"ޙާލު ސީރިއަސް މީހާއަށް ވުރެ، ފުރާނަ ސަލާމަތްކުރެވުމުގެ ފުރުޞަތު އޮތް މީހާ ޚިޔާރުކުރުން ނޫންގޮތެއް ނެތް"

ނިރުބަވެރި ޔަހޫދީންގެ ޤަތުލުޢާންމުގައި ބެދިފައި އޮތް ފަލަސްޠީނުގެ ޣައްޒާއަށް އަދިވެސް ހިންދެމިލާނެ ފުރުޞަތެއް ނުލިބެއެވެ. ދުވަހަކަށް ފަހު ދުވަހެއް ޙަޔާތުން ފާއިތުވަމުން ދާ އިރު، ކޮންމެ ވަގުތަކީވެސް އެތައް ކަމެއް ތަޖުރިބާ ކުރަން ޖެހޭ ވަގުތެކެވެ. ޣައްޒާގެ ދެކުނުގެ ސިޓީއެއް ކަމަށް ވާ ޚާން ޔޫނިސްގައި ޔޫރަޕިއަން ހޮސްޕިޓަލަކީ މިއަދު ޣައްޒާގައި ޞިއްޙީ ޚިދުމަތް ކިރިޔާވެސް ދެވެން ހުރި މަދު ތަންތަނުގެ ތެރެއިން އެއް ތަނެވެ.

މުވައްޒަފުންނާއި ވަޞީލަތްތަކާއި ޢާލާތްތަކުގެ ދަތިކަން ކުރިމަތިވެފައި އޮތީ އޭގެ އެންމެ އިންތިހާއަށެވެ. ނަތީޖާއަކަށް ވީ، ހޮސްޕިޓަލަށް ބަލައިގަންނާނެ ޕޭޝަންޓުންނާއި ބަލައިގެންވެން ނެތް ޕޭޝަންޓުން ޚިޔާރު ކުރަން މަޖުބޫރުވުމެވެ. ފުރާނައަށް ނުރައްކާ ވާ ފަދަ ބޮޑެތި އަނިޔާތަކާއެކު ހޮސްޕިޓަލަށް ގެންދެވޭ ބައެއްގެ ތެރެއިން، ފަރުވާ ދޭނެ މީހަކު ޚިޔާރު ކުރުމަކީ އެއްވެސް މީހަކަށް ނިންމާލަން މާ ފަސޭހަ ކަމަކަށް ނުވާނެއެވެ. ފުރާނައަށް ނުރައްކާ ވާ ޒަޚަމްތަކާއެކު އަންނަ ބައެއް މީހުން ފޮނުވާލަން އޮތީ މަޖުބޫރުވެފައެވެ. އެނޫން ގޮތެއް ނެތުނީއެވެ.

ޔޫރަޕިއަން ހޮސްޕިޓަލަކީ 240 މީހުންގެ ޖާގައިގެ ހޮސްޕިޓަލެކެވެ. ނަމަވެސް، މިއަދު އެ ހޮސްޕިޓަލުން ޚިދުމަތް ދޭ މީހުންގެ ޢަދަދު 1000 އަށް އަރައެވެ. އިޒްރޭލުގެ ޢުދުވާންތަކުގައި ގެދޮރު ގެއްލިފައި ވާ ބައެއް މީހުން ވެސް ދަނީ، ޔޫރަޕިއަން ހޮސްޕިޓަލުގެ އެކި ސަރަޙައްދުތަކުގައި ހިޔާވަހިކަން ހޯދަމުންނެވެ.

