ގާދިފުއްށި ރައްޔިތުންނަށް ވެސް ރައީސް ދެއްވި ޔަގީންކަމަކީ، ބަޖެޓު ނުކުރާ ގުރައިދޫ އެއާޕޯޓުގެ މަސައްކަތުގެ ޔަގީންކަން
އެހެން ނަމަވެސް ގުރައިދޫގައި އެއާޕޯޓު އެޅުމުގެ މަސައްކަތަކީ މި އަހަރުގެ ބަޖެޓުގައި ހިމެނިފައި ނެތް މަސައްކަތެއް
ރައީސް ޑރ. މުޙައްމަދު މުއިއްޒު
ރާއްޖޭގެ އިގްތިސާދު އޮތީ ދަރަނިވެރިވެފައި ކަމަށް ވިދާޅުވެ، އެހެން ނަމަވެސް ބަޖެޓުން ބޭރުން ތ. ގުރައިދޫގައި އަޅުއްވާނެ ކަމަށް ވިދާޅުވި އެއާޕޯޓުގެ ޔަގީންކަން އެ އަތޮޅު ގާދިއްފުށީގެ ރައްޔިތުންނަށް ވެސް ރައީސް، ޑރ. މުޙައްމަދު މުއިއްޒު ދެއްވައިފިއެވެ.
ރައީސް އެފަދައިން ވިދާޅުވެފައިވަނީ ތ. އަތޮޅަށް އެމަނިކުފާނު އަދި ސަރުކާރުގެ އިސް ބޭފުޅުން ކުރެއްވި ދަތުރުފުޅުގައި، ގާދިއްފުއްފުށްޓަށް ވަޑައިގެން އެރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައިއެވެ.
އެގޮތުން ބުރާސްފަތި ދުވަހު ރައީސް ވިދާޅުވީ، ގާދިއްފުށީގެ ބިން ހިއްކުމުގެ މަސައްކަތް، އެމަނިކުފާނުގެ ވައުދުފުޅާ އެއްގޮތަށް މި އަހަރުގެ ތެރޭގައި ފެށޭނެ ކަމަށެވެ. އަދި އެއާ ވިދިގެން ވިދާޅުވީ، ގާދިއްފުށީގެ ބިން ހިއްކުމުމުގެ މަސައްކަތް ކުރެވޭނީ، އެރަށާ އިންވެގެން އޮންނަ ތ. ގުރަައިދޫގެ އެއާޕޯޓުގެ މަސައްކަތާ އެކުއެކީގައި ކަމަށެވެ.
ރައީސް އެފަދައިން ވިދާޅުވިއިރު، ތ. އަތޮޅަށް އެމަނިކުފާނު ކުރައްވަމުން ގެންދަވާ ދަތުރުފުޅުގެ ތެރެއިން ބައެއް ރަށްރަށަށް ވަޑައިގެން، ރާއްޖޭގެ އިގްތިސާދީ ޙާލަތުގެ ސަބަބުން ބޮޑެތި މަޝްރޫއުތައް ކުުރުމަށް ދަތިތަކެއް އެބަހުރި ކަމަށް ވިދާޅުވެފައެވެ. އެގޮތުން އެ އަތޮޅު ދިޔަމިގިއްޔަށް ވަޑައިގެން ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ވަނީ ރާއްޖޭގެ ދަރަނި ވަރަށް ބޮޑަށް މައްޗަށް ގޮސްފައިވާކަން ފާހަގަ ކުރައްވައި، މަޝްރޫއުތައް އެއް ފަހަރާ ކުރިއަށް ގެންދެވުމަކީ ދަތި ކަމެއް ކަމަށް ވިދާޅުވެފައެވެ.
އެހެން ނަމަވެސް އެރަށާ އިންވެގެން އޮންނަ ގުރައިދޫއަށް ވަޑައިގެން، އެރަށުގެ ރައްޔިތުންނަށް ދެއްވި ޔަގީން ކަމަކީ، 2024 ވަނަ އަހަރުގެ ބަޖެޓުގައި ހިމެނިފައި ނެތް ގުރައިދޫ އެއާޕޯޓުގެ ޢަމަލީ މަސައްކަތް މި އަހަރު ފައްޓަވާނެ ކަމުގެ ޔަގީންކަމެވެ. އެހެން ނަމަވެސް އެކަމަށް ފައިސާ ހޯއްދަވާނެ ގޮތެއް ރައީސް އެދުވަހު ވިދާޅެއްނުވެއެވެ.
އެގޮތުން އެ ޔަގީންކަން ގާދިއްފުށީ ރައްޔިތުންނަށް ވެސް ދެއްވަމުން ރައީސް ވިދާޅުވީ، މިދިޔަ ސަރުކާރުން ފެށި އެހެން ނަމަވެސް މި ސަރުކާރުން ހުއްޓުވާފައި އޮތް، އެ ރަށުގެ ބަނދަރު މަސައްކަތް ވެސް ކުރިއަށް ގެންދެވޭނެ ގޮތެއް ހޯއްދަވައިދެއްވާނެ ކަމަށެވެ.
