ސްޕެނިޝް ލީގުގައި ލަސް ޕަލްމާސްއާ ދެކޮޅަށް ކުޅުނު މެޗުން އެތުލެޓިކޯ މެޑްރިޑު މޮޅުވެއްޖެ އެވެ.

ލީގުގައި ހޮނިހިރު ދުވަހުގެ ރޭ އެތުލެޓިކޯގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 5-0 ގެ ބޮޑު ތަފާތަކުންނެވެ. މެޗުގެ ފުރަތަމަ ހާފުގައި އެތުލެޓިކޯ އިން ދެ ލަނޑު ޖެހިއިރު، އަނެއް ތިން ލަނޑު ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ 15 ވަނަ މިނެޓުގައި އެތުލެޓިކޯ އަށް ލީޑު ނަގައިދިނީ މާކޮސް ލޮރެންޓޭ އެވެ. އޭގެ ފަަސް މިނެޓު ފަހުން އޭނާ ވަނީ އެ ޓީމުގެ ދެ ވަނަ ލަނޑު ޖަހައި، ލީޑު ފުޅާ ކޮށްފަ އެވެ. އެ ލަނޑު ޖަހަން އޭނާ އަށް ފުރުސަތު ތަަނަވަސްކޮށްދިނީ އެންހެލް ކޮރެއާ އެވެ. ދެ ވަނަ ހާފު ފަށައިގެން ދެ ވަނަ މިނެޓުގައި އެތުލެޓިކޯގެ ތިން ވަނަ ލަނޑު ޖެހީ ވެސް ކޮރެއާ އެވެ. އެ ޓީމުގެ ހަތަރު ވަނަ ލަނޑު ކޮރެއާ ޖެހީ ލިބުނު ޕެނަލްޓީ ކާމިޔާބު ކޮށްގެންނެވެ. އެތުލެޓިކޯގެ ފަސް ވަނަ ލަނޑު ޖެހީ މެމްފިސް ޑިޕާއީ އެވެ.

މޮޅާއެކު އެތުލެޓިކޯ އޮތީ ލީގު ތާވަލްގެ ހަތަރު ވަނަ މަގާމުގަ އެވެ. އެއީ މިހާތަނަށް ކުޅުނު 25 މެޗުން 51 ޕޮއިންޓު ހޯދައިގެންނެވެ. މި ސީޒަންގައި ވެސް އެތުލެޓިކޯ އިން އަމާޒު ހިފާފައި ވަނީ ލީގުގެ ގަދަ ހަތަރެއްގެ ތެރޭގައި އޮތުމަށެވެ.