ލެޔާއި ކިސަޑުގެ ކޯރު ދެމުންދާ ޣައްޒާގެ މަގުތައް މަތީގައި އެތައް ބަޔަކު ހުސްފަޔާ!

ކޮންމެ ކަމެއްގައިވެސް ހެވެއް އޮވެއެވެ. ހިތްދަތި، ހިތާމަވެރި ކަމެއް މެދުވެރި ވާ ހިނދު، މުސީބާތުގެ ޝިކާރައަކަށް ވެ، އެ ގޮތުގައި ދުވަސްތައް ގުނަން އޮތުމުގެ ބަދަލުގައި، އަލިކަމުގެ ކަންފުޅެއްވެސް ވޭތޯ ބެލުމަށް ގަދަ އަޅާ މަސައްކަތް ކުރާ މީހަކަށް، ކިތަންމެ ނާމާން، ކަނު އަނދިރި ކަމުގެ ތެރެއިންވެސް އުޖާލާކަން ހޯދިދާނެއެވެ. އެކަން އެންމެ ސާފުކޮށް މިއަދު ފެންނަން އޮތީ، ނިރުބަވެރި ޔަހޫދީންގެ ޤަތުލުޢާންމުގައި ބަންދުގައި ވެފައި އޮތް ޣައްޒާގައެވެ.

އިޒްރޭލުން ހިންގަމުންދާ ރަޙުމެއް ނެތް ޤަތުލުޢާންމަށް 4 މަސް ވާން ދެން އޮތީ ހަފުތާއަކަށް ވުރެވެސް ކުޑަ ދުވަސްކޮޅެކެވެ. އެޔެއް މިޔެއް ބެލުމެއް ނެތި ދެމުންދާ ޙަމަލާތަކުގެ ތެރޭގައި، އިންސާނަކަށް ވީތީ ލިބިދޭ އެންމެ އަސާސީ ޙައްޤުތަކާއި، ދިރިއުޅުމައިގެން ކުރިއަށް ދިއުމަށް ބޭނުންވާ އެންމެ ޟަރޫރީ ޚިދުމަތްތައްވެސް ލިބެން ނެތް ތަނެއްގައި ޙަޔާތުގެ ދުވަސްތައް ގުނަމުން ދިއުމަކީ، މިއަދު ޣައްޒާގެ ރަށްވެހިންގެ "އައު އާންމު ޙާލަތަށް" ވެފައި އޮތް ފަދައެވެ.

އެމީހަކަށް ވީ ގޮތަކަށް ދިރިއުޅުމަށް މަސައްކަތެއް ކުރެވޭތޯ ބަލައެވެ. ޢާއިލާއާއި ރަޙުމަތްތެރިންގެ އެތައް ބަޔަކު ތާ އަބަދަށް ވަކިވެ ގޮސް، ޢުމުރު ދުވަހު އުޅުނު ގެދޮރު ގެއްލި، އުފަން ފަސްގަނޑުގައި ރެފިއުޖީއެއްގެ ގޮތުގައި އުޅެން ޖެހުނު ކަމުގައި ވީ ނަމަވެސް، ހިތްވަރާއެކު ދިރިއުޅުމާ ކުރިމަތިލާ އެތައް ބަޠަލުންނެއް ޣައްޒާއިން މިއަދު ފެނެއެވެ. އެފަދަ އެކަކީ ބޫޓާއި ފައިވާން ހެދުމުގެ މަސައްކަތް ކުރަމުން އަންނަ އަޙްމަދު ޙަތުޙޫތުއެވެ.

ޣައްޒާގެ އުތުރުގެ ސަރަޙައްދެއް ކަމަށް ވާ ޣައްޒާ ސިޓީއަށް ނިސްބަތްވާ އަޙުމަދު ބުނާ ގޮތުގައި، ޤަތުލުޢާންމުގެ ތެރޭގައި ފާއިތުވެ ދިޔަ ދުވަސްތަކަކީ، އަތު މަސައްކަތުން އޭނާ ތައްޔާރު ކުރާ ފައިވާނާއި ބޫޓުތަކަށް ޢާންމުންގެ މެދުގައި އޮތް ޑިމާންޑް، އިންތިހާއަށް އިތުރު ވެފައި އޮތް ދުވަސްތަކެކެވެ. ޣައްޒާގެ އަދުގެ ޙާލަތު އޮތް ގޮތުން، އައު ފައިވާނާއި ބޫޓު ގަތުމަކީ ޣައްޒާގެ ކޮންމެކޮންމެ މީހަކަށް ކުޅަދާނަ ކަމެއް ނޫނެވެ. އެހެން ކަމުން، ކިރިއާވެސް އެރެންޏާ އެ ބޫޓަކަށް ނުވަތަ ފައިވާނަކަށް އަރަނީއެވެ. ނޫނީ، ހެޔޮ އަގުގައި މަރާމާތުކޮށް، ހަދާލަނީއެވެ.

