ޕްރެކްޓިހުގައި ފެންނަ ކޭން މެޗުތަކުން ނުފެނޭ: ކޯޗު
18 ފެބުރުއަރީ 2024 | އާދީއްތަ 09:02ކޭން އަށް ބޯޅަ ފޯރުކޮށްނުދެވޭކަމަށް އެންމެން ވެސް އެއްބަސްވޭ: ކޯޗު
ބަޔާން މިއުނިކްގެ ފޯވަޑް ހެރީ ކޭން
ބަޔާން މިއުނިކްގެ އިނގިރޭސި ފޯވަޑް ހެރީ ކޭން ޕްރެކްޓިހުގައި މޮޅަށް ކުޅޭ ކަމަށާއި ނަމަވެސް ފާއިތުވެދިޔަ ދެ މެޗުގައި އޭނާގެ ފުށުން މޮޅު ކުޅުމެއް ނުފެންނަ ކަމަށް ކޯޗު ތޯމަސް ޓުޗެލް ބުނެފި އެވެ.
ޓޮޓެންހަމުން 100 މިލިއަން ޔޫރޯ އަށް ގެނައި ފޯވަޑާ ބެހޭ ގޮތުން ކޯޗު ބުނީ މެޗުތަކުގައި ކޭން އަށް އެންމެ އެކަށީގެންވާ ގޮތަށް ބޯޅަ ފޯރުކޮށްނުދެވޭކަމަށް އެންމެން ވެސް އެއްބަސްވާ ކަމަށެވެ.
މި ސީޒަނުގައި ޖަރުމަނު ލީގުގައި އެންމެ ގިނަ ގޯލު ޖަހާފައިވާ ފޯވަޑްގެ ފޯމު ދަށްވީ ކަމަށް ބުނެ ބައެއް ފަރާތްތަކުން ފާޑުކިޔަމުންދިޔަ ނަމަވެސް ޓުޗެލް ބުނީ އެންމެ ދެ މެޗަކުން ކުޅުންތެރިއަކަށް ފާޑުކިޔައި ހެދުމަކީ ހަމަޖެހޭ ޒިންމާދާރުކަން ކުޑަކަމެއް ކަމަށެވެ.
އޭނާ ބުނީ ޗެމްޕިއަންސް ލީގުގައި ބަޔާން އެންމެ ފަހުން ކުޅުނު މެޗުން ބަލިވި ނަމަވެސް އަމިއްލަ ދަނޑުގައި ނަތީޖާ އަބުރާލެވޭނެ ގާބިލްކަމާއި ތަޖުރިބާ ޓީމުގައި އެބަހުރި ކަމަށެވެ.
ބަޔާންގެ ފޯމު ދަށްވެ މި ސީޒަނުގައި ޖަރުމަނު ލީގު ދިފާއު ނުކުރެވޭނެ ކަމުގެ ބިރު ވަނީ ހީވެފަ އެވެ. އަދި ޗެމްޕިއަންސް ލީގުގެ ދެ ވަނަ ބުރުގެ ފުރަތަމަ ލެގުން ބަލިވުމުން ޓީމަށް ވަނީ އިތުރަށް ޕްރެޝަރު ބޮޑުވެފަ އެވެ.
