ހަމާސްގެ ވެރިޔާ އިސްމާއީލް ހަނިއްޔާ އަދި ހިޒްބުﷲ ގެ އިސް ކޮމާންޑަރ ފުއާދް ޝުކްރް އަވަހަރާކޮށްލި ހަމަލާތަކަށް ބަދަލު ހިފުމުގެ ގޮތުން އީރާނުންނާއި ހިޒްބުﷲ އިން އިޒްރޭލަށް ދޭނެ ކަމަށް ބެލެވުނު ހަމަލާ ހީކުރި ވަރަށް ވުރެ ލަސްވެއްޖެ ކަމަށް އެމެރިކާގެ ޖަސޫސީ އޮފިޝަލުން ބުނެފައިވާ ކަމަށް މީޑިއާ ރިޕޯޓްތައް ބުނެފިއެވެ.

އަންގާރަ ދުވަހު އޮފިޝަލުންނާ ހަވާލާދީ ހާމަ ކުރި މި ޚަބަރުގައި ބުނެފައިވަނީ އެމެރިކާގެ އޮފިޝަލް ހީކޮށްގެން ތިބީ ރޮކެޓާއި މިސައިލް ނުވަތަ ޑްރޯން ބޭނުން ކޮށްގެން ރައްދު ހަމަލާތައް ވަރަށް އަވަހަށް އީރާނުން ދޭނެ ކަމުގައެވެ. އެގޮތުން މިދިޔަ އާދިއްތަ ނުވަތަ ހޯމަ ދުވަހު ބަދަލު ހިފުމުގެ ހަމަލާ އީރާނުން ދޭނެ ކަމަށް ބެލެވުނު ކަމަށްވެސް ބުނެފައިވެއެވެ.

އެހެން ނަމަވެސް އަންގާރަ ނިމި ބުދަ އައި އިރުވެސް އީރާނަކުންވެސް ހިޒްބުﷲ އަކުންވެސް އެފަދަ ހަމަލާއެއް ދީފައެއް ނުވެއެވެ.

ހުސްވި އަހަރުގެ އޮކްޓޯބަރު 7 ވަނަ ދުވަހުން ފެށިގެން ފަލަސްތީނުގެ ގާޒާ ގައި އިޒްރޭލުން ހިންގާ ހަނގުރާމައިގެ ކަންކަން އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫ ގެންދަވާ ގޮތާ މެދު އެމެރިކާގެ ރައީސް ޖޯ ބައިޑްން ހިތްޕުޅާ ނުވާކަން ހާމަވެފައި ވީ ނަމަވެސް، އިޒްރޭލް ދިފާއު ކުރުމުގައި އެމެރިކާ އިން ކުރަން ޖެހޭ ކޮންމެ ކަމެއް ކުރާނެ ކަމުގެ ޔަގީންކަން އިޒްރޭލަށް އެމެރިކާ ސަރުކާރުން ވަނީ ދީފައެވެ. އޮކްޓޯބަރ 7 ވަނަ ދުވަހު ހަމާސް އިން އިޒްރޭލަށް ދިން ހަމަލާ އާ ގުޅިގެން އެމެރިކާ އިން ވަނީ 12 ބިލިއަން އެމެރިކާ ޑޮލަރުގެ އަސްކަރީ އެހީ އިޒްރޭލަށް ދިނުމަށް ނިންމާފައެވެ.

މެދު އިރުމަތީގެ މަސްރަހް އިތުރަށް ހޫނު ވަމުން ދާއިރު އެމެރިކާގެ ޚާރިޖީ ވަޒީރު އެންތަނީ ބްލިންކަން އަންގާރަ ދުވަހު ވިދާޅުވެފައިވަނީ، ސަރަހައްދުގެ މަސްރަހް އިތުރަށް ގޯސްވުމަށް މެދުއިރުމަތީގެ ގައުމުތަކުން ބޭނުން ނުވާކަން އީރާނަށް ވެސް އަދި އިޒްރޭލަށް ވެސް އެމެރިކާ އިން ސީދާ އަންގާފައިވާނެ ކަމަށެވެ.

އީރާނުން ވެސް އަދި ހިޒްބުﷲ އިން ވެސް ކަންކުރާނެ ގޮތެއް މިހާތަނަށް ސާފުވެފައި ނުވިއަސް، އެމެރިކާގެ އޮފިޝަލުން ގަބޫލު ކުރާ ގޮތުގައި އިޒްރޭލަށް އީރާނުންވެސް ހިޒްބުﷲ އިން ވެސް ހަމަލާ ދޭނެއެވެ. އެމެރިކާގެ ޖާސޫސީ އޮފިޝަލުން ދެކޭ ގޮތުގައި ބުރާސްފަތި ނުވަތަ ހުކުރު ދުވަހު އީރާނުގެ ހަމަލާތައް އިޒްރޭލަށް އައުމަކީ އެކަށީގެންވާ ކަމެކެވެ.

ބެލެވޭ ގޮތުގައި އީރާނުން ހަމަލާ ދިނުމުގައި ގޮތެއް ނިންމާނީ ބުދަ ދުވަހު ޖިއްދާ ގައި ކުރިއަށްދާ އޮގަނައިޒޭޝަން އޮފް ދަ އިސްލާމިކް ކޯޕަރޭޝަން (އޯއައިސީ) ގެ ޖަލްސާ އަށް ފަހުގައެވެ. އޯއައިސީގެ މި ބައްދަލުވުމަކީ ހަނިއްޔާ އަވަހާރަ ކޮށްލުމާ ގުޅިގެން އީރާނުގެ އެދުމުގެ މަތިން އިންތިޒާމް ކުރެވުނު ކުއްލި ބައްދަލު ވުމެކެވެ.

އީރާނުންނާއި ހިޒްބުﷲ އިން ދީފާނެ ކޮންމެ ހަމަލާ އަކުން އިޒްރޭލު ސަލާމަތް ކުރަން އެމެރިކާ އިން ތައްޔާރަށް އޮތް ކަމަށް އޮފިޝަލުން ބުނި ނަމަވެސް އެމީހުން ދެކޭ ގޮތުގައި ހަނގުރާމަ ދިގުލާ ހިނގައްޖެ ނަމަ އެއީ އެމެރިކާ އަށް ވެސް އިޒްރޭލަށްވެސް ކުރިމަތިވާނެ ބޮޑު ގޮންޖެހުމެއް ކަމަށް އެމެރިކާގެ އޮފިޝަލުން ބުނެފައިވާ ކަމަށް ރިޕޯޓްތައް ބުނެއެވެ.