ފެނަކަ ކޯޕަރޭޝަންގެ ކުރީގެ މެނޭޖިންގ ޑިރެކްޓަރ އަޙްމަދު ސަޢީދު މުޙައްމަދަކީ ރާއްޖެއިން ބޭރުގައި ދިރިއުޅުމުގެ މާލީ ތަނަވަސްކަން ލިބިފައިވާ ފަރާތެއްކަމަށާއި، އޭނާގެ ވިޔަފާރިތަކާއި މުދާ ރާއްޖެއިން ބޭރުގައި ހުރި ކަމަށް ބަޔާންކޮށްފައިވާ އިންޓެލިޖެންސް ރިޕޯޓެއްގެ މައްޗަށް ބިނާކޮށް، ހިތުގެ ބައްޔަށް ފަރުވާ ހޯދުމަށް އިންޑިއާއަށް ދަތުރުކުރުމަށް ބޭނުންވާ ޓްރެވަލް ޑޮކިއުމަންޓް ދޫކުރެވެން ނެތް ކަމަށް ކްރިމިނަލް ކޯޓުން ބުނެފައިވާތީ، ފުލުހުން ތައްޔާރުކުރި އެ ރިޕޯޓްގެ މައުލޫމާތު ހިއްސާ ކުރުމަށް އެދި ސަޢީދު ފުލުހަށް ހުށަހަޅުއްވައިފިއެވެ.

އަންގާރަ ދުވަހު ސައީދުގެ ފަރާތުން ފުލުހަށް ހުށަހެޅި މި ސިޓީގައި ބުނެފައިވަނީ، ފުލުހުންގެ ފަރާތުން އެފަދަ ރިޕޯޓެއް ތައްޔާރުކޮށް ހުށަހަޅައިފައިވާނަމަ އެއީ ކަނޑައެޅިގެން ހަގީގަތާ ހިލާފު ވާހަކަތަކެއް ހިމެނޭ ރިޕޯޓެއް ކަމަށެވެ. އަދި ސަޢީދުގެ އެއްވެސް މުދަލެއް ވިޔަފާރިއެއް އަދި ރާއްޖެއިން ބޭރުގައި ރައްކާކޮށްފައިވާ އެއްވެސް ފައިސާއެއް ވެސް ނުހުންނާނެ ކަމަށް ދަންނަވަނީ އިޚުލާސްތެރިކަމާ ތެދުވެރިކަމާއެކުގައި ކަމަށެެވެ. ރާއްޖެއިން ބޭރުގައި ސަޢީދުގެ މުދަލެއް ހުރި ނަމަ އެ މުދަލެއް އޭނާގެ މިލްކިއްޔާތަށް ވެއްދުމަށްޓަކައި، ވީ އެންމެ އަވަސް ފުރުސަތެއްގައި އެ މުދަލަކާ ވިޔަފާރީގެ ތަފްސީލު ދެއްވުމަށް ސަޢީދު ވަނީ އެދިވަޑައިގެން ފައެވެ.

މީގެ އިތުރުން އެ ސިޓީގައި ބުނެފައިވަނީ ކަނޑައެޅިގެން ހަގީގަތާ ޚިލާފު ދޮގު ވާހަކަތަކެއްގެ މައްޗަށް ބިނާވެތިބެ، ރާއްޖޭގެ ޤާނޫނު އަސާސީން އޭނާއަށް ލިބިދީފައިވާ ބޭސްފަރުވާ ކުރުމުގެ ހައްގާއި ދިރިހުރުމުގެ ހައްގުން، ފުލުހުންގެ މުއައްސަސާއިން ފާޅުގައި ހުރަސްއަޅަމުންދާ ކަމަށެވެ. އެފަދަ ހަގީގަތާ ޚިލާފު ދޮގުވާހަކަތަކެއް ހިމެނޭ ރިޕޯޓެއް ފުލުހުންގެ މުއައްސަސާއިން ތައްޔާރުކޮށް ޕީޖީއަށް ހުށަހަޅާފައިވާނަމަ، އެކަން އިސްލާހުކޮށް އޭނާ އާއި ގުޅުން ހުރި ސައްޚަ މައުލޫމާތު ހޯއްދެވުމަށްފަހު ކަމާ ގުޅުން ހުރި އިދާރާތަކަށް ހިއްސާ ކުރުމަށް ވަނީ އެދިފައެވެ. އަދި އެފަދަ ރިޕޯޓެއް ފުލުހުންގެ ފަރާތުން ޕީޖީއަށް ހުށަހަޅައިފައިވާނަމަ އެ ރިޕޯޓާއި ގުޅޭ ތަފްސީލީ މައުލޫމާތު ހިއްސާ ކޮށްދެއްވުމަށް ވެސް ސަޢީދު ވަނީ އެދިވަޑައިގެންފައެވެ.

