އެނދެއްގެ މަތީގައި އޮށޯވެލައިގެން އޮތް ޢަބްދުލްޢަލީމް މުޢީނީއަކީ ހާދަހާވާ ހިތްވަރުގަދަ މީހެކެވެ. އޭނާ ބަލަމުން އެދާ ތަސްވީރުތަކަކީ މިއަދު އޭނާގެ މުޅި ޙަޔާތުގެ އަގު ބޮޑު ތަރިކައެކެވެ. އެ ތަސްވީރުތަކުގައި ވަނީ އޭނާ އިންތިހާ ލޯބިވި އަނބިދަރިންނެވެ. މުޢީނީގެ ދިރިއުޅުމާ އެމީހުން ވަކިވިތާ އަހަރު ދުވަސް ފާއިތުވީއެވެ.

މުޢީނީގެ އަނބިމީހާއާއި ދަރިންކޮޅު، މި ފަނާވަނިވި ދުނިޔެއާ އަބަދުގެ އަބަދަށް ވަދާޢުގެ ސަލާމް ކުރީ މީގެ އަހަރެއް ކުރިން ތުރުކީވިލާތަށް އައި ބާރުގަދަ ބިންހެލުމުގައެވެ. އޭރު އެމީހުން ތިބީ މުޢީނީއާ ޖެހިގެންނެވެ. ތަސްވީރުތައް ބަލަން އޮތް މުޢީނީގެ ސިކުނޑީގައި އެތައް ޚިޔާލެއް އެނބުރެމުން ދިޔަ ކަން، އޭނާގެ މޫނަށް ބަލައިލި ކޮންމެ މީހަކަށްވެސް ޔަޤީން ވާނެއެވެ. ސޫރިޔާގައި ކުރި ވަރުގަދަ ހަނގުރާމަގަނޑުގެ ތެރެއިން ނުކުމެ، ސޫރިޔާގައި އެ ޢާއިލާއިން އައު ދިރިއުޅުމެއް ބިނާކޮށް، ކޮޅަށްޖެހި ހަނދާންތަކަކީ މިއަދު މުޢީނީގެ ފިކުރުތަކުގެ ބޮޑު ބައެއް ހިއްސާ ކުރާ ހަނދާންތަކެކެވެ.

ފަހުގެ ތާރީޚެއްގައި ތުރުކީވިލާތަށް އައި އެންމެ ބާރުގަދަ ބިންހެލުމުގެ ގޮތުގައި ރެކޯޑް ކުރި ބިންހެލުމުގައި ތުރުކީވިލާތުގެ އިތުރުން އަވަށްޓެރި ސޫރިޔާގެ އެތައް އަވަށަކާއި ސިޓީއެއް ބިމާ ހަމަކޮށް، ހަފުސްކޮށްލިއެވެ. ރެކްޓަރ މިންގަނޑުން 7.8ގެ ބާރު މިނުގައި އައި ބިންހެލުމުގައި ތުރުކީވިލާތުން ބައި ލައްކައަށް ވުރެ ގިނަ މީހުން، އަދި ސޫރިޔާއިން 8500 އެއްހާ މީހުންގެ ފުރާނަ ގެއްލުނެވެ. އެތައް މިލިއަން ބައެއްގެ ގެދޮރު ގެއްލި، ރެފިއުޖީންނަށް ވިއެވެ.

ޢުމުރުން 34 އަހަރުގެ މުޢީނީއަކީ މިއަދު ނުކުޅެދޭ މީހެކެވެ. ހިނގާބިނގާވެއެއް ނުއުޅެވެއެވެ. ހަތޭގައި އޭނާ ދިރިއުޅެމުން ދިޔަ އެޕަރޓްމަންޓްގެ ވެއްޓިފައި ވާ ޢިމާރާތުގެ ބައިތަކުގެ ދަށުން މުޢީނީ ސަލާމަތް ކުރީ، ދަންވަރުގެ ހިމޭން ވަގުތުގައި މުޅި ރަށް ގުޑުވާލި ބިންހެލުން އައިތާ 3 ވަރަކަށް ދުވަސް ފަހުންނެވެ.

