އިސްރާއީލުގެ ބޮޑު ވަޒީރުގެ ވިސްނުމަކީ ޣައްޒާ ހިފުން ކަމަށް އެ ގައުމުގެ ޓީވީ އަކުން ބުނެފި

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ގެ ވިސްނުމަކީ ޣައްޒާގައި ހިންގާ ހަމަލާތައް ފުޅާކޮށް، މުޅި ސަރަޙައްދު ހިފުން ކަމަށް، އޭނާގެ އޮފީހުގެ އިސް ވެރިއަކާ ހަވާލާދީ އިޒްރޭލުގެ ޗެނަލް 12 އިން ހޯމަ ދުވަހު ބުނެފިއެވެ.

އިސްރާއީލުގެ މީޑިއާތަކުން ރިޕޯޓުކޮށްފައިވާ ގޮތުގައި، ނަތަންޔާހޫ މި މައްސަލައާ މެދު ގޮތެއް ނިންމުމަށް އަންގާރަ ދުވަހު އޭނާގެ ކެބިނެޓް ބައްދަލު ކުރާނެއެވެ. ހޯމަ ދުވަހު ރޮއިޓަރސް އިން އިސްރާއީލުގެ އިސް ވެރިއަކާ ހަވާލާދީ ބުނެފައި ވަނީ އިތުރު ބާރުގެ ބޭނުން ކުރުން އެއީ އޮޕްޝަނެއް ކަމުގައެވެ.

މިދިޔަ ހޮނިހިރު ދުވަހު، އެ ޤައުމަށް ޒިޔާރަތްކުރި އެމެރިކާގެ މެދުއިރުމަތީގެ ސަފީރު ސްޓީވް ވިޓްކޮފް ވަނީ ޣައްޒާގައި ހިނގަމުންދާ ހަނގުރާމަ ނިމުމަކަށް ގެނައުމަށް އިސްރާއީލުގެ ސަރުކާރާ އެކު މަސައްކަތް ކުރަމުންދާ ކަމަށް ބުނެފައެވެ.

ނަމަވެސް އިސްރާއީލުގެ އިސްވެރިން ވަނީ ޣައްޒާގައި ހިންގާ ހަމަލާތައް ފުޅާކުރުމާއި، ވީރާނާވެފައިވާ އެ ސަރަޙައްދުގެ ބައެއް ހިސޯރު ކުރުމާ ގުޅޭ ޚިޔާލުތައް އެމެރިކާގެ މަންދޫބަށް ހުށަހަޅާފައެވެ.

ދޯހާގައި ކުރިއަށްދިޔަ ހަނގުރާމަ ހުއްޓުވުމުގެ މަޝްވަރާތަކުގެ މަޤްޞަދަކަށްވީ އެމެރިކާގެ އެހީތެރިކަމާއެކު 60 ދުވަހުގެ މުއްދަތަކަށް ހަނގުރާމަ މެދުކަނޑާލުމެވެ. އަދި މި މުއްދަތުގައި ޣައްޒާ އަށް އެހީ ފޯރުކޮށްދީ، ހަމާސް އިން ހިފަހައްޓާފައިވާ ރަހީނުންގެ ދެބައިކުޅައެއްބައި ދޫކޮށްލުމާ އަދި އޭގެ ބަދަލުގައި އިސްރާއީލުގެ ޖަލުތަކުގައި ބަންދުކޮށްފައިވާ ފަލަސްޠީނު ޤައިދީން ދޫކޮށްލުމެވެ. އެހެން ނަމަވެސް އެ ވާހަކަތައް ކާމިޔާބު ނުވެ ހުއްޓުމަކަށް ވަނީ އައިސްފައެވެ.

ނަތަންޔާހޫ ބުރާސްފަތި ދުވަހު ވިޓްކޮފްއާ ބައްދަލު ކުރުމަށް ފަހު، އިސްރާއީލުގެ އިސް ވެރިއަކު ބުނެފައި ވަނީ "ވޮޝިންގްޓަނާއި އިސްރާއީލާ ދެމެދު އެއްބަސްވުމަކަށް އާދެވެމުންދާ" ކަމަށެވެ. އެއީ ހަމާސް އާއެކު ހަނގުރާމަ ހުއްޓުވުމުގެ އެއްބަސްވުމަކަށް އައުމުގެ ބަދަލުގައި "ހުރިހާ ރަހީނުން މިނިވަންކޮށް، ހަމާސް ލައްވާ ހަތިޔާރު ބެހެއްޓުމާއި، ޣައްޒާ ސްޓްރިޕް ހަތިޔާރުން މިނިވަން ކުރުން" ހިމެނޭ ފުރިހަމަ އެއްބަސްވުމަކަށް އެމެރިކާ އާއި އިސްރާއީލުން ދިއުން ކަމުގައެވެ. މިއީ ހަނގުރާމަ ނިމުމަކަށް ގެނައުމަށް އިސްރާއީލުން ކަނޑައަޅާފައިވާ މައިގަނޑު ޝަރުޠުތަކެވެ.

