މަޖިލިސް އިންތިޚާބު: 90 ކެންޑިޑޭޓުންނާއެކު ޕާޓީއަކުން އެންމެ ގިނަ ކެންޑިޑޭޓުން ނުކުންނަނީ އެމްޑީޕީން!
4 ކެންޑިޑޭޓެއް ނަން އަނބުރައި ގެންދެވި، 9 ކެންޑިޑޭޓެއްގެ ހުށަހެޅުން އީސީން ބަލައިގަނެފައިނުވޭ
އިލެކްޝަންސް ކޮމިޝަނުގެ މެންބަރުން
އަންނަ މަހު އޮންނަ މަޖިލިސް އިންތިހާބުގައި ޕާޓީއަކުން އެންމެ ގިނަ ކެންޑިޑޭޓުން ނުކުންނަނީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އިން ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.
އީސީގެ ނައިބު ރައީސް އިސްމައީލް ޙަބީބް އެކްސްގައި ކުރެއްވި ޕޯސްޓެއްގައި ވަނީ އަންނަ މަޖިލިސް އިންތިހާބުގައި ވާދަކުރައްވާ ކެންޑިޑޭޓުންގެ ޔަގީން އަދަދުތައް ހިއްސާކުރައްވާފައެވެ. އެގޮތުން މި އިންތިހާބުގައި އަންހެން 42 ކެންޑިޑޭޓުންނާއި ފިރިހެން 326 ކެންޑިޑޭޓުންނާއެކު ޖުމްކަ 368 ކެންޑިޑޭޓުން ވާދަކުރައްވާނެ ކަމަށް ޙަބީބު ވިދާޅުވިއެވެ.
ޙަބީބު ވިދާޅުވި ގޮތުގައި، މި އަހަރުގެ އިންތިހާބުގައި އެންމެ ގިނައިން ވާދަކުރައްވަނީ ޕާޓީތަކުން ނުކުންނަ ޖުމްލަ ކެންޑިޑޭޓުންނެވެ. އެހެން ނަމަވެސް ވަކިވަކި ޕާޓީތަކުން ނުކުންނަ ކެންޑިޑޭޓުންނަށް ވުރެ، އަމިއްލަ ގޮތުން ނުކުންނަ ކެންޑިޑޭޓުންގެ އަދަދު އިތުރެވެ. އެގޮތުން އަމިއްލަ ގޮތުން އަންހެން 20 ކެންޑިޑޭޓަކާއި، ފިރިހެން 110 ކެންޑިޑޭޓަކާއެކު ޖުމްލަ 130 ކެންޑިޑޭޓަކު މި އިންތިހާބުގައި ވާދަކުރެއެވެ.
ޕާޓީއަކުން އެންމެ ގިނަ ކެންޑިޑޭޓުން ނުކުންނާނީ އިދިކޮޅު އެމްޑީޕީންނެވެ. އެގޮތުން 6 އަންހެން ކެންޑިޑޭޓަކާއި، 84 ފިރިހެން ކެންޑިޑޭޓަކާ އެކު އެމްޑީޕީން 90 ކެންޑިޑޭޓަކު އިންތިހާބުގައި ވާދަކުރެއެވެ. އެމްޑީޕީއަށް ވުރެ އެއް ކެންޑިޑޭޓަކު މަދުން، ސަރުކާރުގެ ޕީއެންސީން އިންތިހާބުގައި ވާދަކުރަނީ 89 ކެންޑިޑޭޓުންނެވެ. އެއީ އަންހެން ދެ ކެންޑިޑޭޓަކާއި ފިރިހެން 87 ކެންޑިޑޭޓުންނެވެ.
މި އިންތިހާބުގައި ވާދަކުރާ އިތުރު ޕާޓީތަކުގެ އަދަދުތަކަކީ:
މި އަދަދުތަކުގެ އިތުރުން، މި އިންތިހާބުގައި ވާދަކުރުމަށް ހުށަހެޅި ކެންޑިޑޭޓުންގެ ތެރެއިން 9 ކެންޑިޑޭޓެއްގެ ކެންޑިޑެންސީ އީސީން ބަލައިގަނެފައިނުވެއެވެ. އަދި ޝަރުތު ހަމަވި 372 ކެންޑިޑޭޓުންގެ ތެރެއިން، އެމްޑީޕީން މުލަކު ދާއިރާއަށް، ޕީއެންސީން ގައްދޫ ދާއިރާއަށް، ޑިމޮކްރެޓްސް އިން ހިތަދޫ މެދުދާއިރާއަށް އަދި އަމިއްލަގޮތުން ކިނބިދޫ ދާއިރާއަށް ކުރިމަތިލެއްވި ކެންޑިޑޭޓަކާއެކު ޖުމްލަ ހަތަރު ކެންޑިޑޭޓަކު ނަން އަނބުރާ ގެންދެވިކަމަށް ހަބީބު ވިދާޅުވިއެވެ.
އެއާއެކު، މި އަހަރުގެ މަޖިލިސް އިންތިހާބުގައި ވާދަކުރަނީ، 2019 ވަނަ އަހަރު ބޭއްވުނު އިންތިހާބަށް ވުރެ މަދު އަދަދެއްގެ ކެންޑިޑޭޓުންނެވެ. އެގޮތުން މި އަހަރު 368 ކެންޑިޑޭޓުން ވާދަކުރާއިރު، 2019 ވަނަ އަަހރު އަންހެން 43 ކެންޑިޑޭޓުންނާއި ފިރިހެން 343 ކެންޑިޑޭޓުންނާއެކު ޖުމްލަ 386 ކެންޑިޑޭޓަކު ވާދަކުރިއެވެ.