ޣައްޒާގައި މީގެ ކުރިން 15 ޝެކްލްސް ނުވަތަ 5 ވަރަކަށް އެމެރިކާ ޑޮލަރަށް ވިއްކި ފައިވާން، މިއަދު ލިބެން ހުރީ 80 ޝެކްލްސް ނުވަތަ 30 އަކަށް ޑޮލަރަށެވެ. މުޅި ޣައްޒާ ހަފުސްކޮށް، އިޤްތިޞާދު "ފުނޑާލާފައި" އޮތުމުގެ ނަތީޖާއެއްގެ ގޮތުން، އެ އަގުގައި ފައިވާނެއް ގަތުމުގެ ނަޞީބުން ޣައްޒާގެ އެތައް ބަޔަކު ވަނީ މަޚްރޫމުވެފައެވެ.

ޤަތުލުޢާންމު ފެށުމާއެކުގައި ހެން އިޒްރޭލުން ވަނީ ޣައްޒާގެ ޢާންމު ޚިދުމަތްތަކުގައިވެސް އަތް އަޅާ، ބަންދުކޮށްފައެވެ. ޣައްޒާއިން ކަރަންޓު ކަނޑާލުމަށް ފަހު ތެލުގެ ސަޕްލައިއަށްވެސް ހުރަސް އެޅީއެވެ. އަމިއްލަ ޖަނަރޭޓަރުގަނޑެއްވެސް ހިނގާ ނުލެވޭނެ ގޮތް ހެދިއެވެ. އެހެން ކަމުން، ފައިވާނާއި ބޫޓު މަރާމާތުކޮށް، ހަލާކުވެފައި ތަންތަން ހަދަނީ އެއްވެސް ކަހަލަ އިލެކްޓްރިކް ޢާލާތެއް ނުވަތަ މެޝިނަރީ އެއް ބޭނުން ނުކޮށެވެ. އެންމެ އިހު، އެވޭލާ ޒަމާނުގައި ކަން ކުރި ގޮތަށެވެ.

މިދިޔަ އޮކްޓޯބަރ މަހުގެ ފުރަތަމަ ހަފުތާގެ ތެރޭގައި ޣައްޒާއާ ދެކޮޅަށް އިޒްރޭލުން ޤަތުލުޢާންމު ފެށުމުގެ ކުރިންވެސް، ޣައްޒާގެ އިޤްތިޞާދަކީ އިނދަޖެހިފައި އޮތް އިޤްތިޞާދެކެވެ. 2007 ވަނަ އަހަރުގެ ދާޚިލީ ހަމަނުޖެހުންތަކަށް ފަހު ޙަމާސް ޖަމާޢަތުން ޣައްޒާގެ ކޮންޓްރޯލް ނެގުމާއެކު، ފަލަސްޠީނުގެ މައި ސަރުކާރާއި، މިޞްރު އަދި އިޒްރޭލުން ޣައްޒާ ފިއްތާލިއެވެ. ވިޔަފާރިއާ ބެހޭ އދގެ އިދާރާ (ޔޫއެންސީޓެޑް)ގެ ތަފާސް ހިސާބުތަކަށް ބަލާއިރު، 2023 ވަނަ އަހަރުގެ ފުރަތަމ 3 މަސްދުވަހު، ޣައްޒާގެ އިޤްތިޞާދު ހީނަރުވި ނިސްބަތް އުޅެނީ 4.5 ޕަސެންޓްގައެވެ.

4 މަހަށް ދިގުލައި ގޮސް، މިއިން ދުވަހަކުވެސް ހުއްޓުމެއް އައިސްދާނެ ކަމުގެ ކޮޅުމަތި ފެންނަން ނެތް ޤަތުލުޢާންމުގައި، ޣައްޒާގެ މުޅި އާބާދީހެން އޮތީ ރެފިއުޖީންނަށް ވެފައެވެ. ހުރިހާ ރަށްވެހިންހެން މިއަދު ތިބީ ބަނޑަށް ޖެހިފައެވެ. ޣައްޒާގައި މިވަގުތު އުފެދިފައި ވަނީ، އަދުގެ 21 ވަނަ ޤަރުނުގައި ދުނިޔެ ދުށް އެންމެ ވަރުގަދަ އިންސާނީ ކާރިޘާއޭ ދެންނެވުމަކުން ދޮގަކަށް ނުވާނެއެވެ.

ޙަމާސް ޖަމާޢަތް ނައްތާލަން ކަމަށް ބުނެ އިޒްރޭލުން ދެމުންދާ ޙަމަލާތަކުގައި ފަލަސްޠީނުގެ 27000 އެއްހާ މީހުން މި ދުނިޔެއާ ވަކި ކޮށްފައި ވާ އިރު، ގިނައީ ކުޑަ ކުދިންނެވެ. ކޮންމެ 24 ގަޑިއިރެއްގެ ތެރޭގައި 200 އެއްހާ މީހުން މަރާލާއިރު، ނިރުބަވެރި އިޒްރޭލާ ދެކޮޅަށް، ދުނިޔޭގެ އެއްވެސް ބާރަކަށް ކުރެވުނު އެއްވެސް ކަމެއް ނެތެވެ.