ސަޢީދުގެ ޕާސްޕޯޓް ހިފަހައްޓާފައިވަނީ 2024 ވަނަ އަހަރުގެ އޮކްޓޯބަރު މަހުގެ 19 ވަނަ ދުވަހުއެވެ. ސަޢީދަކީ ހިތުގެ ބައްޔަށް އިންޑިއާއިން ފަރުވާ ހޯދާފައިވާ އަދި މިހާރުވެސް ޑޮކްޓަރުގެ ލަފަޔާއި އިރުޝާދުގެ މަތިން ބޭސް ނެގުމުގެ ކަންކަމާ ސިއްޚީ ކަންކަމުގައި ލަފާ ހޯދަމުންދާ ފަރާތެކެވެ. ބޭސްފަރުވާއަށް 15 ދުވަހުގެ މުއްދަތަށް އިންޑިއާ އަށް ދަތުރުކުރަން ބޭނުންވާތީ ޕާސްޕޯޓް ހިފެހެއްޓުމުގެ މައްސަލަ މުރާޖާ ކުރުމަށް އެދުމުން، ކްރިމިނަލް ކޯޓުން ވަނީ ޕާސްޕޯޓް ހިފެހެއްޓުމުގެ އަމުރު މުރާޖާކުރުމުގެ އަޑު އެހުމެއް 2025 ވަނަ އަހަރުގެ އޮގަސްޓު މަހުގެ 5 ވަނަ ދުވަހު ބާއްވާފައެވެ.

މި އަޑުއެހުން ބޭއްވުމުގެ ކުރިން، 2025 ވަނަ އަހަރުގެ މެއި މަހުގެ 10 ވަނަ ދުވަހު ސަޢީދުގެ ފަރާތުން ބޭސްފަރުވާއަށް ފުރޭނެ އިންތިޒާމް ހަމަޖައްސަވައި ދެއްވުމަށް އެދި ޕްރޮސެކިއުޓަރ ޖެނެރަލް (ޕީޖީ) އޮފީހުގައި ވަނީ އެދިފައެވެ. އެފަހަރު، ހުށަހަޅާފައިވާ މެޑިކަލް ލިޔުންތަކަށް ރިޔާއަތްކޮށް ރާއްޖެއިން ބޭރަށް ބޭސްފަރުވާއަށް ދަތުރުކުރުމުގެ ޟަރޫރަތެއް އޮތްކަމަށް އެ އޮފީހުން ގަބޫލުކުރާ ކަމަށް ބުނެފައިވެއެވެ. އަދި ސަޢީދުގެ ފަރާތުން ޕާސްޕޯޓް ހިފެހެއްޓި އަމުރު މުރާޖާޢާ ކުރުމަށް އެދޭ ހާލަތުގައި 15 ދުވަހުގެ މުއްދަތަށް ޓްރެވަލް ޑޮކިއުމަންޓެއް ދޫކުރުމަށް އެ އޮފީހުގެ އިއުތިރާޒެއް ނެތް ކަމަށް ކްރިމިނަލް ކޯޓުގައި ދަންނަވާނެ ކަމަށް ވެސް ޕީޖީ އޮފީހުން ވަނީ ބުނެފައެވެ.

ނަމަވެސް، 2025 ވަނަ އަހަރުގެ އޮގަސްޓު މަހުގެ 5 ވަނަ ދުވަހު ބޭއްވި އަޑު އެހުމުގައި، ފުލުހުންގެ ފަރާތުން އިންޓެލިޖެންސް ރިޕޯޓެއް ޕީޖީއަށް ލިބިފައިވާ ކަމަށް ބުނެފައިވެއެވެ. އަދި އެ ރިޕޯޓް ޝަރީއަތަށް ހުށަހަޅާފައިވާ ކަމަށް ޕީޖީން ވަނީ ބުނެފައެވެ. އެ ރިޕޯޓުގައި ރާއްޖެއިން ބޭރުގައި ސަޢީދުގެ ވިޔަފާރިތަކާއި މުދާ ހުރިކަމަށާއި އަދި ސަޢީދަކީ ރާއްޖެއިން ބޭރުގައި ދިރިއުޅުމުގެ ތަނަވަސްކަން ހުރި ފަރާތެއް ކަމަށް ބަޔާން ކޮށްފައިވެއެވެ. މި ރިޕޯޓުގެ މައްޗަށް ބިނާކޮށް ޝަރީއަތުން ވަނީ ޓްރެވެލް ޑޮކިއުމަންޓެއް ވެސް ދޫކުރެވެން ނެތް ކަމުގައި ނިންމާފައެވެ.