ލޯން އެއްބަސްވުމެއްގެ ދަށުން ވިޔަސް ބަޔާން އަށް ކުޅެމުން އަންނަ ރެނާޓޯ ސަންޗޭޒް ދޫކޮށްނުލާނެ ކަމަށް އެޓީމުގެ ކޯޗު ކާލޯ އެންޗޮލޮޓީ ބުނެފި އެވެ.
ނޫސްވެރިންނަށް މައުލޫމާތު ދެމުން އެންޗޮލޮޓީ ބުނީ ރެނާޓޯ ސަންޗޭޒްއާ ބެހޭގޮތުން ދައްކަން މާގިނަ ވާހަކައެއް ނެތް ކަމަށާއި، މި ސީޒަން އޭނާ ފެށީ ބަޔާޏްއާ އެކު ކަމަށާއި، މި ސީޒަން ނިމެންދެންވެސް އޭނާ ކްލަބުގައި މަޑުކުރާނެ ކަމަށެވެ.
އެގޮތުން އެންޗޮލޮޓީ ބުނީ ސަންޗޭޒް އަންނަނީ ބަޔާންގައި ރަނގަޅު ކުޅުމެއް ދައްކަމުން ކަމަށާއި، އެންމެ ފަހުން ބަޔާން ކުޅުނު މެޗުގައި ވެސް ސަންޗޭޒްގެ ކުޅުން ފާހަގަކޮށްލެވޭ ކަމަށެވެ.
ސަންޗޭޒް ވަނީ އިންޓަނޭޝަނަލް ޗެމްޕިއަންސް ކަޕްގައި ބަދަލު ކުޅުންތެރިޔެއްގެ ގޮތުގައި އާސެނަލް، އޭސީ މިލާން އަދި އިންޓަ މިލާންއާ ދެކޮޅަށް ކުޅެފައެވެ. އޭނާ އެންމެ ފަހުން ކުޅުނު މެޗުގައި ޗެލްސީއާ ދެކޮޅަށް ނިކުތީ ފުރަތަމަ އެގާރައިގައި ހިމެނިގެންނެވެ.
އޭސީ މިލާންގެ އިތުރުން ދުނިޔޭގެ ނަން މަޝްހޫރު ގިނަ ކްލަބްތަކުން އަންނަނީ ރެނާޓޯ ސަންޗޭޒް ހޯދުމަށް މަސައްކަތްކުރަމުންނެވެ. އޭގެ ތެރޭގައި ޔުވަންޓަސްވެސް ހިމެނެއެވެ.
ބެންފީކާ އިން ކެރިޔަރު ފެށި އުމުރުން އެންމެ 19 އަހަރުގެ ސަންޗޭޒް އަންނަނީ ޒުވާން އުމުރުގައި މޮޅު ކުޅުމެއް ދައްކަމުންނެވެ. އެގޮތުން މިދިޔަ ސީޒަނުގައި އޭނާ ވަނީ ބަޔާނަށް 25 މެޗު ކުޅެފައެވެ.
ސަންޗޭޒް ބަޔާން އަށް ބަދަލުވީ މިދިޔަ އަހަރުގެ މެއި މަހު، ފަސް އަހަރު ދުވަހުގެ އެއްބަސްވުމެއްގެ ދަށުން 35 މިލިއަން ޕައުންޑަށެވެ. އެހެންކަމުން އޭނާގެ އެއްބަސްވުން ހަމަވާނީ 2021 ވަނަ އަހަރެވެ.
މި ސީޒަން ރަސްމީކޮށް ހުޅުވާ މެޗުގައި ބަޔާން ނިކުންނާނީ ޖަރުމަން ސުޕާކަޕްގައި ބްރޯޝިއާ ޑޯޓްމަންޑްއާ ދެކޮޅަށެވެ. އެ މެޗު ކުޅުމަށް އެޓީމު އަންނަ ހޮނިހިރު ދުވަހު ޑޯޓްމަންޑަށް ދަތުރުކުރާނެ އެވެ.
