސައުދީ ޝާހީ އާއިލާގެ އަމީރާއެއްގެ ދަރިކަލެއް ކަމަށެވެ. އަދި އޭނާ އޭރު ރާއްޖެ ވަޑައިގެންނެވީ ވިޔަފާރީގެ ދަތުރުފުޅެއްގައި ކަމަށާއި، އެއީ އަމިއްލަ ބައެއް މަސައްކަތް ކުރެއްވުމަށް ކުރެއްވި ދަތުރުފުޅެއް ކަމަށެވެ.

ހަލީލެވެ. މަގާމަށް ކުފޫ ހަމަވާކަމަށް ގަބޫލުކުރައްވަންތޯއެވެ. އަޅުގަނޑަށް ހިޒް ރޯޔަލް ހައިނެސް އެނގިވަޑައި ނުގަތަސް ހަލީލުއަށް އެކަން އެނގެން ޖެހެއެވެ. އަޅުގަނޑަށް ފަހަދު އަކީ ކާކުކަން ނޭނގުނަސް އެއީ ސައުދީ ޝާހީ އާއިލާގެ ވަލީއަހުދެއް ނޫންކަން ހަލީލަށް އެނގެންޖެހެއެވެ. ހަލީލެވެ. ނަމުގެ ކުރިއަށް ޑަކްޓަރު އިނަސް އަދި ވާކަށް ނެތެވެ. މިއީ މަނިކުފާނުގެ ސީދާ ބެއްލެވުމުގެ ދަށުން ދިވެހިން ލަދުގަންނުވާލި ކަމެކެވެ. މި ސަރުކާރުގައި ޑިޕްލަމަސީއާއި ސިޔާސަތްތަކާއި ހާރިޖީ ގުޅުންތައް އެނގޭ މީހަކު ނެތްކަން ހާމަވާ އަލިގަދަ ހެއްކަކީ މިއެވެ. މި ސަރުކާރުން ހިންގަން އުޅުނީ ސްކޭމެވެ.

ހަލީލެވެ. މެންބަރު މީކާއިލްގެ ސުވާލަށް ޖަވާބު މިއަދު ނުދެއްވިއަސް އަދި ދެއްވަން ބޭނުންފުޅު ނުވިޔަސް ރައީސް އޮފީހުގެ ވެބްސައިޓުގައި 'ހިސް ރޯޔަލް ހައިނެސް' ޖަހާފައި ހުރި ހަބަރުތަކާއި ފޮޓޯތައް ނަގަން ސައުދީ އެމްބަސީއިން ހަރުކަށި އިންޒާރަކާއެކު ރައީސް އޮފީހަށާއި ހަލީލަށް އެންގިއެވެ. ހަލީލެވެ. ސައުދީގައި ވެރިކަން ކުރަނީ ކޮންބައެއްކަމާއި ޝާހީ އާއިލާގައި ތިބީ ކޮންބައެއްކަން ހަލީލަކަށް ނޭނގުނަށް ދިވެހިންނަށް އެނގެއެވެ. ގުބޯ ހެއްދި ޒަމާން ގޮސް މާޒީވެއްޖެއެވެ.

އެންމެ ކުޑަމިނުން ފަހަދުގެ ވާހަކައެއް ވިކިޕީޑިއާއެކުވެސް ނެތެވެ. އޭނާއަކީ ކާކުކަންވެސް އެނގޭ ބަޔަކު ނެތެވެ. ގޫގަލް ސަރޗްގައިވެސް ޖަހައިގެން ހުދު ގޫގަލްއަކަށްވެސް އެއީ ކާކުކަން ނޭނގެއެވެ. ހަލީލެވެ. ގޫގަލްއަށް އެއްވެސް އެއްޗެއް ސާފެއް ނުވިނަމަވެސް 'ފޭކް ޕްރިންސް' އެއް ގެނެސްގެން ކުޅުނު ޗަރުކޭސްއަކީ ކޮބައިކަން އެނގި ފަޟީހަތްވެއްޖެއެވެ. ވެގެން އުޅޭގޮތަކީ މި ސަރުކާރުގެ ހާރިޖީ ސިޔާސަތުގެ ހަޑިމުޑުދާރުކަމުންނައި ޑިޕްލޮމަސީ ނެތުމުގެ ސަބަބުން މި ސަރުކާރަށް އިންވެސްޓްކުރާނެ ބޭރުގެ އެއްވެސް އިންވެސްޓަރެއް ނެތީއެވެ. އެންމެ ފަހުން ފަހަދަކީ އިންވެސްޓަރަކަށް ހަދައިގެން ގެނެސް ވަލީއަހުދެއްގެ ލަގަބުދީ ބޮޑު ޑްރާމާއެއް ކުޅުނީއެވެ.

ހަލީލުގެ ވާހަކައިންނާއި، ޖަވާބުންނާއި ރައީސް އޮފީހުގައި ހުރި ފޮޓޯ އާއި ހަބަރުތައް ޑިލީޓްކޮށްލުމުންވެސް މިކަން ނިކަން ރަނގަޅަށް ސާފުވެއްޖެއެވެ. ހަލީލެވެ. ނުވަންޏާ އިސްތިފުދެއްވާ ވަޑައިގަންނަވާށެވެ. ދިވެހިން އިތުރަށް ލަދުގަންނަވަން ނޫޅުއްވާށެވެ.