މި މައްސަލައާ ގުޅޭގޮތުން މަޢުލޫމުލޫމާތު ލިބިފައިވާ މަޞްދަރެއް ރޮއިޓަރސް އަށް އާދީއްތަ ދުވަހު ބުނެފައި ވަނީ ސަފީރުގެ ޒިޔާރަތް އިސްރާއީލުން ދެކެެނީ "ވަރަށް މުހިންމު" ކަމެއްގެ ގޮތުގައި ކަމަށެވެ.

ނަމަވެސް އާދީއްތަ ދުވަހުގެ ފަހުން، އިސްރާއީލުގެ ބޮޑު ވަޒީރު ވަނީ އެއްބަސްވުމަކަށް ވާސިލުވުމަށް މަސައްކަތްކުރުމަކީ ބޭކާރު ކަމެއް ކަމަށް ބުނެ، އިތުރު ބާރުގެ ބޭނުން ކުރާނެ ކަމުގެ އިންޒާރު ދީފައެވެ: "ހަމާސް އިން އެއްބަސްވުމަކަށް ޝައުޤުވެރިކަމެއް ނުދައްކާކަން އެނގެމުންދާތީ، ބޮޑުވަޒީރު މިހާރު މަސައްކަތް ކުރަމުން ދަނީ ރަހީނުން މިނިވަން ކުރުމަށާއި އަސްކަރީ ގޮތުން [ހަމާސް] ބަލިކުރުމަށެވެ."

ނަމަވެސް ހަމާސް އަސްކަރީ ގޮތުން ބަލިކުރުމަކީ ކޮބައި ކަމާމެދު އިސްރާއީލުގެ ލީޑަރޝިޕްގެ ތެރޭގައި ބަހުސްކުރެވެމުންދެއެވެ. އިސްރާއީލުގެ ބައެއް އިސްވެރިން ހުށަހަޅާފައި ވަނީ ހަމާސް އަށް ފިއްތުން އިތުރު ކުރުމުގެ ގޮތުން ޣައްޒާގެ ބައެއް ސަރަޙައްދުތައް ހިސޯރު ކުރާ ކަމަށް އިޢުލާނު ކުރުން ކަމަށް ރިޕޯޓުތައް ބުނެއެވެ.

މާލީ ވަޒީރު ބެޒަލެލް ސްމޮޓްރިޗް އަދި ޤައުމީ ސަލާމަތީ ވަޒީރު އިތަމާރު ބެން-ގްވިރް ބޭނުން ވަނީ އިސްރާއީލުން ޣައްޒާ ގައި އިސްރާއީލު ސިފައިންގެ ވެރިކަން ޤާއިމުކޮށް، އެ ސަރަޙައްދު އަތުލުމަށްފަހު، 20 އަހަރު ކުރިން އެތަނުން ނެރެލި ޔަހޫދީ އާބާދީތައް އަލުން ޤާއިމު ކުރުމަށެވެ.

ސިޔާސީ ލީޑަރޝިޕްގެ ބައެއް މީހުން ހަމަލާތައް ފުޅާކުރުމަށް ބާރު އަޅަމުން ދާއިރު، އިސްރާއީލު ސިފައިން ކަންބޮޑުވަނީ ހަމަލާތައް ފުޅާ ކުރުމުން އަދިވެސް ދިރިތިބި ކަމަށް ބެލޭ 20 ރަހީނުންނަށް ނުރައްކާވެދާނެތީ ކަމަށް ވެއެވެ.

