ގަވާއިދުން ރެއިޑްތަކެއްކޮށް، އެހެން ގައުމުތަކަށް ނިސްބަތްވާ ގިނަ ބަޔަކު ޑީޕޯޓުކޮށްލައިފި
ކޮންމެ ހަފުތާއަކު 2 ނުވަތަ 3 އޮޕަރޭޝަން ކުރިއަށްގެންދޭ
ފުލުހުން ކުރިއަށްގެންދިޔަ ޚާއްސަ އޮޕަރޭޝަނެއްގައި މަގު ބަންދުކޮށްފައި- ފައިލް ފޮޓޯ
ފުލުހުންނާ ގުޅިގެން ގަވާއިދުން ގިނަ ރެއިޑްތަކެއް ކުރިއަށް ގެންދާ ކަމަށާއި، އެހެން ގައުމުތަކަށް ނިސްބަތްވާ ގިނަ ބަޔަކު ޑީޕޯޓުކޮށްލާފައި ވާކަމަށް، އިމިގްރޭޝަން ކޮންޓްރޯލާ މުހައްމަދު ޝަމްއާން ވިދާޅުވެއްޖެއެވެ.
ހޯމަ ދުވަހު އޮތް ނޫސްވެރިންގެ ބައްދަލުވުމުގައި އިމިގްރޭޝަން ކޮންޓްރޯލާ މުހައްމަދު ޝަމްއާން ވިދާޅުވީ، ފުލުހުންނާ ގުޅިގެން ގަވާއިދުން ގިނަ ރެއިޑްތަކެއް ކުރިއަށްދާ ކަމަށެވެ. އެގޮތުން ކޮންމެ ހަފުތާއަކު 2 ނުވަތަ 3 އޮޕަރޭޝަން ކުރިއަށް ގެންދާ ކަމަށް އޭނާ ވިދާޅުވިއެވެ.
އެ ރެއިޑްތަކުގެ ތެރެއިން، ބަންގްލަދޭޝް 83 މީހުންނާއި، އިންޑިއާ 42 މީހުންނާއި، ސްރީލަންކާގެ 25 މީހުންނާއި، ނޭޕާލު 8 މީހުންނާއި، ޕާކިސްތާނު އެކަކާއި، ތައިލެންޑު 7 މީހުންނާއި، ޕިލިޕީންސް 4 މީހުންނާއި، ވިއެޓްނާމު 8 މީހުންނާއި، ރަޝިޔާ އެކަކާއި، ލެޓްވިއަން އެކަކާއި، ބްރެޒިލް 2 މީހުންނާއި، ނައިޖީރިއާ 3 މީހުން އެކި ކުށްތަކުގައި ޑީޕޯޓުކޮށްލާފައި ވާކަމަށެވެ.
ޝަމްއާން ވިދާޅުވީ ޑީޕޯޓުކޮށްލި މީހުންނަކީ އެކި ކުށްތަކަށް އަރައިގެންފައިވާ މީހުން ކަމަށެވެ. އޭގެތެރޭގައި ވިޒާ ވަޔަލޭޝަނާއި، މަސްތުވާތަކެތީގެ މައްސަލަތައް ހިމެނޭކަމަށް އޭނާ ވިދާޅުވިއެވެ.