ޔޫރަޕިއަން ހޮސްޕިޓަލުގައި ޕްލާސްޓިކް ސަރޖަންއެއްގެ ގޮތުގައި މަސައްކަތް ކުރަމުން އަންނަ ޑރ އަހުމަދު އަލް މުޚައްލަތީ ބުނި ގޮތުގައި، ޕޭޝަންޓުންގެ ތެރެއިން ފަރުވާ ދޭނެ ބަޔަކު ޚިޔާރު ކުރަން މަޖުބޫރުވީ މަދު ދުވަހަކު ނޫނެވެ. އެގޮތުން ދިރިހުރުމުގެ ފުރުޞަތު ބޮޑު ކަމަށް ފެންނަ ޕޭޝަންޓުންގެ ފަރުވާ ކުރިއަށް ގެންގޮސް، އިންތިހާއަށް ހާލު ދެރަ ޕޭޝަންޓުން ދޫކޮށްލަން މަޖުބޫރުވާކަންވެސް އޭނާ ވަނީ ފާހަގަ ކޮށްފައެވެ.

ފަރުވާ ދޭނެ ޕޭޝަންޓުން ޚިޔާރު ކުރުމުގައި ކުރިމަތިވާ ޕްރެޝަރުގެ އިތުރަށް، އޮޕަރޭޝަންތައް ކުރިއަށް ދާ ވަގުތަކީވެސް ހިތަށް ފަސޭހަ ވަގުތުތަކެއް ނޫންކަން ޑރ މުޚައްލަތީ ފާހަގަ ކުރިއެވެ. އެގޮތުން، އެ މީހެއްގެ މުޅި ޢާއިލާ މި ދުނިޔެއާ ވަކިވެ ގޮސްފައި ވާ މީހެއްގެ ގުނަވަންތައް ބުރިކުރުމަށް އޮޕަރޭޝަން ކުރަމުންދާ ވަގުތު ކަރުނަ ހިފަހައްޓާލަން ދަތިވެ، ރޮވޭ ކަމަށް ޑރ މުޚައްލަތީ ބުންޏެވެ.

އޮކްޓޯބަރ 7، 2023 ވަނަ ދުވަހު ޙަމާސް އިން އިޒްރޭލަށް ދިން ޙަމަލާގެ ރައްދުގައި ކަމަށް ބުނެ، ޣައްޒާގައި ހިންގަން ފެށި ޤަތުލުޢާންމުގައި ފަލަސްޠީނުން މަރުވި މީހުންގެ ޢަދަދު 27000 އަށް ވުރެ މައްޗަށް އަރައެވެ. ލައްކައަކާ ގާތް ކުރާ ޢަދަދެއްގެ ބަޔަކު ޒަޚަމްވި އިރު، ގުނަވަންތައް ބުރިބުރިވެ، ޢުމުރުގެ ބާކީ އޮތް ދުވަސްތައް، ނުކުޅެދޭ ޙާލުގައި ގުނަން ޖެހިފައި ތިބި މީހުންގެ ޢަދަދުވެސް މަދެއް ނޫނެވެ.

ޤަތުލުޢާންމުގެ ކުރިންވެސް ޣައްޒާއަކީ ހުރިހާ ގޮތަކުން ފިއްތާލާފައި އޮތް ސިޓީއެކެވެ. މިއަދު ޣައްޒާގައި ޞިއްޙީ ޚިދުމަތް ދެވޭ ޙާލަތުގައި ހުރީ މަދު ތަނެކެވެ. ބާކީ ހުރި ތަންތަނަށް އިޒްރޭލުން ޙަމަލާ ދީފައި ވާ އިރު، އަނެއް ބައި ތަންތަން ވަނީ ރެއިޑް ކޮށްފައެވެ. ޚިދުމަތް ދެވޭ ޙާލަތުގައި ހުރި މަދު ތަންތަނަށް އޮތް ޕްރެޝަރު ކުޑައެއް ނޫނެވެ. އިޒްރޭލުގެ ފައުޖުތައް ދަނީ ހޮސްޕިޓަލުތަކާ ކައިރިއަށް ޖެހެމުންނެވެ. އިޒްރޭލުން ބުނާ ގޮތުގައި ހޮސްޕިޓަލު ފަދަ ތަންތަނަކީ، ޣައްޒާ ކޮންޓްރޯލް ކުރާ ޙަމާސް ޖަމާޢަތުން ހަނގުރާމައިގެ ކިއްލާއެއްގެ ގޮތުގައި ބޭނުން ކުރާ ތަންތަނެވެ.