އިސްރާއީލުގެ އާމީ ރޭޑިއޯ އިން ހޯމަ ދުވަހު ރިޕޯޓުކޮށްފައިވާ ގޮތުގައި، ސިފައިންގެ އިސްވެރިޔާ އެޔާލް ޒަމީރު ވަނީ ސިޔާސީ ލީޑަރޝިޕްގެ ފަރާތުން ސްޓްރެޓީޖިކް ސާފުކަމެއް ނެތްކަމަށް ބުނެ އިތުރަށް ހިތްހަމަނުޖެހުން ފާޅު ކޮށްފައެވެ. އޭނާ ކަންބޮޑުވަނީ ހަމާސްގެ ހަނގުރާމަވެރިންނާ އެކު ދިގުލައިގެންދާ ހަނގުރާމައަކަށް ވަންނަން ޖެހިދާނެ އަތީ ކަމަށް ވެއެވެ.

އަންގާރަ ދުވަހު، ޤަޠަރާއި މިޞްރުން ވަނީ ފަރަންސޭސިވިލާތާއި ސަޢޫދީ ޢަރަބިއްޔާ އިން އިސްރާއީލު-ފަލަސްޠީނު މައްސަލައިގައި ދެ ދައުލަތުގެ ހައްލެއް ހޯދުމުގެ ގޮތުން އިއުލާނު ކޮށްފައިވާ ފިޔަވަޅުތަކަށް ތާއީދު ކޮށްފައެވެ. މީގެ ތެރޭގައި ހަމާސް އިން އެ ޖަމާޢަތުގެ ހަތިޔާރު ފަލަސްޠީނު އޮތޯރިޓީ އާ ހަވާލު ކުރުމަށް ގޮވާލުން ހިމެނެއެވެ.

ހަމާސް އިން ތަކުރާރުކޮށް ބުނަމުން އައިސްފައި ވަނީ ފަލަސްތީނަށް މިނިވަންކަން ނުލިބެނީސް އެ ޖަމާޢަތުން ހަތިޔާރު ދޫކޮށް ނުލާނެ ކަމަށެވެ. ނަމަވެސް އެ ޖަމާޢަތުގެ ތިން އިސްވެރިއެއްގެ ބަހުން، ހަމާސް އިން މެދުވެރިންނަށް ބުނެފައި ވަނީ ޣައްޒާގެ ވެރިކަން ދޫކޮށްލުމަށް ތައްޔާރަށް ތިބިކަމަށެވެ. އެހެން ނަމަވެސް އެއީ ވަކި ފަރާތަކަށް ނުޖެހޭ ވެރިކަމެއް ޤާއިމުކުރުމުގެ ގޮތުން ކަމަށް ވެސް ބުނެފައި ވެއެވެ.

ހަމާސް އިން ބުނެފައި ވަނީ ހަނގުރާމައަށްފަހު ޣައްޒާގެ އިންތިޒާމުތައް ހަމަޖައްސަން ވާނީ ފަލަސްޠީނުގެ ރައްޔިތުންގެ މެދުގައި އެއްބަސްވެވިގެން ކަމަށާއި، ބޭރުގެ ބާރުތަކުން އެކަން ނިންމައިގެން ނުވާނެ ކަމަށެވެ.

އިސްރާއީލުގެ ޚާރިޖީ ވަޒީރު ގިޑިއަން ސާރު ހޯމަ ދުވަހު ހާމަކޮށްފައި ވަނީ ދެފަރާތުގެ ދެމެދުގައި ހުރި ތަފާތުތައް އަދިވެސް ވަރަށް ބޮޑުކަމަށެވެ.

"އަހަރެމެން ބޭނުން ވަނީ އަހަރެމެންގެ ހުރިހާ ރަހީނުން އަނބުރާ ގެނައުމަށެވެ. އަހަރެމެން ބޭނުން ވަނީ މި ހަނގުރާމަ ނިމުމަކަށް ގެނައުމަށެވެ. އަހަރެމެން އަބަދުވެސް އިސްކަން ދެނީ އެކަން ކުރެވެން އޮތްނަމަ ޑިޕްލޮމެޓިކް ވަސީލަތްތަކުން ކުރުމަށެވެ. ނަމަވެސް ހަމަ ޔަޤީނުން ވެސް ބޮޑު ސުވާލަކީ، ހަނގުރާމަ ނިމުމަކަށް ގެނައުމުގެ ޝަރުޠުތަކަކީ ކޮބައިހެއްޔެވެ؟" އޭނާ ޖެރޫސަލަމްގައި ނޫސްވެރިންނަށް ބުނެފައިވެއެވެ.