މުޢީނީގެ އަނބިމީހާ، އިސްރާއަށް އޭރު ވަގުތު ފާއިތުވެއްޖެއެވެ. 10 އަހަރުގެ ފިރިހެން ދަރިފުޅު، މުހްސިންއާއި 7 އަހަރުގެ ދަރިފުޅު، ބަސީރާއަށްވެސްމެއެވެ. އިސްރާ އޮތީ މުޢީނީއާ ޖެހިގެން ކަހަލަ ގޮތަކަށެވެ. ހާދިޘާ ހިނގިތާ 12 ވަރަކަށް ގަޑިއިރު ވަންދެން އިސްރާއާ ވާހަކަ ދެކެވުނު ކަމަށް މުޢީނީ ކިޔައިދިނެވެ. ފުރަތަމަ މަރުވީ ދަރިންކޮޅު ކަމަށާ، ދެން މަރުވީ އިސްރާ ކަމަށްވެސް މުޢީނީ ބުންޏެވެ.

ފެބްރުއަރީ 6، 2023 ވަނަ ދުވަހުގެ ބާރުގަދަ ބިންހެލުމުގެ ހަނދާންތައް އައު ކުރަމުން މުޢީނީ ބުނީ، އޭނާގެ ޢާއިލާއަށް ވުރެ ވަކިން ބޮޑަށް ހަނދާންވާ ދެވަނަ ދެކަމެއް ނުވަތަ ބަޔަކު ނެތް ކަމަށެވެ.

ވެއްޓިފައި ވާ ޢިމާރާތުގެ ކޮންކުރީޓްގަނޑުގެ ދަށުގައި މުޢީނީގެ ހަށިގަނޑުން ބައެއް ފެންނަން އޮތް މަންޒަރަކީ، ތުރުކީވިލާތުގެ ބިންހެލުމާ ގުޅިގެން ދުނިޔޭގެ އެކި ކަންކޮޅުތަކުން އެތައް ބައެއްގެ ސަމާލުކަން ހޯދި މަންޒަރެކެވެ. ދުނިޔޭގެ އެކި ހިސާބުތަކުގައި އެ މަންޒަރު ޝާޢިއުވެސް ކުރިއެވެ. ބިންހެލުން އައިތާ 2 ދުވަސްފަހުން، މީހުން ސަލާމަތް ކުރާ މީހުންގެ ޓީމު އެ ސަރަޙައްދުގައި ހަރަކާތްތެރިވަމުން ދިޔަ އިރު، ބަލިބަލި ގޮތަކަށް އެ ޓީމުގެ މީހުންނަށް މުޢީނީ ހަނާ އަޅަމުން ދާ މަންޒަރު ފެންނަ އެ ތަސްވީރުން މިއަދުވެސް ކަރުނަ ހިލުވާލައެވެ. ވަކިން ހާއްސަކޮށް، މުޢީނީ މިއަދު އޮތް ޙާލު އެނގުމުންނެވެ.

މުޢީނީގެ އެއް ފައި ބުރިކޮށްލާފައި ވާ އިރު، އަނެއް ފައިގެ ކަކުލު ހުޅުން ތިރި އޮތީ ވާގިނެތިފައެވެ. އެއީ ކޮންކުރީޓްއާއި ގައުކުނޑިތަކުގެ ދަށުވެގެން ލިބުނު އަނިޔާގެ ސަބަބުންނެވެ. މުޢީނީއާއި އޭނާގެ ޢާއިލާއިން އުފާވެރި ދިރިއުޅެއް އުޅެމުން ދިޔަ ހަތޭ ޕްރޮވިންސްއަކީ، ބިންހެލުމުގައި އެންމެ ބޮޑު ގެއްލުމެއް ލިބުނު ސަރަޙައްދެވެ.

މުޢީނީ މިހާރު ދިރިއުޅެމުން ދަނީ ތުރުކީވިލާތުގެ ހުޅަނގުއުތުރު ސަރަޙައްދުގައެވެ. އޭނާގެ މަންމައާއި، ދައްތައާއި ބޮޑުބޭބެ ކިޔާ 3 ކުދިންނާ އެކީގައެވެ. ޤަވައިދުން ފިޒިއޮތެރަޕީގެ ފަރުވާ ހޯދަމުންދާ މުޢީނީ މިއަދު ދެކެމުންދާ ހުވަފެނަކީ، މަސްނުޢީ ފައެއްގެ ނަޞީބު ލިބި، ވަޒީފާއަށް ދެވޭނެ ގޮތެއް ވުމެވެ. ދައްކަން ހުރި ބިލްތައް ޚަލާސް ކުރުމަށްފަހު ހަތޭއަށް ނުވަތަ އުފަން ވަޒަން ކަމުގައި ސޫރިޔާއަށް ބަދަލުވުމަށެވެ.

