އަނެއްކާވެސް ދުނިޔެއާއި އެއްވައްތަރުގެ ޕްލެނެޓެއް ސައިންސް ވެރިން ހޯދައިފި

އަނެއްކާވެސް ދުނިޔެއާ އެއްވައްތަރުގެ ޕްލެނެޓެއް ސައިންސްވެރިން ހޯދައިފިއެވެ. ސައިންސް ވެރިން ހޯދި އާ ޕްލެނަޓަށް ނަން ދީފައިވަނީ ޖީޖޭ1132ބީ ގެ ނަމުންނެވެ. މި ޕްލެނެޓް ދުނިޔެއަށް ވުރެ ބޮޑުވެފައި ދުނިޔެއަށްވުރެ ހޫނު ގަދައެވެ.

ސައިންސްވެރިން ވަނީ މިއަހަރުގެ ފެބްރުއަރީ މަހުގެ ތެރޭގައިވެސް ދުނިޔެއާއި އެއްވައްތަރުގެ 7 ޕްލެނެޓެއް ހޯދާފައެވެ.

ސައިންސްވެރިން ވަނީ މި ހަތް ޕްލެނެޓްގައިވެސް ފެން އުފެދުމުގެ ފުރުސަތު އެބަހުރިކަމަށް ބުނެފައެވެ. އަދި އޭގެތެރެއިން ތިން ޕްލެނެޓް އޮތީ އިންސާނުން ދިރިއުޅުމަށް އެކަށީގެންވާ ހާލަތުގައި ނޫންކަމަށް ބުނެފައެވެ.

އަލަށް ހޯދި ޕްލެނެޓްތައް ދަތުރުކުރަމުންދަނީ މި ދުނިޔެއާއި 40 އަލިއަހަރުގެ ދުރުމިނުގައެވެ.

މި ހުރިހާ ޕްލެނެޓްތަކެއްވެސް ދައުރުކުރަމުންދަނީ ކުޑަ އަދި އަލިމަޑު ތަރިއެއް ވަށައިގެން ނެވެ.

ޔުނިވާސިޓީ އޮފް ކީލޭ ގެ ސައިންޓިސްޓެއްކަމަށްވާ ޑރ.ޖޯން ސައުތުވޯތު ވިދާޅުވެފައިވަނީ މި ރިސާޗުގައި ދުނިޔެއާއި ވައްތަރު ޕްލެނެޓެއް އަދި ހޯދުނީ ކަމަށާއި އިތުރަށް މި ރިސާޗު ދިރާސާ ކުރަމުންދާކަމަށެވެ. އަދި މި ޕްލެނެޓުގައި އިންސާނުންނަށް ދިރިއުޅެވޭނެތޯ އިތުރަށް ރިސާޗްކުރަމުންދާކަމަށް އޭނާ ވިދާޅުވިއެވެ.