އަނބިދަރިންނާއެކު ސޫރިޔާ ދޫކޮށް، ތުރުކީވިލާތަށް މުޢީނީ ބަދަލުވީ 2016 ވަނަ އަހަރުގެ ތެރޭގައެވެ. ސޫރިޔާގައި މުޢީނީ އުޅުނީ ކޮމްޕިއުޓަރ ވިއްކުމުގެ ވިޔަފާރިގައެވެ. ތުރުކީވިލާތަށް ހިޖުރަ ކުރުމަށްފަހު ދެން އުޅުނީ މޭވާއާއި ތަރުކާރީ ވިއްކުމުގެ ވިޔަފާރީގައެވެ.

13 އަހަރެއްހާ ދުވަހަށް ދިގުލައިގެން ދިޔަ ސޫރިޔާ ހަނގުރާމައިގެ ތެރެއިން ރެފިއުޖީންގެ ގޮތުގައި ނުކުތް އެތައް މިލިއަން ބަޔަކަށް ތުރުކީވިލާތުން މަރްޙަބާ ކިއެވެ.

މުޢީނީ މިހާރު ދިރިއުޅެމުންދާ ބުރްސާއޭ ކިޔާ ސަރަޙައްދަކީ، ހަތޭއާ އަޅާ ބަލާއިރު ކުލީގެ އަގުތައް 5 ގުނަ ބޮޑު ތަނެކެވެ. ކުލި ދެއްކުމާއި ކާބޯތަކެތީގެ ކަންކަން ހަމަޖެއްސުމަށް، މުޢީނީ ބަރޯސާވަނީ އޭނާގެ ބޭބެއަށެވެ.

މުޢީނީގެ ޞިއްޙީ ފަރުވާ ހިނގާ ޚަރަދުތަކުގެ ބިލްތައް ހުރީ ޚަލާސް ނުކުރެވި، ފުނިޖެހިފައެވެ. ބިންހެލުމުގައި ލިބުނު އަނިޔާއެއްގެ ސަބަބުން ހެދި ބްލެޑަރގެ އޮޕަރޭޝަނެއްގެ ބިލްވެސް އަދި އޮތީ ނުދެއްކިއެވެ.

އެތެރެހަށީގެ ޑޮކްޓަރު އަދި ރީހެބިލިޓޭޝަން ފިޒީޝަންއެއް ކަމަށް ވާ، ޑރ މައެވެ އަކްޔޫޒް ވިދާޅުވި ގޮތުގައި، އަލަށް ފެށި ފިޒިއޮތެރަޕީގެ ފަރުވާއާއެކު، ވާގިނެތިފައި އޮތް ފައިގައި ބާރު ޖެހިދާނެ ކަމުގެ އިޝާރާތްތައް ވަނީ ލިބިފައެވެ. ނަމަވެސް ހިނގާބިނގާވެ އުޅެވޭ ވަރު ވާނީ އަދި ވަރަށް ދުވަހުން ކަންވެސް އޭނާ ވަނީ ފާހަގަ ކުރައްވާފައެވެ.

އޮތް ތަނުން ތެދުވެލުމަށާއި އެނޫންވެސް އެހެން ގިނަ ކަންކަން ކުރުމަށް، ދެވަނަ މީހެއްގެ އެހީ ބޭނުން ވާ މުޢީނީ ބުނި ގޮތުގައި، މިއަދު އޭނާއަށް ކުރެވޭހާވެސް ކަމަކީ ނަމާދު ކުރުމާއި، ކީރިތި ޤުރުއާން ކިޔެވުމެވެ. އަދި އެކުވެރިންނާއި ރަޙުމަތްތެރިންނާ ވާހަކަދައްކާލުމެވެ.